ދުނިޔޭގެ އެންމެ ރީތި އިމާރާތުގެ ގޮތުގައި އިޝްތިހާރު ކުރަމުންދާ ޑުބާއީގެ އާދަޔާ ހިލާފު މިޔުޒިއަމް އޮފް ދަ ފިޔުޗާ އަންގާރަ ދުވަހު އާއްމުކޮށް ހުޅުވާލައިފި އެވެ.
ހަތް ފަންގިފިލާއަށް އަދި ރިހި ކުލައިގެ ބިހެއްގެ ބައްޓަމަށް ހަދާފައިވާ އިމާރާތުގެ ބޭރު ޒީނަތްތެރިކޮށްފައި ވަނީ އަރަބި ކެލިގްރެފީންނެވެ. އެ ޑިޒައިނަށް މުޅިން ވެސް ބޭނުންކޮށްފައު ވަނީ ޑުބާއީގެ ވެރިޔާ ޝެއިހް މުހައްމަދު ބިން ރާޝިދް އަލް މަހްތޫމްގެ ކޯޓޭޝަންތަކެވެ.
އެ މިޔުޒިއަމްގައި އާއްމު ކުރާނެ ތަކެތި މިހާތަނަށް ހާމަކޮށްފައެއް ނުވެ އެވެ. ނަމަވެސް އެ ތަން އިންތިޒާމް ކުރާ ފަރާތުން ބުނީ އެގްޒިބިޓް ކުރާނީ މުސްތަގްބަކުގެ ޑިޒައިނާއި ޓެކްނޮލޮޖީގެ އާ އުފެއްދުންތަައް ކަމަށާއި ޒިޔާރަތް ކުރާ މީހުންނަށް "2071 ވަނަ އަހަރަށް ދަތުރު ކުރެވޭނެ" ކަމަށެވެ.
ދުނިޔޭގެ އެންމެ އުސް އިމާރާތް ބުރްޖް ހަލީފާ ކައިރީގައި ހުންނަ މިޔުޒިއަމް ޕްރޮމޯޓް ކުރަމުން ދަނީ "ދުނިޔޭގެ އެންމެ ރީތި އިމާރާތު"ގެ ގޮތުގަ އެވެ.
ޔޫއޭއީއިން ދަނީ ތެލަށް ބަރޯސާވެފައި އޮތް އިގްތިސާދު އެހެން ސިނާއަތްތަކުން ފުޅާކުރުމަށް މަސައްކަތް ކުރަމުންނެވެ. އެގޮތުން ވިޔަފާރި އާއި ފަތުރުވެރިކަމަށް ބޮޑު އިސްކަމެއް ދެ އެވެ.
އޭގެ އިތުރުން ޖައްވީ ސިނާއަތް ވެސް ފުޅާކޮށް، 2019 ވަނަ އަހަރު ފުރަތަމަ ފަހަރަށް ވަނީ އެސްޓްރޮނޯޓަކު ޖައްވަށް ފޮނުވާފަ އެވެ.
އޭގެ ފަހުން 2021 ވަނަ އަހަރު "އާމަލް" ނުވަތަ އުއްމީދުގެ ނަން ދީފައިވާ ކުޑަ ޖައްވީ އުޅަނދެއް މާސްގެ އޯބިޓަށް ފޮނުވި އެވެ. ޔޫއޭއީއަކީ އެފަދަ ކަމެއް ހާސިލްކުރި ފުރަތަމަ އަރަބި ގައުމެވެ.
