މޯލްޓާގައި އޮނަން ބައްދަލުވުމެއްގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިރޭ އެ ގައުމަށް ފުރާވަޑައިގަތުމަށް ހަމަޖެހިއްޖެ އެވެ.
މިއަދު އޮތް ރައްޔިތުންގެ މަޖިލިސް ޖަލްސާ ފައްޓަވަމުން ނަޝީދު ވަނީ އެމަނިކުފާނު މިރޭ މޯލްޓާއަށް ފުރާވަޑައިގަންނަވާނެ ކަމަށް ވިދާޅުވެފަ އެވެ. ނަޝިދު ވިދާޅުވީ އެ ދަތުރުފުޅަކީ މޯލްޓާގައި ބާއްވާ ވޯލްޑް ފޯރަމް ފޯ ކަލްޗާ އެންޑް ޕީސްގެ ޗެއާމަން އަބްދުލް އަޒީޒް ސައުދު އަލް ބަޓަން އެ ޖަމިއްޔާގެ ބައްދަލުވުމެއްގައި ބައިވެރިވެވަޑައިގަތުމަށް ލިބިފައިވާ ދައުވަތަކަށް ކުރައްވާ ދަތުރުފުޅެއް ކަމަށެވެ.
ނަޝީދު ވިދާޅުވީ އެ ބައްދަލުވުމުގައި ބައިވެރިވުމަށް އެމަނިކުފާނުގެ އިތުރުން ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒް އަދި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމްއަށް ވެސް ދައުވަތު ލިބިފައިވާތީ އެ ދެ ބޭފުޅުން ވެސް އެ ދަތުރުފުޅުގައި ބައިވެރިވެވަޑައިގަންނަވާނެ ކަމަށެވެ.
ދަތުރު ނިންމަވާލުމަށްފަހު އަންނަ އާދިއްތަ ދުވަހަށް ތާވަލުކޮށްފައިވާ މަޖިލިސް ޖަލްސާއަށް އެ ބޭފުޅުން ރާއްޖެ ވަޑައިގަންނަވާނެ ކަމަށް ނަޝީދު ވިދާޅުވި އެވެ.
ވޯލްޑް ފޯރަމް ފޯ ކަލްޗާ އެންޑް ޕީސްއަކީ ދުނިޔޭގައި ސުލްހަވެރިކަމުގެ ސަގާފަތެއް އަށަގަނުވައި ކުރިޔަށް އަންނަން އޮތް ޖީލުތަކަށް އެ ސަގާފަތުގެ ދަށުން ރައްކާތެރިކަން ފޯރުކޮށްދިނުމަށް މަސައްކަތްކުރާ ޖަމިއްޔާއެކެވެ.
