ޕެރިސް (ފެބްރުއަރީ 27) - ފްރެންޗް ލީގުގައި ރޭ ކީލިއަން އެމްބާޕޭ އާއި ލިއޮނަލް މެސީގެ ކޮމްބިނޭޝަންގެ ބޭނުންހިފައި ޕީއެސްޖީން ފަހަތުން އަރައި 3-1 އިން ސެއިން އެޓިއެން ބަލިކޮށްފި އެވެ.
މި މޮޅާ އެކު ޕީއެސްޖީ ފްރެންޗް ލީގުގެ އެއް ވަނައިގައި އޮތީ 26 މެޗުން 62 ޕޮއިންޓާ އެކު އެވެ. ދެ ވަނައިގައި އޮތް ނީސް އަށް 26 މެޗުން ލިބިފައިވަނީ 46 ޕޮއިންޓެވެ. ނީސް އާއި ސްޓްރާސްބޯ ރޭ ކުޅުނު މެޗު ނިމުނީ ލަނޑެއް ނުޖެހި 0-0 އިން އެއްވަރުވެގެންނެވެ.
މެޗު ފަށައިގެން ޕީއެސްޖީން ފުލުފުލުގައި އެޓޭކްތަކެއް ކުރެވޭތޯ ބެލި ނަމަވެސް ފުރަތަމަ ލީޑުނެގީ ސެއިން އެޓިއެން އިންނެވެ. މެޗުގެ 16 ވަނަ މިނިޓްގައި ޕީއެސްޖީގެ ޕޯޗުގީސް މިޑްފީލްޑަރު ޑަނީލޯ ޕެރޭރާ އަތުން ގެއްލުނު ބޯޅައެއް ހިފައިގެން އޭރިއާތެރެއަށް ވަދެ ސެއިން އެޓިއެންގެ ޑެނިސް ބޮއާންގާ ވަނީ ތިރިތިރިން ގޯލުގެ ދުރުު ކަނަށް ފޮނުވާލައިފަ އެވެ. ޕީއެސްޖީގެ ގޯލުގައި ހުރި ޖިއަންލުއީޖީ ޑޮންނަރުންމާ އަށް އެ ބޯޅަ ހުއްޓުވޭ ގޮތެއްނުވި އެވެ.
ނަތީޖާ ހަމަހަމަ ކުރަން ޕީއެސްޖީން ކުރި މަސައްކަތް ކާމިޔާބުވީ މެޗުގެ 42 ވަނަ މިނިޓްގަ އެވެ. މެސީ އޭރިއާތެރެއިން އެމްބާޕޭ އަށް ހުސްކޮށްލާފައި ދިން ބޯޅަ އޭނާ ވަނީ ސެއިން އެޓިއެންގެ ކީޕަރު ޕޯލް ބެރްނަޑޯނީ އަތުގައި ޖައްސާފައި ގޯލަށް ވައްދާލައިފަ އެވެ. ދެ ވަަނަ ހާފްގެ ކުޅުން ފަށައިގެން ދެ މިނިޓް ތެރޭ ސެއިން އެޓިއެންގެ ތިން ކުޅުންތެރިންގެ ތެރެއިން އެމްބާޕޭ އަށް ދިން ބޯޅަ އޭނާ ވަނީ ގޯލުގެ ދުރު ކަނަށް ފޮނުވާލައި ޕީއެސްޖީ އަށް ލީޑުނަގައިދީފަ އެވެ.
ޕީއެސްޖީގެ ލީޑުފުޅާކުރި ގޯލު ޖެހީ މެޗުގެ 52 ވަނަ މިނިޓްގައި ޑަނީލޯ ޕެރޭރާ އެވެ. އެމްބާޕޭ ދިން ހިތްގައިމު ޕާހަކުން ޑަނީލޯ ޕެރޭރާ މި ގޯލު ޖެހީ ބޮލުންނެވެ.
މި މެޗުގައި ޖެހި ގޯލުތަކާ އެކު އެމްބާޕޭ ވަނީ ޕީއެސްޖީ އަށް 156 ގޯލު ޖަހައިދީފަ އެވެ. އެމްބާޕޭ އާއި ޒްލަޓާން އިބްރަހިމޮވިޗަކީ ޕީއެސްޖީ އަށް ދެ ވަނަ އަށް އެންމެ ގިނަ ގޯލު ޖަހައިދިން ކުޅުންތެރިންނެވެ. ޕީއެސްޖީ އަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތީ 200 ގޯލު ހަމަކޮށްފައި، އެ ކްލަބް ދޫކޮށްލި އުރުގުއޭގެ ފޯވާޑް އެޑިންސަން ކަވާނީ އަތުގަ އެވެ.
