ކަރަންޓް އުފެއްދުމުގައި ތެލަށް ބަރޯސާވާ މިންވަރު ކުޑަކުރަން ރާއްޖޭގައި ކުރާ މަސައްކަތަަށް އާންމުންގެ އެއްބާރުލުން ވަރަށް ބޮޑަށް ބޭނުންވާ ކަމަށް އެންވަޔަރަމަންޓް މިނިސްޓަރު އާމިނަތު ޝައުނާ މިއަދު ވިދާޅުވެއްޖެ އެވެ.
ސްޓެލްކޯގެ އިންޖީނުގެތަކުގެ ހިންގުން ހަރުދަނާކުުރުމަށްޓަކައި މެނޭޖަރުން ތާޒާކުރަން ކުރިއަށް ގެންދާ "ޕަވާހައުސް މެނޭޖާސް ޑިވެލޮޕްމެންޓް ޕްރޮގްރާމް" ފެށުމަށް މިއަދު ބޭއްވި ރަސްމިއްޔާތުގައި ޝައުނާ ވިދާޅުވީ އިއާދަކުރަނިވި ހަކަތަ ބޭނުންކުރާ މިންވަރު އިތުރުުކުރެވޭނީ ވެސް އާންމުންގެ އެއްބާރުލުން ލިބިގެން ކަމަށެވެ.
އެކަމުގައި އާންމުންނަށް އެހީތެރިވާން ސަރުކާރުން ކަނޑައަޅާފައިވާ ޕްރޮގްރާމެއް ވެސް އެބަ އޮތެވެ. އޭނާ ވިދާޅުވީ ގޭބީސީތަކުގައި އާންމުކޮށް ބޭނުންކުރާ ބައެއް ތަކެތި، ރަނގަޅު މިންގަނޑަށް ބަދަލުކޮށްލިޔަސް ކަރަންޓު ބޭނުންވާ މިންވަރު އެތައް ގުނައަކަށް ދަށަށް ދާނެ ކަމަށެވެ.
"ހަމައެކަނި ފްރިޖާއި ދޮންނަ މެޝިނާއި އޭސީއަށް އަޅުގަނޑުމެން ޓާގެޓްކޮށްގެން، ކުރިއަށް މިއޮތް ދެ އަހަރު ތެރޭގައި، އަޅުގަނޑުމެން ހަކަތެރި ޕްރޮގްރާމްގައި އަޅުގަނޑުމެން މި ބަޔާންކުރާ މިންގަނޑުތަކަށް، އަޅުގަޑުމެންނަށް މި ތިން ޕްރޮޑަކްޓް ބަދަލުކުރެވިއްޖެ ނަމަ 2023 ވަނަ އަހަރު އަންނަ އިރު، ކަރަންޓް ބޭނުންކުރާ ވަރު އަޅުގަނޑުމެނަށް އެބަ ދަށް ކުރެވޭ 10 މެގަވޮޓް،" ޝައުނާ ވިދާޅުވި އެވެ.
ޝައުނާ ވިދާޅުވި ގޮތުގައި އާންމުންގެ އެއްބާރުލުން ބޭނުންވަނީ އެފަދަ އުފެއްދުންތަކަށް ބަދަލުވުމުގަ އެވެ.
ހަކަތައިގެ ދާއިރާއިން ބޭނުންވާ ތަރައްގީ ހާސިލުކުރެވޭނީ ހަކަތައަށް އޮންނަ ޑިމާންޑް ދަށްކޮގެން ކަމަށާއި އެ ދާއިރާގެ މީހުންގެ ގާބިލުކަން ވެސް އިތުރުކޮށްގެން ކަމަށް އޭނާ އިތުރަށް ވިދާޅުވި އެވެ.
