ގްރީން ސްޓްރީޓްސް ބަލިކޮށް ޔުނައިޓެޑް ވިކްޓްރީ ކުރިއަށް

Feb 26, 2022, 6:46 PM
ގްރީން ސްޓްރީޓްސްގެ ޝާމިސް (ވ) ކައިރިން ޔުނައިޓެޑް ވިކްޓްރީގެ އިވާން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އަބްދުﷲ އިޔާން/ އަދަދު

ގްރީން ސްޓްރީޓްސްގެ ޝާމިސް (ވ) ކައިރިން ޔުނައިޓެޑް ވިކްޓްރީގެ އިވާން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އަބްދުﷲ އިޔާން/ އަދަދު

އުރީދޫ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސް އަތުން 1-0 އިން މޮޅުވެ، ޔުނައިޓެޑް ވިކްޓްރީ (ޔޫވީ) އިން ރަނގަޅު ފޯމު ދަމަހައްޓައިފި އެވެ.

ޔުނައިޓެޑް ވިކްޓްރީން އެންމެ ފަހުން ކުޅުނު މެޗުގައި ދަ ގްރާންޑޭ އަތުން މޮޅުވިއިރު، ގްރީން ސްޓްރީޓްސް ވަނީ ކްލަބް ވެލެންސިއާ ބަލިކޮށްފަ އެވެ. އެހެންވެ، ޔުނައިޓެޑް ވިކްޓްރީ އާއި ގްރީން ސްޓްރީޓްސް އިން ވެސް މިރޭގެ މެޗަށް ނުކުތީ މޮޅެއް ހޯދައި، ރަނގަޅު ފޯމު ކުރިއަށް ގެންދިއުމަށެވެ.

ޔުނައިޓެޑް ވިކްޓްރީ މިރޭ ހޯދި ތިން ޕޮއިންޓާ އެކު ވަނީ ލީގުގެ ގަދަ ތިނެއްގެ ތެރޭގައި ހިމެނިފަ އެވެ. އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ދެން އޮތް ޔުނައިޓެޑް ވިކްޓްރީ އާއި ވެލެންސިއާ އަށް ވަނީ ހަ ޕޮއިންޓް ލިބިފަ އެވެ. މާޒިޔާ އަށް ލަނޑުގެ ތަފާތުން ކުރި ލިބޭއިރު، ޔުނައިޓެޑް ވިކްޓްރީ އާއި ވެލެންސިއާ އޮތީ އެއް މެޗު އިތުރަށް ކުޅެގެން ލަނޑުގެ ގޮތުން އެއްވަރުވެފަ އެވެ.

މިރޭގެ މެޗު ފަށައިގެން ފަސް ވަނަ މިނިޓްގައި ޔުނައިޓެޑް ވިކްޓްރީގެ ކިރްގިސްތާން މިިޑްފީލްޑަރު އަނަޓޯލީ ވްލަޝީޗޭފް (ޓޯނީ) ޖެހި ބޯޅަ އަމާޒުވީ ގްރީން ސްްޓްރީޓްސްގެ ޕާކިސްތާން ކީޕަރު ހަނީފް ސާގިބް އަތަށެވެ. އޭގެ އިރުކޮޅެއް ފަހުން ގްރީން ސްޓްރީޓްސްގެ ކުރިއަށް ކުޅޭ ކޮލަމްބިއާގެ ފޯވާޑް ހޯސޭ އަވީލާ އަށް ހުސް ފުރުސަތެއް ލިބި ބޭނުމެއް ނުކުރެވުނެވެ. މެޗުގެ 21 ވަނަ މިނިޓްގައި ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ޖެހި ބޯޅަ ޔުނައިޓެޑް ވިކްޓްރީގެ ކީޕަރު އަހުމަދު އަނަފް ޒަރިޔަންދު ވަނީ މަތަކޮށްފަ އެވެ.

ޔުނައިޓެޑް ވިކްޓްރީގެ ބައްސާމް (ކ) ގްރީން ސްޓްރީޓްސްގެ ނާހިލް ކައިރިން ބޯޅަ ހިފައިގެންދަނީ.-- ފޮޓޯ: އަބްދުﷲ އިޔާން/ އަދަދު

ފުރަތަމަ ހާފު ނިމުމުގެ ކުރިން ޔުނައިޓެޑް ވިކްޓްރީގެ ކެޕްޓަން އަލީ ހަމްދާން (އައްޔަ) ހުސްކޮށް ވަދެ އޭރިއާތެރެއިން ޖެހި ބޯޅަ ދިޔައީ ކީޕަރު ސާގިބް އަތަށެވެ. އެކަމަކު، ދެ ވަނަ ހާފްގެ ކުޅުން ފަށައިގެން ތިން ވަނަ މިނިޓްގައި ޔުނައިޓެޑް ވިކްޓްރީން ލީޑުނެގި އެވެ. މި ގޯލު ޖެހީ ބެލަރޫސްގެ ފޯވާޑް އިވާން ވެރާސް އެވެ. އޭރިއާތެެރެއިން އިވާން އަށް ލިބުނު ބޯޅަ އޭނާ ވަނީ ހަމަޖެހިލާފައި ގޯލުގެ ކައިރީ ކަނަށް ފޮނުވާލައިފަ އެވެ.

