އެމްއެމްޕީއާރްސީގެ ބޮޑު ހިޔާނާތް ތަހުގީގުކުރަން ގްރާންޓް ތޯންޓަން އިންޓަނޭޝަނަލް އާ ހަވާލުނުކުރާތީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަނެއްކާވެސް ކަންބޮޑުވުން ފާޅުކުރައްވައިފި އެވެ.
ނަޝީދު މިއަދު ކުރެއްވި ޓްވީޓެއްގައި ވިދާޅުވީ އެމްއެމްޕީއާރްސީގެ މައްސަލަތައް ތަހުގީގުކުރަން ބޭރުގެ ފޮރެންސިކް އޮޑިޓަރުންނާ ހަވާލުކުރަން އެމަނިކުފާނު ވަރަށް ބޮޑަށް އެދިވަޑައިގެންފައިވާނެ ކަމަށެވެ.
މައްސަލަތައް ރަނގަޅަށް ތަހުގީގުކޮށް އެކަށީގެންވާ ދައުވާ ނުއުފުލޭ ނަމަ ދައުލަތް ފެއިލްވާނެ ކަމަށް ވެސް އެމަނިކުފާނު ވިދާޅުވި އެވެ.
ޓްވީޓްގައި ސީދާ ގްރާންޓް ތޯންޓަންގެ ނަން ނުގެންނެވިޔަސް، އެމްއެމްޕީއާރްސީ ހިޔާނާތުގެ މައްސަލަ ބަލަން ހަވާލުކުރަންވީ ބޭރުގެ ފޮރެންސިކް އޮޑިޓަރުންގެ ގޮތުގައި އެމަނިކުފާނު މީގެ ކުރިން އެތައް ފަހަރަކު ދައްކަވާފައި ވަނީ ގްރާންޓް ތޯންޓަންގެ ވާހަކަ އެވެ.
މިދިޔަ އަހަރުގެ މޭމަހުގެ ހަވަނަ ދުވަހު، އެމަނިކުފާނު އަވަހާރަކޮށްލަން ހަމަލާ ދިނުމުގެ ކުރިން އެދުވަހު ބޭއްވި މީޑިއާ ބްރީފިން އެއްގައި ވިދާޅުވީ އެމްއެެމްޕީއާރްސީގެ ހިޔާނާތުގައި ދައުލަތަށް ގެއްލުނު ފައިސާތައް ހޯދައިދޭން ގްރާންޓް ތޯންޓަން އިން މިހާރުވެސް ބައެއް މަސައްކަތްތައް ކޮށްދީފައިވާ ކަމަށެވެ.
އެމްޑީޕީގެ އޮފީހުގައި އެދުވަހު ބޭއްވި މީޑިއާ ބްރީފިންގައި ނަޝީދު ވިދާޅުވީ، އެމްއެމްޕީއާރުސީ ހިޔާނާތާ ގުޅޭ މައުލޫމާތުތައް އެ މަނިކުފާނަށް ލިބިވަޑައިގަންނަވަން ފެށުމުން ގްރާންޓް ތޯންޓަން އާ އެ މައުލޫމާތު ހިއްސާ ކުރައްވާފައިވާނެ ކަަމަށެވެ.
"އަދި އެ ކުންފުނިން އަޅުގަނޑަށް ކޮންމެވެސް ވަރަކަށް އެ މަަސައްކަތް ކޮށްދެއްވި. އެ ކޮށްދެއްވި މަސައްކަތް ވާނީ ބަންޑާރަ ނައިބު އޮފީހަށް އަޅުގަނޑު ފޮނުވާފައި،" އެ ނަޝީދު އެދުވަހު ވިދާޅުވި އެވެ.
ގްރާންޓް ތޯންޓަން އިންޓަނޭޝަނަލް އަކީ އިނގިރޭސިި ވިލާތުގައި މަރުކަޒު ކޮށްފައިވާ ބައިނަލްއަގުވާމީ އެކައުންޓިން އަދި ކޮންސަލްޓިން ފާމެކެވެ.
އެމްޑީޕީގެ ފުރަތަމަ ވެރިކަމުގައި ނަޝީދު ރާއްޖޭގެ ރައީސް ކަމުގައި ހުންނެވި އިރު، އޭގެ ކުރީގެ ސަރުކާރުގައި އެސްޓީއޯ އިން ހިންގާފައިވާ ކަމަށް ތުހުމަތުކުރެވޭ 800 މިލިއަން ޑޮލަރުގެ ތެލުގެ ވަގު ވިޔަފާރީގެ މައްސަލަ ބަލަަން ހަވާލުކުރީ ވެސް އެކުންފުންޏާ އެވެ.
އެކަމުގައި ބޮޑު ތުހުމަތެއް އޮތީ ކުރީގެ ރައީސް އަބްދުﷲ ޔާމީނަށެވެ. ކުރީގެ ރައީސް މައުމޫނުގެ ދުވަސްވަރު ޓްރޭޑް މިނިސްޓަރަކަށް ހުންނެވީ ޔާމީނެވެ.
