ހަނގުރާމަ ހިނގަމުންދާ ޔޫކްރެއިންގެ ވެރިރަށް ކީވްގައި ތާށިވި ދިވެހި އާއިލާއެއް ސަލާމަތުން ބޯޑަރު ހުރަސްކޮށް ހަންގޭރީއަށް އެތެރެވެއްޖެ ކަމަށް ރާއްޖޭގެ ފޮރިން މިނިސްޓްރީން ބުނެފި އެވެ.
ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މިއުވާން މުހައްމަދު "އަދަދު" އަށް ވިދާޅުވީ ޔޫކްރެއިންގެ ވެރިރަށް ކީވްގައި ދިރިއުޅެމުންދިޔަ ދިވެހި އާއިލާ މިހާރު ތިބީ ހަންގޭރީގައި ކަމަށެވެ. އެމީހުން ހަންގޭރީއަށް ދަތުރުކޮށްފައިވަނީ އަމިއްލައަށް ދަތުރު ހަމަޖައްސައިގެން ކަމަށް މައުލޫމާތު ލިބެ އެވެ.
ހަންގޭރީއަށް ފޯރުމާއެކު ފޮރިން މިނިސްޓްރީން އެމީހުން އެދޭނަމަ އެނބުރި ރާއްޖެ އައުމަށް އެހީތެރިވެދޭނެ ކަމަށް މިއުވާން ވިދާޅުވި އެވެ.
ކީވްގައި ތާށިވި ދިވެހި އާއިލާއަކީ ހަތަރު މެމްބަރުންގެ މައްޗަށް އެކުލެވޭ އާއިލާއެކެވެ. އޭގެ ތެރޭގައި ހިމެނެނީ ތުއްތު ދެ ކުދިންނާއި ޔޫކްރެއިންއަށް ނިސްބަތްވާ އަންހެނަކާއި ދިވެހި ފިރިހެނެކެވެ. އެމީހުން ހަންގޭރީއަށް އެތެރެވެފައިވުމާއެކު ވަރަށް އަވަހަށް އެމީހުން ރާއްޖެ ގެނެވިދާނެ ކަމަށް މިއުވާން ވިދާޅުވި އެވެ.
މިއަދު ވެސް ސަރުކާރުގެ އެހީތެރިކަމާއެކު ހަނގުރާމަ ފެށުނު ފަހުން ޔޫކްރެއިންގެ އިވަނޯވް-ފްރޭންކްވިސްކްގައި ތާށިވި ދިވެހި 15 މީހަކު ވަނީ އެނބުރި ރާއްޖެ އައިސްފަ އެވެ.
އެމީހުން މިހާރު ރައްކާތެރިކަމާއެކު ޔޫކްރެއިނުން ބޭރުވުމާއެކު މިހާރު ޔޫކްރެއިންގައި ބާކީ ތިބީ ނުވަ ދިވެހިންނެވެ. އެއީ ހަނގުރާމަ އެންމެ ވަރުގަދަޔަށް ހިނގާ ހާރްކީވްގައި ތާށިވެފައިތިބި އަށް ދިވެހިންނާއި ޑްނީޕްރޯގައި ހުރި އެއް ދިވެއްސެކެވެ.
އެމީހުން ޔޫކްރެއިނުން ނެރުމަށް މަސައްކަތް ކުރި ނަމަވެސް އެމީހުން ހަންގޭރީއަށް ދިޔުމަށް ކުރަން ޖެހޭ ދަތުރަކީ ދިގު އަދި ނުރައްކާތެރި ދަތުރެއްކަމަށް ފޮރިން މިނިސްޓްރީން ބުނެ އެވެ. ރާއްޖެ ސަރުކާރުން ދަނީ އެމީހުންނަށް މާލީ އެހީތެރިކަމާއި ސައިކޯސޯޝަލް ސަޕޯޓު މިހާރު ދެމުންނެވެ.
