މިއަދުގެ ފަތިހުން ފެށިގެން ރަޝިއާއިން ޔޫކްރެއިނަށް ހަމަލާ ދެމުން އަންނައިރު އެ ދެ ގައުމުގެ ބޯޑަރާ ކައިރީގައި އޮންނަ ޔޫކްރެއިންގެ ސިޓީއެއް ކަމަށްވާ ކާކީވްގައި މިވަގުތު ތިބީ ފަސް ދިވެހިން ކަމަށާއި އެ ދަރިވަރުން ތިބީ ރައްކާތެރި ހިސާބެއްގައި ކަމަށް ފޮރިން މިނިސްޓްރީން ބުނެފި އެވެ.
ކިޔެވް އާއި އެހެން ސިޓީތަކުގައި ބޮޑެތި ގޮވުންތަކުގެ އަޑު އިވެމުންދާ އިރު، އޭގެ ކުޑައިރުކޮޅެއް ކުރިން ރަޝިއާގެ ރައީސް ލެޑިމިއަ ޕުޓިން ވަނީ ޔޫކްރެއިންގައި އަސްކަރީ އޮޕަރޭޝަނެއް ފެށިކަން އިއުލާނު ކުރައްވައިފަ އެވެ.
ޔޫކްރެއިންގައި 50 އަށްވުރެ ގިނަ ދިވެހިން ދިރިއުޅެމުން ދިޔައިރު އޭގެ ތެރެއިން ގިނަ ދަރިވަރުން ދިރުއުޅުނީ ކާކީވްގަ އެވެ. އެގޮތުން، 35 ދަރިވަރުން އެ ސިޓީގައި ދިރިއުޅެމުންދިޔައިރު ހަނގުރާމަ ފެށުމާ ހަމަޔަށް އެހެން ސަރަހައްދަކަށް ބަދަލުނުވެވުނީ ފަސް ދަރިވަރުންނަށެވެ.
އެ ފަސް ދަރިވަރުން ވެސް ތިބީ ރައްކާތެރި ހިސާބެއްގައި ކަމަށާޢި އެ މިނިސްޓްރީ އާއި ޖަރުމަނުގައި ހުންނަ ރާއްޖޭގެ އެމްބަސީން އެ މީހުންނާ ވާހަކަ ދައްކަމުންދާ ކަމަށް ފޮރިން މިނިސްޓްރީން ބުންޏެވެ. އަދި، އެހީތެރިކަން ވެސް ފޯރުކޮށްދެމުންދާ ކަމަށް ފޮރިން މިނިސްޓްރީން ބުންޏެވެ.
ހަމއެހެންމެ، އިރުމަތީ ޔޫކްރެއިންގައި އޮންނަ އިވާނޯ-ފްރެންކްވިސްކް ސިޓީގައި ވެސް 14 ދަރިވަރުން ތިބި ކަމަށާއި އެ ދަރިވަރުން ވެސް ތިބީ ސަލާމަތުން ކަމަށް އެ މިނިސްޓްރީން ބުންޏެވެ. އަދި، އިތުރު އެއް ދަރިވަރަކު އެހެން ސިޓީއެއްގައި ހުރި ކަމަށާއި އޭނާއާ ވެސް ވާހަކަ ދައްކަމުންދާ ކަމަށް އެ މިނިސްޓްރީން މިއަދު ހާމަކުރި އެވެ.
ހާލަތު ބަދަލުވަމުންދާ ގޮތަށް ބަލައި އެންމެ ފަހުގެ މައުލޫމާތު ހިއްސާކުރާނެ ކަމުގެ ޔަގީންކަން ވެސް ފޮރިން މިނިސްޓްރީން ވަނީ ދީފަ އެވެ.
ޔޫކްރެއިންގައި ތިބި ދިވެހި ދަރިވަރުން އަނބުރާ ރާއްޖެ ގެނައުމަށް ރައީސް އިބްރާހިމް މުހައްމަދު ސޯލިހު އޮތީ އަންގަވާފަ އެވެ.
ފޮރިން މިނިސްޓްރީގެ މީޑިއާ އޮފިޝަލް މިއުވާން މުހައްމަދު "އަދަދު" އަށް ވިދާޅުވީ ޔޫކްރެއިނުގައި ތިބި ދިވެހިން ގެނައުމުގެ މަސައްކަތް ކުރަމުން އަންނަ ކަމަށެވެ.
ޔޫކްރެއިނުން ވަނީ އެ ގައުމުގެ ވައިގެ ސަރަހައްދު އާއްމު ދަތުރުތަކަށް ބަންދުކޮށްފަ އެވެ. ފޮރިން މިނިސްޓަރު ޑިމިޓްރޯ ކުބެލާ ކުރެއްވި ޓްވީޓެއްގައި ވިދާޅުވީ ގައުމަށް ކުރިމަތިވެފައި ވަނީ "އެންމެ ފުރިހަމަ ސްކޭލްގެ ހަމަލާއެއް" ކަމަށެވެ.