ގްރީން ސްޓްރީޓްސް އިން އެއްވަރުކުރަން ކުރިއަށް ޖެހިގެން ކުޅެމުންދިޔައިރު، މެޗުގެ 77 ވަނަ މިނިޓްގައި އެ ޓީމުގެ އަވީލާ އަށް ރަނގަޅު ފުރުސަތެއް ލިބުނެވެ. ޗޯޓު ހުރަސްކޮށްލި ބޯޅައެއް ހުސްކޮށް އަރައި އަވީލާ ބޮލުން ފޮނުވާލި ނަމަވެސް ބޯޅަ ދިޔައީ ގޯލާ ސީދާނުވެ އެވެ.

ޔުނައިޓެޑް ވިކްޓްރީ އަށް ލީޑުފުޅާކޮށްދޭން މުސައްނިފު މުހައްމަދާއި އައްޔަ ޖެހި ޝޮޓްތައް ގްރީން ސްޓްރީޓްސްގެ ޑިފެންޑަރުން ވަނީ ބްލޮކްކޮށްފަ އެވެ.

މެޗުގެ ފަހު ކޮޅުގައި ގްރީން ސްޓްރީޓްސް އިން ދިޔައީ ފުލުފުލުގައި އެޓޭކްކުރަމުންނެވެ. އޭގެ ތެރެއިން ބޯޅައެއްގައި ގްރީން ސްޓްރީޓްސްގެ ކެޕްޓަން ރިލްވާން ވަހީދު (ރިލޭ) ޖެހި ބޯޅައެއް ޔުނައިޓެޑް ވިކްޓްރީގެ ކުޅުންތެރިއަކު އަތުގައި ޖެހުނު ކަމަށް ބުނެ، ޕެނަލްޓީ އަކަށް އެޕީލްކުރި ނަމަވެސް މެޗުގެ ރެފްރީ އަފްޝީން ނަސީރު ނިންމީ ޕެނަލްޓީ ދޭން ނުޖެހޭ ކަމަށެވެ.

ލީގުގައި މާދަމާ ހަވީރު ކްލަބް އީގަލްސް ކުޅޭނީ ސުޕަ ޔުނައިޓެޑް ސްޕޯޓްސް (ސަސް)އާ އެވެ. މާދަމާރޭ ޓީސީ އާއި މާޒިޔާ ބައްދަލުކުރާނެ އެވެ.

ކޮމެންޓް

ފަހުގެ ޚަބަރު

ކިރްގިސްތާނަކީ މި ވަގުތު ރާއްޖޭގެ ލެވަލެއް ނޫން: އުރްބާނީ

ބައިނަލްއަގުވާމީ އެކުވެރިކަމުގެ މެޗެއްގައި ކިރްގިސްތާން އަތުން 5-0 އިން ރާއްޖެ ބަލިވިއިރު، އެ ގައުމަކީ މިހާރު ރާއްޖެއަށް ވުރެ މަތީ ލެވަލެއްގެ ޓީމެއް ކަމަށް ކޯޗު އުރްބާނީ ބުނެފި. މިއީ 29 އަހަރަށް ފަހު ކިރްގިސްތާން އަތުން ރާއްޖެ ބަލިވި ފުރަތަމަ ފަހަރު ކަމަށާއި، ދެވަނަ ހާފުގައި ރާއްޖޭގެ ކުޅުން ރަނގަޅުވި ކަމަށް ބުނި

ކިރްގިސްތާނުން ތަފާތު ބޮޑުކޮށް ރާއްޖެ ބަލިކޮށްފި

ބައިނަލްއަގުވާމީ އެކުވެރިކަމުގެ މެޗެއްގައި ކިރްގިސްތާނުން 5-0 ގެ ނަތީޖާއަކުން ރާއްޖެ ބަލިކޮށްފައިވަނީ 29 އަހަރަށް ފަހުގައި މެޗުގެ ފުރަތަމަ ހާފުގައި ކިރްގިސްތާނުން ފަސް ލަނޑު ޖެހިއިރު، މިއީ 12 އަހަރުގެ މެދުކެނޑުމަކަށްފަހު މި ދެ ގައުމު ބައްދަލުކުރި ފުރަތަމަ ފަހަރު

