މާލޭގެ ބޮޑެތި މަގުތައް ފިޔަވާ ހުރިހާ މަގެއްގައި މާހެފުން ބޭއްވުމަށް ހުއްދަ ދޫކުރަން ނިންމާފައިވާ ކަމަށް މާލެ ސިޓީ ކައުންސިލުން ބުނެފި އެވެ.
ޒަމާނުއްސުރެ މާފެހުމަކީ ރޯދަމަސް ކައިރިވުމުން އާއިލީ އަދި އަވައްޓެރިން ޝާމިލްވެގެން ބާއްވާ ކެއުމެކެވެ.
ސިޓީ ކައުންސިލުން ބުނީ މި އަހަރުގެ ރޯދަމަހާ ދިމާކޮށް ވެސް މާހެފުމުގެ ހަރަކާތްތައް ބޭއްވުމަށްޓަކައި މި މަހުގެ 25، 26، 29 އަދި 30 މިހަތަރު ދުވަހު މާލޭގެ ބޮޑެތި މަގުތައް ފިޔަވާ އެހެނިހެން މަގުތަކުގައި ހާއްސަ ކުރާނެ ކަމަށެވެ.
އަދި އެ ހަރަކާތް ބޭއްވުމަށް އެދި ސިޓީ ހުށަހެޅުމުގެ ފުރުސަތު ވެސް ހުޅުވާލާފައިވާ ކަމަށް ސިޓީ ކައުންސިލުން ބުންޏެވެ.
މީގެ އިތުރުން ވެސް ރޯދަމަހާ ދިމާކޮށް ގިނަ ކަންތައްތަކެއް ކުރުމަށް ސީޓީ ކައުންސިލުން ނިންމާފައިވެ އެވެ. އެގޮތުން ހަ އަހަރުން ދަށާއި ނުވަ އަހަރުން ދަށާއި 12 އަހަރުން ދަށަށް ހާއްސަކޮށް ސިޓީ ކައުންސިލުން ރާވައިގެން މަދަހަ މުބާރާތެއް ކުރިއަށް ގެންދިއުމާއި، ހެޔޮ އެދޭ ފަރާތްތަކާ މަޝްވަރާކޮށްގެން ގުރުއާން މުބާރާތެއް ކުރިއަށް ގެންދިއުމަށް ވަނީ ނިންމައިފަ އެވެ.
މީގެ އިތުރުން އަސުރު ނަމާދަށްފަހު މާލޭގެ ހުރިހާ މިސްކިތެއްގައި ދަރުސް ދެވޭނެ އިންތިޒާމްތައް ހަމަޖެއްސުމާއި، އަމިއްލަ ޖަމާޢަތްތަކުން މީގެ ކުރިން ކުރިއަށް ގެންދިޔަ ފޯރުންތެރިކަން ނެތް ފަރާތްތަކަށް ރޯދަ ވީއްލުމަށް ކާބޯތަކެތި ފޯރުކޮށްދިނުމުގެ އިންތިޒާމް ހަމަޖެއްސުމަށް ނިންމާފައިވާ ކަަމަށް ވެސް ސިޓީ ކައުންސިލުން ވަނީ ބުނެފަ އެވެ.
