ކުޅުދުއްފުށީ ސިޓީގައި ބާއްވަމުން އަންނަ އެންމެ ފޯރިގަދަ އެއް ފުޓްސަލް މުބާރާތް ކަމަށްވާ 'ޒިގްޒެގް އިންޓަ އޮފީސް ފުޓްސަލް ޓޯނަމެންޓް'ގެ ފައިނަލްގައި 5-1 އިން ދިރާގު ބަލިކޮށް, އުރީދޫއިން ޗެމްޕިއަންކަން ހޯދައިފި އެވެ.
މިދިޔަ އާދިއްތަ ދުވަހު ކުޅުދުއްފުށީ ފުޓްސަލް ދަނޑުގައި އޮތް ފައިނަލް މެޗްގައި އުރީދޫ އިން ދިރާގުގެ މައްޗަށް ކާމިޔާބު ހޯދީ 1-5 ލަނޑުގެ ނަތީޖާ އަކުންނެވެ. ފައިނަލްގެ މެޗްގެ މޮޅު ކުޅުންތެރިޔާއަކީ އުރީދޫގެ މުހައްމަދު ރިފްޝާނެވެ. މުބާރާތުގެ މޮޅު ފަސް ކުޅުންތެރިންގެ ތެރޭ ވެސް އޭނާ ހިމެނެ އެވެ.
މޮޅު ކުޅުންތެރިންގެ ތެރޭ ދެން ހިމެނެނީ އުރީދޫ ޓީމްގެ ކީޕަރު ސައްމޫން މުހައްމަދާއި އެ ޓީމުގެ ޖުމައިލް ޖަމީލް އަދި ދިރާގު ޓީމްގެ ޔާމިން މުހައްމަދު (ޔާންޓެ) އާއި ހަމްދޫން އަހުމަދު (ހަމްދު) އެވެ.
މުބާރާތުގެ އެންމެ މޮޅު ކުޅުންތެރިޔާއަކަށް އުރީދޫގެ ޖުމައިލް ހޮވުނުއިރު މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާއަކީ ކަސްޓަމްސް އާރްސީގެ ހަސަން ނޫރިޝް އެވެ. އޭނާ ވަނީ 12 ލަނޑު ޖަހައިފަ އެވެ.
ފައިނަލް މެޗް ޝަރަފުވެރިކޮށް ދެއްވީ މުބާރާތުގެ ޕްރިމިއަމް ސްޕޮންސަރު ކަމަށްވާ އެސްޓީއޯގެ މެނޭޖިން ޑިރެކްޓަރު ހުސެއިން އަމްރު އެވެ. މި މަހުގެ 15 ވަނަ ދުވަހު ފެށި މުބާރާތުގައި ކުޅުދުއްފުށީގެ އެކި އޮފީސްތަކާއި މުއައްސަސާތަކުން ޖުމްލަ 12 ޓީމެއް ބައިވެރިވި އެވެ.
"މިއީ މި ސިޓީގައި މިގޮތަށް ބޭއްވޭ އެންމެ ބޮޑު ފުޓްސަލް މުބާރާތް, މި މުބާރާތަށް އޮފީސްތަކުން ވަރަށް ބޮޑު ހޭދައެއްކޮށް ދުރާލާ ތައްޔާރުވޭ," ޒިގްޒެގްގެ އޮފިޝަލަކު ބުންޏެވެ.
ޒިގްޒެގް ޖަމިއްޔާއިން ގެންދަނީ ކުޅުދުއްފުށީގައި މި މުބާރާތުގެ އިތުރުން ވެސް ކުޅިވަރުގެ ގިނަ މުބާރާތަކެއް ބާއްވަމުންނެވެ. އެގޮތުން, މި އަހަރަށް ވެސް އިތުރު މުބާރާތްތަކެއް އެ ޖަމިއްޔާއިން ވަނީ ތާވަލުކޮށްފަ އެވެ.
