ޖަލުގައި ތިބެގެން ހާއްސަ ޑޮކްޓަރުންނަށް ދެއްކޭނެ އިންތިޒާމް ހަމަޖެއްސުމަށް މޯލްޑިވްސް ކަރެކްޝަނަލް ސާވިސް (އެމްސީއެސް)އާ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އާ އެކެ އެއްބަސްވުމެއްގައި މިއަދު ސޮއިކޮށްފި އެވެ.
އެ އެއްބަސްވުމުގައި ކަރެކްޝަންގެ ފަރާތުން ސޮއިކުރެއްވީ ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅެވެ. އަދި އައިޖީއެމްއެޗްގެ ފަރާތުން ސޮއިކުރެއްވީ ޗީފް އޮޕަރޭޓިންގް އޮފިސަރު އިބްރާހިމް ސަލީމެވެ.
އެއް އަހަރު ދުވަހުގެ މުއްދަތަށް އެއްބަސްވި އެ އެއްބަސްވުމުގައި ކަރެކްޝަންގެ ބެލުމުގެ ދަށުގައިވާ ގައިދީންނާއި ބަންދުމީހުން ސްޕެޝަލިސްޓް މެދުވަރިކޮށް ބޭސްފަރުވާ ފޯރުކޮށްދިނުމުގެ އިންތިޒާމް ހަމަޖެހިގެންދާނެ އެވެ.
ކަރެކްޝަނުން ބުނީ ގައިދީންނާއި ބަންދުމީހުންނަށް ސިއްހީ ފަރުވާ ފޯރުކޮށްދިނުމުގެ ގޮތުން، އެ ފަރާތްތައް އެއްތަނުން އަނެއްތަނަށް އުފުލުމަކީ ތަކުލީފާއި ހަރަދު ބޮޑު ކަމައް ކަމަށެވެ.
"މިފަދަ އެއްބަސްވުމެއްގައި ސޮއިކުރުމުގެ މަގްސަދަކީ ގައިދީންނާއި ބަންދުމީހުންގެ ތެރެއިން އާންމު ނޫން ބަލިތަކަށާއި އުނދަގޫތަކަށް، އެ ކަމާ ގުޅުންހުރި ސްޕެލިސްޓުން މެދުވެރިކޮށް ޖަލުގައި ބައިތިއްބައިގެން ފަސޭހަކަމާއެކު ސިއްޙީ ފަރުވާ ފޯރުކޮށްދިނުން،" ކަރެކްޝަނުން ބުންޏެވެ.
އެ އެއްބަސްވުމާއެކު ކުރު މުއްދަތަކަށް އައިޖީއެމްއެޗްގެ ފަރާތުން ޖަލުތަކަށް ސުޕާ ސްޕެޝަލިސްޓުންނާއި ސްޕެޝަލިސްޓުންނާއި ނަރުހުންގެ އިތުރުން އެހެނިހެން ޓެކްނިކަލް މުވައްޒަފުން ފޮނުވައި، ފަހަރަކު މަދުވެގެން 20 މީހުންނަށް ސިއްހީ ހިދުމަތް ފޯރުކޮށްދެވޭނެ ކަމަށް ކަރެކްޝަނުން ބުންޏެވެ.
މީގެ އިތުރުން މިފަދަ އިންތިޒާމެއް ހަމަޖެހިގެން ދިއުމަކީ ގައިދީންނާއި ބަންދުމީހުންނަށް ބޭސް ފަރުވާ ފޯރުކޮށްދިނުމަށް ލިބޭ ވަރަށް ބޮޑު ލުއިފަސޭހައެއް ކަމަށާއި ކޮވިޑްގެ މި ހާލަތުގައި ކަރެކްޝަންގެ އަމާޒަކީ ގައިދީންނާއި ބަންދުމީހުންނަށް ވީހާވެސް ރައްކާތެރިކަމާއެކު ބޭސް ފަރުވާ ފޯރުކޮށްދިނުން ކަމަށް ވެސް ބުންޏެވެ.
ވަކި ބަލިތަކަށް ހާއްސަ ޑޮކްޓަރުން ގައިދީންނަށް ހަމަޖެއްސުމަށް އެއްބަސްވެފައި ވާއިރު މިއީ ގިނަ ގައިދީންގެ ޝަކުވާއަކަށްވެސް ވެފައިވާ މައްސަލައެކެވެ. ބަންދުގައި ބައިތިއްބާ ބައެއް ގައިދީންނަށް ހާއްސް ޑޮކްޓަރުން ހަމަނުޖެހުމުން ދޫވެސްކޮށްލަ އެވެ.
