ރަޝިޔާއިން ޔޫކްރެއިނުގެ ބޮޑެތި ސިޓީތަކަށް މިއަދު ފަތިހު ވަރުގަދަ ހަމަލާތަކެއް ދޭން ފެށިއިރު، އެ ގައުމުގެ ހާލަތު ބިރުވެރި ކަމަށާއި ޔޫކްރެއިނުގައި ތިބި ދިވެހިން މަސައްކަތް ކުރަނީ އެއްތަނަކަށް އެއްވުމަށް ކަމަށް އެ މީހުން ބުނެފި އެވެ.
ޔޫކްރެއިނުގެ އިވާނޯގައި 14 ދިވެހިން އެ ތިއްބެވެ. ހާރްކީވްގައި ފަސް ދިވެހިން އެބަ އުޅެ އެވެ. އިތުރު ދެ ސިޓީއެއްގައި އަދި އިތުރު ދެ ދިވެހިން އެބަތިއްބެވެ.
ހާރްކީވްގައި ހުރި ދިވެހި ދަރިވަރަކާ މިއަދު "އަދަދު" އިން ވާހަކަ ދެއްކިއިރު އޭނާ ބުނީ އޭނާ ހުރީ އެ ސިޓީގެ އެޕާޓްމަންޓެއްގައި ކަމަށާއި މަސައްކަތް ކުރަނީ ކޮންމެ ގޮތަކުން ނަމަވެސް އެ ގައުމުން ބޭރުވެވޭތޯ ކަމަށެވެ.
"ރޭ ދަންވަރު އެކެއް ޖަހާކަށްހާއިރު އެނގިއްޖެ މިކޮޅަށް އަރާ ހަމަލާދޭން ފަށާނެ ކަން. ދެން އޭރު އަޅުގަނޑުމެން ވެސް ނިދާފަ ތިބީ. ޓުވިޓާގަ ބޮޑަށް ހަބަރުތަކުން ވާނުވާ އެނގުނީ. ހަބަރު ކިޔަން ހުރެފަ ނިދުން ގަޑީގަ އެއްޗެއް ގޮވިއަޑު އިވިގެން ހޭލެވުނީ. ހޭލެވުނީމަ މިކޮޅުގަ ތިބި ކުދިންނަށް ފުރަތަމަ ވެސް ގުޅީ. އެގަޑީގަ މިކޮޅުގަ ވަރަށް ކައިރިން ގޮވާ އަޑުއިވޭ،" އޭނާ ކިޔައިދިނެވެ.
މި ނޫހުން ވާހަކަ ދެއްކި، ޔޫކްރެއިނުގައި ހުރި ދިވެހި ދަރިވަރު ބުނީ އެންމެން ވެސް މަސައްކަތް ކުރަނީ ހަމަލާ ލިބެމުން އަންނަ ސިޓީތަކުން ފޭބުމަށް ކަމަށްވާތީ ދަތުރުފަތުރަށް ވަރަށް ބޮޑަށް ބާރުބޮޑުވެފައިވާ ކަމަށެވެ.
އޭގެ އިތުރުން، ޔޫކްރެއިނުން ވަނީ މިހާރު އެ ގައުމުގެ ވައިގެ ސަރަހައްދު ބަންދުކޮށްފަ އެވެ. އެހެންކަމުން އެ ގައުމުގައި ތިބި ދިވެހިން ގެންނާނީ ކިހިނެއް ކަމެއް ނޭނގެ އެވެ. ނަމަވެސް ޔޫކްރެއިނުގައި ތިބި ދިވެހިން އެގައުމުން ބޭލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އަންގާރަ ދުވަހު ވަނީ އަންގައިފަ އެވެ.
