އެންމެ ގިނަ މެރެތަން ދުވުމުގެ ރެކޯޑް އޮތް ދިވެހި ދުވުންތެރިޔާ، ނަސްރުﷲ އަހުމަދު (ނަސްރު) އަންނަ އާދިއްތަ ދުވަހު ތުރުކީގައި ބާއްވާ މެރަތަން އަކަށް މިއަދު ބޮޑު އުންމީދަކާ އެކު ފުރައިފި އެވެ.
ނަސްރު، އޭނާގެ 79 ވަނަ މެރަތަން ދުވަން ނިންމާފައިވަނީ އޭނާ ކޯޗުކޮށްދޭ ހަތަރު ދުވުންތެރިން ވެސް ވާދަކުރާ އިވެންޓެއް ކަމަށްވާ, ތުރުކީގެ ރަންތާލިޔާ އިވެންޓްގަ އެވެ. އަންނަ އާދިއްތަ ދުވަހަށް ޝެޑިއުލްކޮށްފައިވާ މި އިވެންޓްގައި ނަސްރާއި މުހައްމަދު އިރުފާން ފުލް މެރަތަން ދުވަން ނިންމާފައިވާއިރު، ދެން ވާދަކުރަނީ ހާފް މެރަތަން ދުވަން ނިންމާފައިވާ، އަހުމަދު ޒިޔާން، ރިޒާން ރަޝީދު، ޔޫސުފް އިބްރާހިމް އަދި އަހުމަދު ޒިޔާން މުހައްމަދު އެވެ.
ނަސްރު ކޯޗުކޮށްދެމުން އަންނަ ބައެއް ދުވުންތެރިންނާ އެކު ފޮޓޯ އަކަށް ހުއްޓިލައިގެން.
މިއީ ނަސްރު ތުރުކީގައި ދުވާ ހަތަރު ވަނަ ފަަހަރެވެ.
ސިފައިންގޭގެ ސްޓާފް ސާޖަންޓް، ނަސްރު ދުވުމުގެ ތެރެއަށް ވަނީ 2000 ގެ ކުރީކޮޅުގަ އެވެ. ދުވުމުގެ ތެެރެއަށް ރަސްމީކޮށް ނުކުންނަން ނަސްރަށް ހިތްވަރު ލިބުނީ ސިފައިންގެ ޔުނިޓްތަކުގެ މެދުގައި އޮތް އެތުލެޓިކްސް މުބާރާތެއްގެ ތެރެއިން ކުރެވުނު ތަޖުރިބާ އަކުންނެވެ.
އެ ގޮތުން އެ މުބާރާތުގެ 5000 މީޓަރު ދުވުމުގައި، ފަސް ވަނައިގައި އޮވެ، އެ ރޭހުގެ އެންމެ ފަހު 400 މީޓަރުގައި ތަފާތު ހިތްވަރެއް ނެރެ، ކުރިއަށް ޖެހިލި ގޮތަށް ގޮސް ރޭހުގެ ތިން ވަނަ ނިންމާލި އެވެ. އެއީ އޭނާގެ ވިސްނުން ދިގު ދުވުންތަކާ ދިމާލަށް ދިޔަ ސަބަބެވެ. އެ ވިސްނުމުގައި ކުރިއަށް ޖެހި، 2008 ގައި އޮތް އެމްޓީސީސީ މެރަތަން ރޭސް ވެސް ހަތަރު ގަޑިއިރަށް ވުރެ އަވަހަށް ނިންމުމައި، ދިގު ރާސްތާ ދުވުންތަކުގެ ތެރެއަށް ރަސްމީކޮށް ވަނެވެ.
އިންޓަނޭޝަނަލް މެރަތަންއެއްގެ ތެރެއިން މޯޑު (ކ) އާއި ނަސްރު ދުވަނީ.
މިހާރު ނަސްރު އަމާޒަކަށް ހަދައިގެން ހުރީ މެރަތަން ދުވެގެން ސަރަަހައްދުގެ ނޫނީ ދުނިޔޭގެ ރެކޯޑަކާ ހަމައަށް ވާސިލްވުމެވެ. އެ ދަތުރުގައި އޭނާ އަމާޒަކީ އަމިއްލަ ކުރިއެރުން އެކަންޏެއް ނޫނެވެ. ދުވުންތެރިން އުފައްދައި، ކޯޗުކޮށްދީ އިންޓަނޭޝަނަލް އިވެންޓްތަކަށް ގެންދަން ވެސް އޭނާ އަންނަނީ އެކި މަސައްކަތްތައް ކުރަމުންނެވެ.
އެ ގޮތުން މި ފަހަރުގެ ތުރުކީ އިވެންޓަށް ނަސްރު ދިޔައީ އާ ދެ ދުވުންތެރިން ގޮވައިގެންނެވެ. ދެން ހިމެނެނީ ގައުމީ ލެވަލްގެ ދެ އެތުލީޓުންނެވެ.
ނަސްރު، "އަދަދު" އަށް ބުނީ އެކަށީގެންވާ ކާމިޔާބެއް މި ދުވުންތެރިންގެ ފަރާތުން ވެސް އުންމީދުކުރާ ކަމަށާއި ބޭނުމަކީ ރަނގަޅު ޓައިމިން އެއް ކަމަށެވެ.
"މީގެ ކުރިން ވެސް ނަަސްރުގެ އެތުލީޓަކު ވަނީ ރަންތަލިޔާ އިވެންޓުން އެއް ވަނަ ހޯދާފައި. އެއީ މުހައްމަދު ރަޝީދު (މޯޑު). އެހެންވެ، އުންމީދު އެބައޮތް ކާމިޔާބެއް ހޯދިދާނެ ކަމުގެ ވެސް. ކޯޗެއްގެ ގޮތުގައި ހުރެ، މި އިވެންޓްގައި މި ދުވާ ދުވުންތެރިން ވެސް ގައުމީ ލެވަލަށް ބަލާއިރު، ރަނގަޅު ކާމިޔާބެއް ހޯދާނެ ކަމުގެ އުންމީދު އެބައޮތް،" ނަސްރު ބުންޏެވެ.
މިދިޔަ ޖެނުއަރީ މަހު ރާއްޖޭގެ ދެ ދުވުންތެރިއަކު ޑާކާ މެރަތަންގައި ވާދަކުރިއިރު، ޓީމުގެ ކޯޗަަކަށް ހުރީ ނަސްރު އެވެ.
ނަސްރު ވަނީ ބައިނަލްއަގުވާމީ އިވެންޓްތަކުން ދުވުންތެރިންނަށް ފުރުސަތު ފަހިކޮށްދޭން ރާއްޖޭގެ އެތުލެޓިކް އެސޯސިއޭޝަނުން ކޮށްދޭ މަސައްކަތަށް ޝުކުރު އަދާކޮށްފަ އެވެ.
