އިންސާނީ ބޮޑު ކާރިސާއެއް ކުރިމަތިވެފައިވާ އަފްގާނިސްތާނުގެ ރައްޔިތުންނަށް އެހީވުމަށް އިންޑިއާއިން 2،500 ޓަނުގެ ގޮދަން ފުށް ބަރުކޮށްފައިވާ 50 ޓްރަކް އަފްގާނިސްތާނަށް ފޮނުވައިފި އެވެ.
އޮފިޝަލުން ބުނީ ގޮދަން ފުށުގެ ޝިޕްމަންޓް، ޕާކިސްތާން ހުރަސްކޮށް، އަފްގާނިސްތާނަށް އެތެރެ ކުރަން ހާއްސަ ހުއްދައެއް ޕާކިސްތާން ސަރުކާރުން ފޯރުކޮށްދިން ކަމަށެވެ.
މިދިޔަ އޯގަސްޓް މަހު ތާލިބާނުން ވެރިކަމަށް އައުމާ އެކު ހުޅަނގުގެ ގައުމުތަކުން އަފްގާނިސްތާނަށް ފޯރުކޮށްދެމުން ދިޔަ އެހީ ކުއްލިއަކަށް މެދުކަނޑާލި އެވެ.
އެއާއެކު ބޮޑު އިންސާނީ ކާރިސާއެއް ކުރިމަތިވެ، 28 މިލިއަން މީހުންގެ 50 ޕަސެންޓަށް ކާބޯތަކެތީގެ ދަތިކަމާ ކުރިމަތިވެފައިވާ ކަމަށް އދ. އިން ލަފާކުރެ އެވެ.
އދ. ގެ އެދުމުގެ މަތިން އިންޑިއާއިން ނިންމީ ޖުމްލަ 5،000 ޓަނުގެ ގޮދަން ފުށް އަފްގާނިސްތާނަށް ހަދިޔާ ކުރުމަށެވެ. އެގޮތުން ފުރަތަމަ އުޅަނދުތައް ދަތުރު ފެށީ އަންގާރަ ދުވަހު އެވެ.
އޭގެ އިތުރުން ވެސް އިންޑިއާއިން ވަނީ 500،000 ކޮވިޑް ވެކްސިން ޑޯޒާއި، 13 ޓަނުގެ ބޭހާއި، ފިނި މޫސުމަށް ބޭނުންވާ އަންނައުނު ވެސް ހަދިޔާކޮށްފަ އެވެ.
އަފްގާނިސްތާނުން އިންޑިއާއަށް ކަނޑައަޅާފައި ހުންނަ ސަފީރު ފަރީދް މަމުންދްޒޭ ކުރި ޓްވީޓެއްގައި ބުނީ އިންޑިއާގެ މި އެހީއަކީ މި ދަނޑިވަޅު އެ ގައުމަށް ލިބުނު އެންމެ ބޮޑު ކާބޯތަކެތީގެ އެހީ ކަމަށެވެ.
