އިސްތަންބޫލް، ތުރުކީ (ފެބްރުއަރީ 23) - ޔޫކްރެއިންގެ އިސްތިގްލާލަށް ހުރަސް އެޅޭ ކަމަށް ބަލައިނުގަންނާނެ ކަމަށް ތުރުކީގެ ރައީސް ތައްޔިބް އުރުދުގާން، ރަޝިއާގެ ރައީސް ލެޑިމިއަ ޕުޓިންއަށް ފޯނުން ގުޅުއްވައި ވިދާޅުވެއްޖެ އެވެ.
"ޔޫކްރެއިންގެ އިސްތިގްލާލާއި ސަރަހައްދީ ހަމަޖެހުން ގެއްލޭ ފަދަ އެއްވެސް ފިޔަވަޅެއް" ތުރުކީން ބަލައިނުގަންނާނެ ކަމަށް އުރުދުގާން ވިދާޅުވި އެވެ.
ޕުޓިން ވަނީ އިރުމަތީ ޔޫކްރެއިންގެ ދެ ސަރަހައްދެއް މިނިވަން ދައުލަތްތަކެއްގެ ގޮތުގައި އިއުލާނު ކުރެއްވުމަށް ފަހު، ސުލްހަ ބެލެހެއްޓުމުގެ ނަމުގައި ރަޝިއާގެ ސިފައިން އެ ދެ ތަނަށް ފޮނުއްވާފަ އެވެ. ރައްދުގައި ހުޅަނގުން ވަނީ ގިނަ ފިޔަވަޅުތަކެއް ރަޝިއާއާ ދެކޮޅަށް އަޅާފަ އެވެ.
ތުރުކީއަކީ ވެސް އެމެރިކާ އިސްވެ ހިންގާ ނޭޓޯ އަސްކަރީ ކޯލިޝަނުގެ މެމްބަރެއް ނަމަވެސް، ތުރުކީއިން ގެންގުޅެނީ ޔޫކްރެއިނާއި ރަޝިއާއާ އެކު ވެސް ގާތް ގުޅުމެކެވެ. ތުރުކީން ބޭނުން ވަނީ މައްސަލަ ހައްލު ކުރަން އެހީވާ މެދުވެރިއެއްގެ ދައުރު އަދާ ކުރުމަށެވެ.
ތުރުކީގެ ރައީސް އޮފީހުން ބުނީ އަސްކަރީ ހަމަނުޖެހުމެއް ފަށައިފި ނަމަ އެއްވެސް ބަޔަކަށް ފައިދާ ނުވާނެ ކަމަށް އުރުދުގާން، ޕުޓިންއަށް ދެންނެވި ކަމަށެވެ. ތުރުކީއިން ހިތްވަރު ދޭނީ ޑިޕްލޮމެސީ އާއި މަޝްވަރާ ކުރިއަށް ނެރުމަށް ކަމަށް ވެސް އުރުދުގާން ވިދާޅުވި އެވެ.
"ހަމަނުޖެހުން ކުޑަކޮށް، ސުލްހަ ދަމަހައްޓަން ކުރެވެން ހުރި ހުރިހާ ކަމެއް ކުރަން ތުރުކީން އޮތީ ތައްޔާރަށް" ކަމަށް އުރުދުގާން ވިދާޅުވި އެވެ.
ޔޫކްރެއިން މަޝްރަހް ގޯސްވުމުން އުރުދުގާން ވަނީ އެފްރިކާއަށް ކުރައްވަމުން ދިޔަ ދަތުރު ކުރު ކުރެއްވުމަށް ފަހު އެނބުރި ގައުމަށް ވަޑައިގެންފަ އެވެ.
ގައުމަށް އެނބުރި ވަޑައިގަންނަވަމުން ފްލައިޓްގައި އުރުދުގާން ނޫސްވެރިންނަށް ވިދާޅުވީ މި ހަމަނުޖެހުމުގައި ވަކި ގައުމެއް އިހްތިޔާރު ކުރަން ބޭނުން ނުވާ ކަމަށެވެ.
"ރަޝިއާ އާއި އަޅުގަނޑުމެންނާ ދެމެދު ސިޔާސީ އަދި އަސްކަރީ ގުޅުން އެބަ އޮތް. ހަމަ އެގޮތަށް ޔޫކްރެއިން އާއި އަޅުގަނޑުމެންނާ ދެމެދު ވެސް ސިޔާސީ، އަސްކަރީ އަދި އިގްތިސާދީ ގުޅުން އެބަ އޮތް."
"އަޅުގަނޑުމެން އެދެނީ ވަކި ގައުމެއް އިހްތިޔާރު ކުރަން ނުޖެހި މި މައްސަލަ ހައްލުވުން."
އުރުދުގާން ވަނީ އެމަނިކުފާނާއި ޕުޓިން އަދި ޔޫކްރެއިންގެ ރައީސް ވޮލޮޑިމިރް ޒެލެންސްކީ ބައިވެރިވެވަޑައިގަންނަވާ ސަމިޓެއް ތުރުކީގައި ބާއްވަން ހުށަހަޅުއްވާފަ އެވެ.
