ދުނިޔޭގައި ބޭނުން ކުރާ ޕްލާސްޓިކްގެ 10 ޕަސެންޓް ވެސް ރީސައިކަލް ނުކުރެވޭ ކަމަށް އޯގަނައިޒޭޝަން ފޯ އިކޮނޮމިކް ކޯޕޮރޭޝަން އެންޑް ޑެވެލޮޕްމަންޓްގެ ރިޕޯޓެއްގައި ބުނެފި އެވެ.
އެ ރިޕޯޓުގައިވާ ގޮތުން 2019 ވަނަ އަހަރު 460 މިލިއަން ޓަނުގެ ޕްލާސްޓިކް ބޭނުންކޮށްފައިވެ އެވެ. އެއީ 2000 ވަނަ އަހަރާ އަޅާ ބަލާއިރު ދެ ގުނަ އިތުރު އަދަދެކެވެ.
އެ މުއްދަތުގެ ތެރޭގައި ޕްލާސްޓިކް ކުނީގެ އަދަދު ދެ ގުނައަށް ވުރެ ވެސް މަތިވެ، 353 މިލިއަން ޓަނަށް އަރާފައިވާ ކަމަށް އޯއީސީޑީގެ ހޯދުންތަކުގެ މައްޗަށް ހެދި ރިޕޯޓުގައިވެ އެވެ.
"ޕްލާސްޓިކް ކުނީގެ ތެރެއިން ރީސައިކަލް ކުރަނީ އެންމެ ނުވަ ޕަސެންޓް. ނަވާރަ ޕަސެންޓް އިންސިނެރޭޓް ކުރާއިރު، 50 ޕަސެންޓް ކުނިގޮނޑުތަކަށް އުކާލަނީ،" ގްލޯބަލް ޕްލާސްޓިކްސް އައުޓްލުކް ރިޕޯޓުގައިވެ އެވެ.
"ބާކީ 22 ޕަސެންޓު އަންދަނީ ނުވަތަ ތިމާވެށީގެ ތެރެއަށް ލީކުވަނީ."
ކޮވިޑްގެ ބަލިމަޑުކަމާ ހެދި 2019 ވަނަ އަހަރާ އަޅާ ބަލާއިރު 2020 ވަނަ އަހަރު ބޭނުންކުރި ޕްލާސްޓިކްގެ އަދަދު 2.2 ޕަސެންޓު މަދުވި އެވެ. ނަމަވެސް އެއް ފަހަރު ބޭނުން ކުރާ ޒާތުގެ ޕްލާސްޓިކް އިތުރުވި އެވެ.
ޕްލާސްޓިކް ކުނީގެ މައްސަލަ ހައްލު ކުރުމުގެ ގޮތުން އޯއީސީޑީން ހުށަހަޅަނީ ރީސައިކަލް ކުރާ ޕްލާސްޓިކަށް އޮތް މާކެޓް ފުޅާ ކުރުމަށެވެ.
އޭގެ އިތުރުން ޕްލާސްޓިކުން ތިމާވެއްޓަށް ކުރާ ނޭދެވޭ އަސަރު ކުޑަ ކުރުމަށް އާ އީޖާދުތަކާއި ޓެކްނޮލޮޖީތައް މުހިއްމު ކަމަށާއި ޕްލާސްޓިކް ބޭނުން ކުރުން މަދު ކުރުން ވެސް މުހިއްމު ކަމަށް ފާހަގަކުރި އެވެ.
ދަށް އަދި މެދު ފަންތީގެ އާމްދަނީ ލިބޭ ގައުމުތަކުގައި ކުނި މެނޭޖު ކުރުމުގެ ނިޒާމު ވަރުގަދަ ކުރަން އަހަރަކު 28 ބިލިއަން ޑޮލަރު ހޭދަކުރަން އެ ޖަމިއްޔާއިން ގޮވާލި އެވެ.
