ލަންޑަން (ފެބްރުއަރީ 23) - ޗެމްޕިއަންސް ލީގުގެ ދެ ވަނަ ބުރުގައި ރޭ ކުޅުނު މެޗުތަކުގައި ޔުވެންޓަސް އާއި ވިޔަރެއާލް 1-1 އިން އެއްވަރުވިއިރު، އެންމެ ފަހުގެ ޗެމްޕިއަން ޗެލްސީން 2-0 އިން ލިލް ބަލިކޮށް މެޗުގެ ކޮންޓްރޯލް ނަގައިފި އެވެ.
ވިޔަރެއާލް ދަނޑުގައި ރޭ ކުޅުނު މެޗު ފަށައިގެން 32 ވަނަ ސިކުންތުގައި ޔުވެންޓަސްގެ ފޯވާޑް ޑޫސާން ވްލަހޯވިޗް ވަނީ އެ ޓީމަށް ލީޑުނަަގައިދީފަ އެވެ. މިއީ މިދިޔަ މަހު ބޮޑު އަގުގައި ޔުވެންޓަސްއާ ގުޅުނު ވްލަހޯވިޗް ޗެމްޕިއަންސް ލީގުގައި ކުޅުނު ފުރަތަމަ މެޗެެވެ. އޭނާ މި ގޯލު ޖެހީ ޑަނީލޯ ނަގައިިދިން ބޯޅައެއް މެއިން ކޮންޓްރޯލް ކުރުމަށް ފަހު ތިރިތިރިން ގޯލަށް ފޮނުވާލައިގެންނެވެ.
މެޗުގެ 12 ވަނަ މިނިޓްގައި ވިޔަރެއާލަށް އެއްވަރުކޮށްދޭން ޖިއޮވާނީ ލޮ ސެލްސޯ އަށް ލިބުނު ފުރުސަތުގެ ބޭނުމެއް ނުހިފުނެވެ. އޭގެ ތިން މިނިޓް ފަހުން ވިޔަރެއާލްގެ އާނޯޓް ޑަންޖޫމާ ޖެހި ބޯޅަ ޔުވެންޓަސް ކީޕަރު ވޮޒްޝިއޭ ޝެޒްނީ ވަނީ މަތަކޮށްފަ އެވެ. ދެ ވަނަ ހާފްގެ ކުޅުން ފެށިގެން ޔުވެންޓަސްގެ ލީޑުފުޅާކޮށްދޭން އަލްވާރޯ މޮރާޓާ ޖެހި ޝޮޓް ދިޔައީ އަރިމަތިން ބޭރުންނެވެ.
ވްލަހޯވިޗް (ވ) ބޯޅަ ކޮންޓްރޯލް ކޮށްލުމަށް ފަހު ގޯލުގެ ދުރު ކަނަށް ބޯޅަ ފޮނުވާލަނީ.
ވިޔަރެއާލަށް އެއްވަރުކޮށްދިނީ މެޗުގެ 65 ވަނަ މިނިޓްގައި ޑަނީ ޕަރޭހޯ އެވެ. އެޓިއެން ކަޕޫ ހުސްކޮށްލާފައި އޭރިއާތެރެއިން ޕަރޭހޯ އަށް ދިން ބޯޅަ އޭނާ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ. އަލުން ޔުވެންޓަސް އަށް ލީޑުނަގައިދޭން ވްލަހޯވިޗް ފޮނުވާލި ހަމަލާ ހުއްޓުވީ ވިޔަރެއާލް ކީޕަރު ޖެރޮނީމޯ ރޫލީ އެވެ.
ޗެލްސީން ރޭ އަމިއްލަ ދަނޑުގައި ކުޅުުނު މެޗުގެ އަށް ވަނަ މިނިޓްގައި ލީޑުނެގީ ކައި ހަވާޓްޒް ޖެހި ގޯލުންނެވެ. ރޮމެލޫ ލުކާކޫ ބެންޗުގައި ބައިންދައިގެން ފެށި މި މެޗުގައި ހަވާޓްޒް ލީޑުނަގައިދިން ލަނޑު ޖަހައިދިނީ ހަކީމް ޒިޔެޗް ނެގި ކޯނަރަކުން ބޮލުންނެވެ. މި ގޯލުގެ ކުރިން ހަވާޓްޒް އަށް ލަނޑު ޖަހާނެ ރަނގަޅު ދެ ފުރުސަތު ލިބި ބޭނުމެއް ނުކުރެވުނެވެ. އެކަމަކު، ތިން ވަނަ ފަަހަރު ލިބުނު ބޯޅަ އޭނާ ވަނީ ގޯލަށް ފޮނުވާލައިފަ އެވެ.
ފުރަތަމަ ހާފުގައި ލިލް އިން އެ ޓީމުގެ ކުރިއަށް ކުޅޭ ޖޮނަތަން ޑޭވިޑަށް ބޯޅަ ދީގެން އެޓޭކެއް ކުރެވޭތޯ ކުރި މަސައްކަތް ކާމިޔާބު ނުވި އެވެ. ޗެލްސީ އަށް ފުރަތަމަ ހާފުގައި ލީޑުފުޅާކޮށްދޭން މާކޯސް އަލޮންސޯ އަށް ލިބުނު ފުރުސަތުން އޭނާ ޖެހި ބޯޅަ އަމާޒުވީ ލިލް ކީޕަރު ލެއޯ ޖާޑިމް އަތަށެވެ.
ޗެލްސީގެ ދެ ވަނަ ގޯލު ޖެހީ މެޗުގެ 63 ވަނަ މިނިޓްގައި ކްރިސްޓިއަން ޕުލިސިޗް އެވެ. ކައުންޓަ އެޓޭކެއްގައި އެންގޯލޯ ކާންޓޭ ހިފައިގެން އައި ބޯޅަ އޭރިއާތެރެއިން ހުސްކޮށްލާފައި ޕުލިސިޗަށް ދިނުމުން އޭނާ ވަނީ ހަމަޖެހިލާފައި ގޯލުގެ ދުރު ކަނަށް ފޮނުވާލައިފަ އެވެ.
ޗެލްސީން ލިލް ދަނޑުގައި ކުޅޭ ދެ ވަނަ ލެގުގެ މެޗާއި ޔުވެންޓަސް އިން އަމިއްލަ ދަނޑުގައި ވިޔަރެއާލާ ކުޅޭ މެޗު އޮންނާނީ އަންނަ މަހުގެ 16 ވަނަ ދުވަހު އެވެ.