ވިރާތު އަންނަ އަހަރު އިންޑިއާ އަށް ކުޅުން ހުއްޓާލަން ނިންމައިފި

އަންނަ އަހަރު ބާއްވާ އޯޑީއައި ވޯލްޑް ކަޕަށް ފަހު އިންޑިއާ ގައުމީ ޓީމަށް ކުޅުން ހުއްޓާލަން ނިންމާފައިވާކަން ކްރިކެޓް ތަރި ވިރާތު ކޯލީ އިއުލާންކޮށްފިއެވެ. މިހާރު ހަމައެކަނި ވަންޑޭ ފޯމެޓް ކުޅޭ ވިރާތު ބުނީ އޭނާގެ އަމާޒަކީ އިންޑިއާ ޖޯޒީގައި ފެންނާނެ ފަހު މުބާރާތް ކާމިޔާބުކުރުން ކަމަށެވެ.

އިޒްރޭލު ބަލިކޮށް އަޔަލެންޑުން ފަލަސްތީންގެ ހަނދާން އާ ކޮށްފި

ޔުއެފާ ނޭޝަންސް ލީގުގައި އިޒްރޭލު ބަލިކޮށް، އަޔަލެންޑްގެ ކުޅުންތެރިން ވަނީ ފަލަސްތީނުގެ ރައްޔިތުންނަށް ކުރިމަތިވަމުންދާ ލާއިންސާނީ އަމަލުތަކާ ދެކޮޅަށް އަޑުއުފުލައި އެގައުމުގެ ހަނދާންތައް އާކޮށްފައި. މި މެޗުގައި އަޔަލެންޑުން އިޒްރޭލުގެ ކުޅުންތެރިންނާ ސަލާމްކުރުމަށް އިންކާރުކޮށް، ފަލަސްތީނުގެ ހައްގުގައި ހާއްސަ ކަޅު ބޭންޑެއް ބޭނުންކުރި

ޕޯޗުގަލާއި ނެދަލެންޑްސް އަށް މޮޅެއް، ގްރީސް އަތުން ޖަރުމަނު ބަލި

ޔުއެފާ ނޭޝަންސް ލީގުގައި ރޭ ކުޅުނު މެޗުތަކުން ޕޯޗުގަލް އާއި ނެދަލެންޑްސް މޮޅުވިއިރު، ގްރީސް އިން ވަނީ ޖަރުމަނު ބަލިކޮށްފައި. ޕޯޗުގަލް އިން ނޯވޭގެ މައްޗަށް 2-1 އިން ކުރިހޯދިއިރު، މިއީ ޖަރުމަނުގެ އާ ކޯޗު ޔާގަން ކްލޮޕްގެ އިރުޝާދުގެ ދަށުން އެ ޓީމު ބަލިވި ފުރަތަމަ މެޗު

ރޭންކިން ދަށް ވިޔަސް ރާއްޖެއާ މެދު ސަމާލުވާންޖެހޭ: ކިރްގިސްތާން

ފީފާ ރޭންކިންގައި ރާއްޖެ ދަށުގައި އޮތް ނަމަވެސް، ކުރިއަށް އޮތް އެކުވެރިކަމުގެ މެޗުގައި ރާއްޖެއާ ދެކޮޅަށް ކުޅޭނީ ވަރަށް ބޮޑަށް ސަމާލުވެގެން ކަމަށް ކިރްގިސްތާންގެ ކޯޗު އަބްދުކައިމޯވް ބުނެފި. އަބްދުކައިމޯވް ފާހަގަކުރި ގޮތުގައި މީގެ ކުރިން ރާއްޖެއާ ދެކޮޅަށް ކުޅުނު މެޗުތަކުގެ ނަތީޖާއަށް ބަލާއިރު އެއްވެސް ޓީމަކީ ފަސޭހަ ޓީމެއް ނޫން ކަމަށް

ހުޅުމާލެ ސިންތެޓިކް ޓްރެކްގެ މަސައްކަތް ފަށަނީ

ހުޅުމާލޭ ސިންތެޓިކް ޓްރެކް ބައިނަލްއަގުވާމީ މިންގަނޑުތަކަށް ފެއްތުމަށްޓަކައި، އެ ތަނުގެ މެޓީރިއަލް ބަދަލުކޮށް އަލުން އެޅުމުގެ އަމަލީ މަސައްކަތް އަންނަ ބުރާސްފަތި ދުވަހު ފެށުމަށް ވަނީ ނިންމާފައި. އެކަން ފާހަގަކުރައްވައި ސްޕޯޓްސް މިނިސްޓަރު ރާފިއު ވިދާޅުވި ގޮތުގައި، މި މަޝްރޫއުގެ އަމާޒަކީ އަންނަ ޖެނުއަރީ މަހަށް މަސައްކަތް ނިންމުން

Newsletter

Get the latest news delivered straight to your inbox