ރަޝިއާ އާއި ޔޫކްރެއިންއާ ދެމެދު ކުރަމުންދާ ހަނގުރާމަ ނިމުމަކާ ގާތްވަމުންދާ ކަމަށް ގަބޫލުކުރައްވާ ކަމަށް ރަޝިއާގެ ރައީސް ލަޑީމިއާ ޕޫޓިން ވިދާޅުވެއްޖެއެވެ.
ޕޫޓިން މިހެން ވިދާޅުވީ ދެވަނަ ބޮޑު ހަނގުރާމައިގައި ސޯވިއެޓް ޔޫނިއަނުން ނާޒީ ޖަރުމަނުގެ މައްޗަށް ހޯދި ކާމިޔާބީ ފާހަގަކުރުމަށް މޮސްކޯގައި ބޭއްވި ނަސްރުގެ ދުވަހުގެ ޕެރޭޑަށްފަހު ނޫސްވެރިންނާ ވާހަކަދައްކަވަމުންނެވެ.
ޔޫރަޕްގައި ދެވަނަ ބޮޑު ހަނގުރާމައަށްފަހު ހިނގި އެންމެ ނުރައްކާތެރި މި ކުރިމަތިލުމާ ގުޅޭގޮތުން ވާހަކަދައްކަވަމުން ޕޫޓިން ވިދާޅުވީ، މި މައްސަލަ މިހާރު ނިމުމަކާ ގާތްވަމުންދާ ކަމަށް ދެކެވަޑައިގަންނަވާ ކަމަށެވެ. މީގެ އިތުރުން ޔޫރަޕްގެ ސަލާމަތީ ކަންކަމާ ގުޅޭގޮތުން އައު އެއްބަސްވުންތަކަކަށް މަޝްވަރާކުރަން ތައްޔާރަށް ހުންނެވި ކަމަށާއި، އެފަދަ މަޝްވަރާއެއްގައި ބައިވެރިވާން އެންމެ ބޭނުންފުޅުވާ ބޭފުޅަކީ ޖަރުމަނުގެ ކުރީގެ ޗާންސެލަރ ގާހާޑް ޝްރޯޑަރ ކަމަށްވެސް އޭނާ ފާހަގަކުރެއްވިއެވެ.
ރަޝިއާއިން 2022 ވަނަ އަހަރު ޔޫކްރެއިންއަށް އެރުމާ ގުޅިގެން ހުޅަނގުގެ ގައުމުތަކާއި ރަޝިއާއާ ދެމެދު އޮތް ގުޅުން ވަނީ 1962 ވަނަ އަހަރުގެ ކިއުބާގެ މިސައިލް ކްރައިސިސްއަށްފަހު އެންމެ ބޮޑަށް ގޯސްވެފައެވެ. ރަޝިއާއިން މި ހަނގުރާމައަށް "ޚާއްސަ އަސްކަރީ އޮޕަރޭޝަނެއް" ގެ ނަން ދީފައިވާއިރު، މޮސްކޯއިން ބޭނުންވާ ހުރިހާ މަގްސަދުތަކެއް ހާސިލްވަންދެން ހަނގުރާމަ ކުރިއަށް ގެންދާނެ ކަމަށް މީގެ ކުރިން ޕޫޓިން ތަކުރާރުކޮށް ވިދާޅުވަމުން ގެންދެވިއެވެ.
ހަނގުރާމަ ފެށުމުގެ ޒިންމާ ހުޅަނގުގެ ލީޑަރުންގެ ބޮލުގައި އަޅުވަމުން ޕޫޓިން ވިދާޅުވީ، ބާލިން ފާރު ވެއްޓުމަށްފަހު ނޭޓޯ އިރުމައްޗަށް ފުޅާނުކުރާނެ ކަމަށް ވީ ވައުދާ ހުޅަނގުން ޚިލާފުވެފައިވާ ކަމަށެވެ. އަދި ޔޫކްރެއިން ޔޫރަޕިއަން ޔޫނިއަންގެ ނުފޫޒުގެ ދަށަށް ގެންދަން މަސައްކަތް ކުރަމުންދާ ކަމަށްވެސް އޭނާ ތުހުމަތު ކުރެއްވިއެވެ.
މި އަހަރުގެ ނަސްރުގެ ދުވަހުގެ ޕެރޭޑް ފެނިގެންދިޔައީ ފާއިތުވި އަހަރުތަކާ އަޅާބަލާއިރު ވަރަށް ކުޑަކޮށެވެ. އާންމުކޮށް ރެޑް ސްކޮޔަރގައި ދައްކާލާ ބޮޑެތި މިސައިލްތަކާއި ޓޭންކުތަކުގެ ބަދަލުގައި، މިފަހަރު ބޭނުންކޮށްފައިވަނީ ބޮޑެތި ސްކްރީންތަކުން ދެއްކި އަސްކަރީ ހަރަކާތްތަކުގެ ވީޑިއޯތަކެވެ. ރަޝިއާގެ ސިފައިން ޔޫކްރެއިންގައި ހަނގުރާމަ ކުރާތާ މިހާރު ހަތަރު އަހަރަށްވުރެ ގިނަ ދުވަސް ވެފައިވާއިރު، މިއީ ދެވަނަ ބޮޑު ހަނގުރާމައިގައި ސޯވިއެޓް ސިފައިން ހަނގުރާމަ ކުރި މުއްދަތަށްވުރެ ދިގު މުއްދަތެކެވެ.
މި ހަނގުރާމައިގެ ސަބަބުން ދެފަރާތުން އެތައް ލައްކަ ބަޔަކު މަރުވެ، ޔޫކްރެއިންގެ ބޮޑު ބައެއް ސުންނާފަތިވެފައިވާއިރު، ރަޝިއާގެ އިގްތިސާދަށްވެސް ވަނީ ބޮޑެތި ލޮޅުންތަކެއް އަރާފައެވެ. ރަޝިއާގެ ސިފައިންނަށް ޔޫކްރެއިންގެ އިރުމަތީގެ ޑޮންބާސް ސަރަހައްދު އެއްކޮށް ހިފިފައި ނުވާއިރު، މިހާރު ރަޝިއާގެ ބާރުގެ ދަށުގައި އޮތީ ޔޫކްރެއިންގެ ފަސްބައިކުޅަ އެއްބަޔަށްވުރެ ކުޑަ ސަރަހައްދެކެވެ.
އެމެރިކާގެ ރައީސް ޑޮނަލްޑް ޓްރަމްޕް މެދުވެރިވެވަޑައިގެން ހޮނިހިރު ދުވަހުން ފެށިގެން ހޯމަ ދުވަހުގެ ނިޔަލަށް އިއުލާންކުރި ހަނގުރާމަ ހުއްޓާލުމުގެ އެއްބަސްވުމަށް މޮސްކޯ އާއި ކީވްއިން ވަނީ ތާއީދުކޮށްފައެވެ. މީގެ އިތުރުން ދެގައުމުގެ ދެމެދުގައި 1000 އަސީރުން ބަދަލުކުރުމަށްވެސް ވަނީ އެއްބަސްވެފައެވެ.
