ކޮވިޑް ނިމިއްޖެ ކަމަށާއި ތައުލީމީ ނިޒާމު ކުރީގައި އޮތް ގޮތަށް އަނބުރާ ރުޖޫއަވާން ޖެހޭކަމަށް ރައްޔިތުންގެ މަޖިލީހުން ސަރުކާރަށް ދަންނަވަން ޖެހޭ ކަަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ އެމްޑީޕީ މެމްބަރު އަލީ އާޒިމް މިއަދު ވިދާލުޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ހުށަހެޅުއްވި ގަރާރަކަށް ބަހުސްކުރައްވަމުން އާޒިމް ވިދާޅުވީ ތައުލީމީ ދާއިރާއަށް މިހާރު އެޅިފައި އޮތް އެންމެ ބޮޑު ހުރަހަކީ ކޮވިޑް-19 ކޮންޓްރޯލްކުރަން އަޅާފައިވާ ފިޔަވަޅުތައް ކަަމަށެވެ. ތައުލީމަށް ހުރަހެއް އެޅުމަކީ ރައްޔިތުންގެ މަޖިލީހުގެ އެއްވެސް މެމްބަރަކު ގަބޫލުކުރާނެ ކަމެއް ނޫން ކަމަށެވެ.
"ތައުލިމަށް މިވަގުތު، އަޅުގަނޑު ދެކޭ ގޮތުގައި އެޅޭ އެންމެ ބޮޑު ހުރަކީ ކޮވިޑްގެ ހުރަސް. އަަޅުގަނޑުމެން އެ ހުރަހުން އަރައިގަންނަން އެބަ ޖެހޭ،" އާޒިމް ވިދާޅުވި އެވެ.
ކޮވިޑް ފެތުރެން ފެށުމާ އެކު ރާއްޖޭގައި އިއުލާނުކުރި ސިއްހީ ކުއްލި ނުރައްކަލުގެ ހާލަތު އަދިވެސް އުވައެއް ނުލަ އެވެ. އެއީ "ބޮޑް ޖޯކެއް" ކަމަށް އާޒިމް ސިފަކުރެއްވި އެވެ.
ކުއްލި ނުރައްކަލުގެ ހާލަތުގެ ސަބަބުން އެތައް ގާނޫނުތަކެއް ސަސްޕެންޑްވެފައި އެބަހުރި ކަމަށް ވިދާޅުވެ، ކަންބޮޑުވުން ފާޅުކުރައްވަމުން އާޒިމް ސުވާލުކުރެއްވީ މިހާ ދިގުމުއްދަތަކަށް ކުއްލި ނުރައްކަލުގެ ހާލަތު ދެމެހެއްޓި އެހެން ގައުމެއް އެބަ އޮތްތޯ އެވެ. ކޮވިޑް ކޮންޓްރޯލްކުރަން ރާއްޖޭގައި މިހާރު އަޅާފައިވާ ފިޔަވަޅުތަކަކީ "މާފިޔާ ވިޔަފާރިއެއް" ކަމަށް ވެސް އޭނާ ސިފަކުރެއްވި އެވެ.
"ކޮވިޑްގެ މި މާފިޔާ ވިޔަފާރީގެ ސަބަބުން އަޅުގަނޑުމެންގެ ދަރިވަރުންނަށް މި އެޅިފައިވާ ހުރަސް މިހާރު އެބަ ޖެހޭ ސަރުކާރުން ނައްތައިލަން،" އާޒިމް ވިދާޅުވި އެވެ.
ރާއްޖޭގެ އާބާދީގެ 80 ޕަސެންޓް މީހުންނަށް މިހާރު ކޮވިޑްގެ ވެކްސިނުގެ ދެޑޯޒް ދެވިއްޖެކަމަށާއި ބޫސްޓާ ޑޯޒް ވެސް (ގިނަ ބަޔަކަށް) ދެވިއްޖެ ކަމަށާއި އެހެންވީމާ މާސްކް އެެޅުން މިހާރު ހުއްޓައިލަން ޖެހޭ ކަމަށް ވެސް އޭނާ ވިދާޅުވި އެވެ. ދުނިޔޭގެ އެހެން ބައެއް ގައުމުތަކުގައި ކޮވިޑަކީ އާދައިގެ ރޯގާއެއް ކަމަށް އިއުލާނުކޮށްފައިވާ ކަމަށް ވެސް އޭނާ ވިދާޅުވި އެވެ.
"މި މަޖިލީހުން އެބަ ޖެހޭ ސަރުކާރަށް ގޮވައިލަން، ސަރުކާރަށް ދަންނަވަން މިހާރު ދެން ކޮވިޑް ނިމިއްޖޭ،" އާޒިމް ވިދާޅުވި އެވެ.
ކުރީގެ ދިރިއުޅުމަށް އަނބުރާ ރުޖޫއަވާން ޖެހިއްޖެ ކަމަށާއި ތައުލީމީ ނިޒާމު ކުރީގެ ހާލަތަށް އިއާދަކުރަން ޖެހިއްޖެ ކަމަށް ވެސް މަޖިލީހުން ސަރުކާރަށް ދަންނަވަން ޖެހޭ ކަމަށް އޭނާ ވިދާޅުވި އެވެ.
ކޮވިޑްގެ ބަލިމަޑުކަން ކޮންޓްރޯލްކުރަން ރާއްޖޭގައި ފުރަތަމަ އެޅި ފިޔަވަޅުތަކުގެ ތެރެއިން ގިނަ ފިޔަވަޅުތަކެއް މިހާރު ވަނީ އުވައިލައިފަ އެވެ. އެހެން ނަމަވެސް އެބައްޔަށް މީހުން ޓެސްޓްކޮށް ޕޮޒިޓިވްވާ މީހުން ކަރަންޓީނު ކުރުމާއި މާސްކް އެޅުން ފަދަ ފިޔަވަޅުތައް އަދިވެސް އުވައިނުލަ އެވެ.
