ކުރު ފިލްމު އުފެއްދުމަށް ޝައުގުވެރިކަން އެބަ ހުރި ހެއްޔެވެ؟ ޝައުގު ހުރި ނަމަ ހުނަރު ދައްކާލުމަށް، އަދި ފައިސާގެ ރަނގަޅު އިނާމުތަކެއް ހޯދަން މީޑިއާނެޓުން މި ވަނީ ރަނގަޅުގެ ފުރުސަތެއް ހުޅުވާލައިފަ އެވެ.
"އެމްއެސް ޝޯޓް މޫވީ ޗެލެންޖު" ގެ ނަމުގައި ތައާރަފުކުރި ކުރު ފިލްމު މުބާރާތުގެ އެއް ވަނަ އިނާމަކީ 100،000ރ. އެވެ. ދެ ވަނަ އަށް ހޮވޭ ފިލްމަކަށް 50،000ރ. އަދި ތިން ވަނަ އަށް 30،000ރ. އެވެ. މިއީ ރާއްޖޭގައި ކުރު ފިލްމު މުބާރާތަކަށް ހުށަހަޅާފައިވާ އެންމެ އަގުބޮޑު އިނާމެވެ.
މުބާރާތުގެ ގަދަ ތިނަކަށް ހޮވޭ ފިލްމުތައް އުފެއްދި ފަރާތްތަކަށް މީޑިއާނެޓާ ގުޅިގެން އިތުރު ފިލްމު، ސީރީޒް، އަދި އެކި ބާވަތުގެ ކޮންޓެންޓު އުފެއްދުމުގެ ފުރުސަތު ވެސް ލިބޭނެ އެވެ.
މީޑިއާނެޓުން ބުނި ގޮތުގައި މި މުބާރާތުގެ މަގުސަދަކީ ޒުވާން ހުނަރުވެރިންނަށް ފިލްމު ހެދުމަށް ފުރުސަތު ދިނުމެވެ. އަދި އަމާޒަކީ މީޑިއާނެޓުގެ ޕްލެޓްފޯމް މެދުވެރިކޮށް ދިވެހި އަމިއްލަ އުފެއްދުންތައް ބެލުންތެރިންނަށް ގެނެސްދިނުމެވެ.
މި މުބާރާތުގެ ގަވާއިދުގައި ބުނެފައިވާ ގޮތުން މިއީ ދިވެހިންނަށް ހުޅުވާލާފައިވާ ފުރުސަތެކެވެ.
މުބާރާތުގައި ބައިވެރިވުމުގެ ފޯމް ms@medianet.com.mv އަށް މެއިލްކުރުމުން މުބާރާތުގައި ބައިވެރިވެވޭނެ އެވެ. މުބާރާތުގައި ބައިވެރިވުމުގެ ސުންގަޑި އަކީ މާޗު 3 ގެ 17:00 އެވެ. އަދި މާޗް 25 ވަނަ ދުވަހުގެ 17:00 ގެ ކުރިން ފިލްމާއި، އެއާ ގުޅޭ ލިޔެކިޔުންތައް ހުށަހަޅަން ޖެހެ އެވެ.
ހުށަހަޅާ ފިލްމުތަކުގެ ޝަރުތު
- 40 މިނެޓަށް ވުރެ ފިލްމް ދިގުނުވުން
- ވީޑިއޯ 1080ޕީ 50އެފްޕީއެސް ގެ ރިޒޮލިއުޝަނަށްވުން
- ސިޔާސީ ނުވަތަ ދީނާ ދެކޮޅު ނޫން ކޮންމެ ވައްތަރެއްގެ ފިލްމަކަށްވުން
މުބާރާތަށް ހުށަހަޅާ ފިލްމުތައް މީޑިއާނެޓުގެ ވީއޯޑީ ޕްލެޓްފޯމް، އެމްއެސް އަށް ލާނެ އެވެ. ވަނަ ހޮވާނީ ފަނޑިޔާރުންގެ މާކްސް އާއި އެމްއެސްއިން ބަލާ ޔުނީކް ވިއުސް ހިމަނައިގެންނެ އެވެ. މުބާރާތުގައި ބައިވެރިކުރާ ފިލްމުތައް އެމްއެސްއިން އިން ބަލާ މިންވަރު ގުނާނީ އޭޕްރީލް 2 އިން މެއި 2 ގެ ނިޔަލަށެވެ.
