ސިޔާސީ މީހުން ނުތިބޭ ގޮތަށް ޖުޑިޝަލް ސާވިސް ކޮމިޝަން (ޖޭއެސްސީ)ގެ އެކުލެވުން ބަދަލުކުރުމަށްޓަކައި ގާނޫނުއަސާސީއަށް ބަދަލު ގެންނަން ރައްޔިތުންގެ މަޖިލީހުގެ މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގު ހުށަހެޅުއްވި ދެވަނަ ބިލުވެސް މަޖިލީހަށް ބަލައިނުގަނެ ބޭރުކޮށްލައިފި އެވެ.
ޖޭއެސްސީގެ އެކުލެވުން ބަދަލުކުރުމަކީ އެމްޑީޕީގެ ވައުދެއް ކަމަށް ވިޔަސް، ތޯރިގު ހުށަހެޅުއްވި ބިލަށް ތާއީދު ނުކުރައްވައި މިއަދުގެ ޖަލްސާގައި އެމްޑީޕީގެ ބައެއް މެމްބަރުން ވިދާޅުވީ ގާނޫނު އަސާސީއަށް ގެންނަން ޖެހޭ ގިނަ ބަދަލުތަކެއް ހުރި އިރު، އެ ބަދަލުތައް ގެންނާނީ އެއްފަހަރާ ކަމަށެވެ. ޖޭއެސްސީ އިސްލާހުކުރުމަކީ އެމްޑީޕީން ކުރާނެ ކަމެއް ކަމަށް ވެސް އެ މެމްބަރުން ވިދާޅުވި އެވެ.
ތޯރިގު ހުށަހެޅުއްވި ބިލުގެ ބަހުސް ނިމުން މިއަދުގެ ޖަލްސާގައި އެ ބިލަށް ނެގި ވޯޓުގައި ބިލު ބަލައިގަންނަން ފެންނަ ކަމަށް ވޯޓު ދެއްވީ 11 މެމްބަރުންނެވެ. އެ ބިލު ބަލައިގަންނަން ނުފެންނަ ކަމަށް 46 މެމްބަރަކު ވޯޓް ދެއްވި އިރު ވަކި ގޮތަކަށް ވޯޓް ނުދެއްވައި އެއް މެމްބަރަކު އިންނެވި އެވެ.
ޖޭއެސްސީގެ އެކުލެވުން ބަދަލުކުރަން ތޯރިގު މީގެ ކުރިން ވެސް އެއް ފަަހަރު ހުށަހެޅުއްވި އެވެ. އެ ފަހަރުވެސް މަޖިލީހުން ފާސްކުރީ އެ ބިލު ބަލައިގަންނަން ނުފެންނަ ކަމަށެވެ.
ޖޭއެސްސީ ގައި ހިމަނަން ތޯރިގު ހުށަހެޅުއްވި މެމްބަރުން:
- އުއްތަމަފަނޑިޔާރު
- ހައި ކޯޓުން އިންތިހާބުކުރާ ފަނޑިޔާރެއް
- ދަށު ކޯޓްތަކުން އިންތިހާބުކުރާ ފަނޑިޔާރެއް
- ވަކީލުން އިންތިހާބުކުރާ ވަކީލެއް
- ޔުނިވާސިޓީތަކުގައި ޝަރީއާ ކިޔަވައިދެއްވާ ލެކްޗަރާއިންްގެ ތެރެއިން އިންތިހާބުކުރާ ލެކްޗަރާ އެއް.
- ގާނޫނީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން ރައީސުލްޖުމްހޫރިއްޔާ އައްޔަން ކުރައްވައި، މަޖިލީހުން ރުހުންދޭ ތަޖުރިބާ ކާރެއް.
ސިޔާސީ އެއްވެސް އެއްވެސް ފަރާތެއް ޖޭއެސްސީގައި ނުހިމެނޭ ގޮތަށް އޮތް އެ ބިލުގެ ބަހުސް ފެށީ މިދިޔަ ހޯމަ ދުވަހު އެވެ. އެ ދުވަހު ބިލުގެ ތައާރަފްގައި ތޯރިގު ދެެއްކެވި ވާހަަކައަށް ފަހު ރައްޔިތުންގެ މަޖިލީހުގެ އަދި އެމްޑީޕީގެ ވެސް ރައީސް މުހައްމަދު ނަޝީދު އިއްވެވި ލިޔެފައިވާ ބަޔާނުގައި އެމަނިކުފާނު ވިދާޅުވީ ސިޔާސީ މީހުންނަކީ ސީދާ ރައްޔިތުން އިންތިހާބުކުރާ ބައެއް ކަމަށެވެ. އެ އިރެއްގައި ރައްޔިތުންގެ ވިންދު ހުރިގޮތް ތަމްސީލުކުރަން މަޖިލީހުގެ މެމްބަރުން ނޫން ބައެއް ނެތްކަމަށް ވެސް އެމަނިކުފާނު ވިދާޅުވި އެވެ.
