ވޮޝިންޓަން، އެމެރިކާ (މާޗް 2) - އަފްގާނިސްތާނަށް އިންސާނީ އެހީގެ ގޮތުގައި އެއް ބިލިއަން ޑޮލަރު ފޯރުކޮށްދޭން ވޯލްޑް ބޭންކުން ނިންމައިފި އެވެ.
މިދިޔަ ޑިސެމްބަރު މަހު ވެސް އަފްގާނިސްތާން ރީކޮންސްޓްރަކްޝަން ޓްރަސްޓް ފަންޑްގެ ދަށުން 280 މިލިއަން ޑޮލަރު ދޫކުރި އެވެ.
ހިލޭ އެހީގެ ގޮތުގައި ދޫކުރާ ފަންޑު ބޭނުން ކުރާނީ "އަސާސީ ހިދުމަތްތައް ފޯރުކޮށްދިނުމާއި ނާޒުކު ހާލަތްތަކުގައި ތިބި ރައްޔިތުން ރައްކާތެރި" ކުރުމަށެވެ.
މިދިޔަ އޯގަސްޓް މަހު ތާލިބާނުން ވެރިކަމަށް އައުމާ އެކު ވޯލްޑް ބޭންކުން އަފްގާނިސްތާނަށް އެހީ ފޯރުކޮށްދިނުން މެދުކަނޑާލި އެވެ.
އަފްގާނިސްތާން ރީކޮންސްޓްރަކްޝަން ޓްރަސްޓް ފަންޑަކީ ގިނަ ޑޯނަރުންތަކެއްގެ އެހީއިން ހިންގާ ފަންޑެކެވެ. އޭގެ އަމާޒަކީ އަފްގާން ރައްޔިތުން ދިރިއުޅުމުގެ ފެންވަރު ރަނގަޅު ކުރުމެވެ.
ތާލިބާނުން ވެރިކަމަށް އައުމާ ހަމައަށް އަފްގާނިސްތާނުގެ ތަރައްގީއަށް އެންމެ ގިނައިން ފައިސާ ފޯރުކޮށްދެމުން ދިޔައީ އެ ފަންޑުންނެވެ. އަފްގާނިސްތާނުގެ ބަޖެޓުގެ 30 ޕަސެންޓަކީ އެ ފަންޑުން ލިބޭ ފައިސާ އެވެ.
ބައިނަލްއަގްވާމީ މުޖުތަމައިން ތާލިބާން ސަރުކާރު ބަލައިގެންފައި ނުވާތީ ވޯލްޑް ބޭންކުން ތާލިބާނުންގެ އަތަށޤ އެހީގެ ގޮތުގައި ފައިސާ ނުދޭނެ އެވެ.
އޭގެ ބަދަލުގައި ފައިސާ ފޯރުކޮށްދޭނީ އަފްގާނިސްތާނުގައި ހަރަކާތްތެރިވާ އދ. ގެ އެޖެންސީތަކަށެވެ. އޭގެ ތެރޭގައި ޔުނިސެފް ހިމެނެ އެވެ.
