އދ. ދަނގެތީ ވިޔަފާރިވެރިޔާ މަހްމޫދް އަބޫބަކުރުގެ އަނިޔާވެރި ގޮތަކަށް މަރައިލި ކަމަށް އަމިއްލަ އިއުތިރާފުން ސާބިތުވެފައިވާ ޝާ އޮލަމް މިއާ (ސާލިމް) މެރުމަށް ކްރިމިނަލް ކޯޓުން މިއަދު ހުކުމްކޮށްފި އެވެ.
މަހްމޫދް، 57، މަރާލުމަށްފަހު ފަޅު ގޯއްޗެއްގެ ފެންވަޅު ތެރެއަށް އެއްލާލާފައި އޮއްވާ ފެނުނީ މިދިޔަ އޮކްޓޯބަރު މަހުގެ 13 ވަނަ ދުވަހު އެވެ. އެ ގަތުލުގެ ތުހުމަތުގައި އޭގެ ތިން ދުވަސް ފަހުން ސާލިމް ހައްޔަރުކޮށްފައި ވާއިރު، މަހްމޫދުގެ ޖަނާޒާގައި ވެސް އޭނާ ބައިވެރިވި އެވެ.
މަހުމޫދު ނިޔާވިއިރު ވާރިސުންގެ ގޮތުގައި ތިބީ އޭނާގެ އަންހެން ދަރިން ކަމަށްވާ މަރިޔަމް ނައުމާއާއި، މަރިޔަމް މިޒްނާ އެވެ. އަދި ފިރިހެން ދަރިންގެ ތެރެއިން ފިޒާންއާއި، އަހުމަދު ފިރުޝާން އަދި އިބްރާހިމް ފަރުޝާންގެ އިތުރުން މަހުމޫދުގެ އަންހެނުންނާއި މަންމަ އެވެ. އޭނާގެ ބައްޕަ ދުނިޔެއަކު ނެތެވެ.
ވާރިސުންގެ ތެރެއިން އެންމެ މީހަކު ގިސޯސް ހިފަން ބޭނުން ނުވިޔަސް، މަރުގެ އަދަބެއް ނުދެވޭނެ އެވެ. ނަމަވެސް އެ އަނިޔާވެރި ގަތުލަށް ވާރިސުންގެ ތެރޭގައި ހިމެނޭ އެކަކުވެސް މާފު ނުކުރި އެވެ. އެންމެންވެސް ބޭނުންވީ އިސްލާމީ ޝަރީއަތުގައިވާ ފަދައިން ގިސޯސް ހިފުމަށެވެ.
ސާލިމް މަރަން ހުކުމް ކުރިޔަސް، މަރުގެ ހުކުމް ރާއްޖޭގައި ތަންފީޒު ނުކުރާތާ 60 އަހަރު ވެއްޖެ އެވެ. ލީތަލް އިންޖެކްޝަން ޖަހައިގެން މަރުގެ އަދަބު ތަންފީޒު ކުރަން ބޭނުންވާ ވަސީލަތްތައް ވެސް ގާއިމްކުރި އެވެ. ނަމަވެސް މިހާތަނަށް ތިން މީހެއްގެ މައްޗަށް ސުޕްރީމް ކޯޓުން މަރުގެ ހުކުމް އިއްވާފައިވާއިރު، އަދިވެސް ހުކުމް ތަންފީޒު ނުކުރެ އެވެ.
ގަތުލުގެ ފަސްފަހަތް
މިދިޔަ އޮކްޓޫބަރު މަހުގެ ތެރޭގައި ހިނގި މި ހާދިސާގައި، މަހުމޫދު ގެއްލިގެން ހޯދަނިކޮށް އޭނާ ފެނުނީ އަތް ފައި ބަނދެ، ބޮލާއި ފައި ގޯންޏަކަށްލައި، ވަޅަލަކަށް އެއްލާލާފައި އޮއްވަ އެވެ. މަހުމޫދު މަރާލާފައި ވަނީ އޭނާގެ ބޮލަށާއި ކަރަށާއި މެޔަށް ވަޅިއަކާއި، ކޮޅު ތޫނުކޮށްފައިވާ ދަގަނޑެއް ހަރާލައިގެންނެވެ.
މަހްމޫދުގެ ހަށިގަނޑު ފެނުމާއެކު ރަށު ރައްޔިތުން ނިކުމެ ދެ މީހަކު އަތުލައިގަނެ ފުލުހުންނާ ހަވާލު ކުރި އެވެ. އުމުރުން ދުވަސްވެފައިވާ މީހަކު ބެލުމަށް ދަނގެއްޗަށް ގެންގޮސްފައި ހުރި ސާލިމަށް އެއިރު އެއްވެސް މީހަކު ތުހުމަތެއް ނުކުރެ އެވެ.
މަހްމޫދުގެ ގާތިލަކީ ސާލިމު ކަމަށް ބެލެވެން ފެށީ ފުލުހުންގެ ހާއްސަ ޓީމެއް ދަނގެއްޗަށް ގޮސް އެ ޓީމުގެ ތަހުގީގު ސީރިއަސްކޮށް ފެށުމާ ހަމައިންނެވެ. ސާލިމް ދިރިއުޅޭ ގެއިން އެ މައްސަލައާ ގުޅޭ ވަރުގަދަ ހެކިތަކެއް ވެސް ފުލުހުން ހޯދި އެވެ. އޭނާ ވަނީ މަހުމޫދު މަރާލި ގޮތް ވެސް ތަހުގީގަށް ކިޔައިދީފަ އެވެ.
