މިދިޔަ މަހުުގެ 10 ވަނަ ދުވަހު ޅ. ކުރެންދޫ ކައުންސިލް ރައީސްގެ މަގާމާއި، އެ އަތޮޅު ކައުންސިލްގެ ނައިބުކަން ކުރައްވަމުން ގެންދެވި އިބްރާހީމް ސިމާއު އިސްތިއުފާ ދެއްވުމާ ގުޅިގެން އެމްޑީޕީގެ ޓިކެޓުގައި އެ ރަށު ރައީސްކަމަށް ވާދަކުރާ ކެންޑިޑޭޓަކު ނެރެފި އެވެ.
އަންނަ މަހުގެ 26 ގައި ބޭއްވުމަށް ނިންމާފައިވާ އެ އިންތިހާބަށް ޝައުގުވެރިވާ ކެންޑިޑޭޓުންގެ ނަން ހުށަހެޅުމަށް ވަގުތު ހުޅުވާލާފައި ވަނީ މާދަމާގެ ތިނެއް ޖެހުމާ ހަމައަށެވެ.
އެހެންވެ އެ މަގާމަށް އެމްޑީޕީއިން ނެރޭނެ ކެންޑިޑޭޓަކު ހޮވުމަށް އެ ޕާޓީގެ އެތެރޭގެ އިންތިހާބަށް ނަން ހުށަހެޅުމަށް ހުޅުވައިލި އެވެ. ނަމަވެސް ސުންގަނޑި ހަމަވުމާ ހަމައަށް އިތުރު ފަރާތެއް ކުރިމަތިލާފައި ނުވާތީ އެޕާޓީގެ ފަރާތުން އެ ރަށު ކަައުންސިލް ރައީސްގެ މަގާމަށް ވާދަކުރުމުގެ ޓިކެޓް ލިބިފައި ވަނީ އަލީ ނަސީމް އަށެވެ.
މިހާރު ކުރެންދޫ ފެނަކަ ބްރާންޗްގެ އެސިސްޓެންޓް މެނޭޖަރުކަން ކުރައްވަމުން ގެންދަވާ ނަސީމް ވަނީ މީގެ ކުރިން ވިލިމާލެއާ، ދަރުމަވަންތަ ހޮސްޕިޓަލުގެ ސެކްޝަނެއްގެ އެޗްއޯޑީއެއްގެ މަގާމުވެސް ފުރުއްވާފަ އެވެ. 2002 ވަނަ އަހަރު އައިޖީއެމްއެޗްއަށް އިލެކްޝަން ޓްރެއިނީއަކަށް ވަދުނު ނަސީމްއަށް އެހާ ހިސާބަށް ދެވުނީ މަގާމުގެ ކުރިއެރުންތަކުގެ ސަބަބުންނެވެ. އޭނާ އެ ހޮސްޕިޓަލުން ވަކިވުމަށްފަހު ރަށަށް ދިރިއުޅުން ބަދަލުވީ މިދިޔަ އަހަރުގެ ތެރޭގަ އެވެ.
ނަސީމްގެ އިތުރުން އެހެން ޕާޓީގެ ކެންޑިޑޭޓެއް އެ ދާއިރާއަށް ޝައުގުވެރިކަން ފާޅުކޮށްފައިވާ ކަމެއް އަދި އެނގިފައި ނުވެ އެވެ. އެއީ އެއްވެސް މީހަކު މީހަތަނަށް އެ މަގާމަށް ވާދަކުރަން އީސީއަށްވެސް ފޯމުލާފައި ނުވާތީ އެވެ.
ކުރެންދޫ ކައުންސިލްގެ ރައީސް އިންތިހާބު ކުރުމަށް ބާއްވާ ބައި-އިލެކްޝަންގެ ވޯޓު ނެގުމަށް ހަމަޖެހިފައި ވަނީ މާޗު 26 ވާ ހޮނިހިރު ދުވަހުގެ 8 އިން 3 އަށެވެ. އިންތިހާބަށް ފަހު، ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ތެރޭގަ އެވެ.
އީސީއިން މައުލޫމާތު ދޭ ގޮތުގައި އެ އިންތިހާބުގެ ރަސްމީ ނަތީޖާ އިއުލާނު ކުރުމަށް ހަމަޖެހިފައި ވަނީ މާޗު 28 ވާ ހޯމަ ދުވަހު އެވެ.
ކުރެންދޫ ކައުންސިލްގައި ހިމެނެނީ މުޅީންވެސް އެމްޑީޕީގެ މެންބަރުންނެވެ. އެ ރަށުގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ފަސް މެންބަރުން ނިސްބަތް ވަނީ ވެސް އެމްޑީޕީއަށެވެ.
އަމިއްލަ ސަބަބުތަކަށްޓަކައި، މާލެއަށް ދިރިއުޅުން ބަދަލު ކުރަން ޖެހުމާއި ގުޅިގެން ސިމާއު އެ މަގާމުން އިސްތިއުފާ ދެއްވިއިރު، އޭނާ ވަނީ މިދިޔަ ދައުރުގައި ވެސް އެ މަގާމު ފުރުއްވާފަ އެވެ. އަދި ނިމިދިޔަ ދައުރުގައި އޭނާއަކީ ޅ. އަތޮޅު ކައުންސިލްގެ ރައީސްކަން ވެސް ފާހަގަކޮށްލެ ވެއެވެ.
