ސްޕޯޓްސް އެވޯޑަކީ މިހާތަނަށް ރާއްޖޭގައި ބާއްވާނެ އެންމެ ބޮޑު އިވެންޓަށްވާނެ ކަމަށާއި، މި އެވޯޑުގެ ސަބަބުން އެސޯސިއޭޝަންތަކާއި ކުޅުންތެރިންގެ މެދުގައި ރަނގަޅު ވާދަވެރިކަމެއް އުފެދި ކުޅިވަރަށް ކުރިއެރުން އަންނާނެކަމަށް ކުޅިވަރާ ބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.
"މޯލްޑިވްސް ސްޕޯޓްސް އެވޯޑްސް 2022" ބޭއްވުމަށް ހަމަޖެހިފައިވަނީ އަންނަ މަހުގަ 17 ވަނަ ދުވަހު މާލޭ ކުޅިވަރު އެކުވެނި ޓްރެކް ދަނޑުގަ އެވެ.
މުޅިން އަލަށް ބާއްވާ އެވޯޑާއި ގުޅޭގޮތުން މިނިސްޓަރު މަހުލޫފު ވިދާޅުވީ މި އެވޯޑް ތައާރަފް ކުރުމުގެ މައިގަނޑު ތިން މަގްސަދަކީ ކުޅުންތެރިން ކުރާ މަސައްކަތް ބަލައިގަތުމާއި، އަގުވަޒަން ކުރުމުގެ އިތުރުން ހިތްވަރުދިނުން ކަމަށެވެ.
"މިއަދަކީ ކުޅިވަރު ކުރިއެރުވުމަށް ކުރެވޭ މަސައްކަތުގައި ބޮޅެއް އިތުރުވާ ދުވަހެއް. ކުޅިވަރު އެހެން ހަރުފަތަކަށް ގެންދިޔުމަށްޓަކަައި ކުޅިވަރު އިންފްރާސްޓަރަކްޗާ ރާއްޖޭގެ އެކި ސަރަހައްދުތަކުގައި އެބަ ހިންގަން. އެތައް މިލިއަން ރުފިޔާ މިކަމަށް ހަރަދު ކޮށް ރާއްޖޭގެ ގައުމީ ޓީމުތައް ރަނގަޅު ނަތީޖާތަކެއް ހޯދުމަށް ގިނަ މަސައްކަތްތަކެއް ކުރެވެމުން މި އަންނަނީ" މިނިސްޓަރު ވިދާޅުވި އެވެ.
މަހުލޫފް ވިދާޅުވީ ކުޅިވަރު ކުޅުންތެރިން ކާމިޔާބާ ހަމައަށް ދިއުމަށް ވަރަށް ބުރަކޮށް، ދާ އޮހުރުވައިގެން ގައުމަށްޓަކައި ގިނަ މަސައްކަތްތަކެއް ކުރާ ކަމަށެވެ.
"އެ މަސައްކަތުގެ އަގު ވަޒަންކުރުމަކީ ދުނިޔޭގެ ހުރިހާ ތަނެއްގައި ވެސް ކުލަގަދަކޮށް ކުރާ ކަމެއް. ރާއްޖެ ފިޔަވައި ހުރިހާ ގައުމެއްގައި ވެސް މި ކަން ކުރޭ. މި އެވޯޑާ އެކު ކުޅުންތެރިންނަށް އިތުރު ހިތްވަރެއް ލިބޭނެ،" މަހުލޫފް ވިދާޅުވި އެވެ.
މިނިސްޓަރު ވިދާޅުވީ މި އެވޯޑުގެ ސަބަބުން ކުޅިވަރުގެ ކުރިއެރުމަށް ބޮޑު ފައިދާއެއް ކުރާނެ ކަމަށެވެ. އެންމެ މޮޅު ކުޅިވަރު އެސޯސިއޭޝަން ހޮވުމުގެ އިތުރުން އެ ކުޅިވަރެއްގެ އެތުލީޓުންގެ މެދުގައި ވެސް ވާދަވެރިކަން އިތުރުވާނެ ކަަމަށް ވިދާޅުވި އެވެ. އަދި މި ކަމުގެ ސަބަބުން ކުޅިވަރުގެ ފެންވަރު ރަނގަޅުވެ، ކުރިއެރުމަށް ބޮޑު ފައިދާއެއް ކުރާނެ ކަމަށް ވެސް މިނިސްްޓަރު މަހުލޫފު ވިދާޅުވި އެވެ.
މި އެވޯޑަކީ މިހާތަނަށް ރާއްޖޭގައި ބޭއްވޭ އެންމެ ބޮޑު ހަރަކާތަށް ވާނެ ކަމުގެ ޔަގީންކަން އެބައޮތް ކަމަށް މިނިސްޓަރު ވިދާޅުވި އެވެ. އަދި މި އިވެންޓުގައި ރާއްޖޭގެ ކުޅިވަރަށް އެކިއެކި ގޮތްގޮތުން އެހީތެރިވެވަޑައިގެން، ގާތްގުޅުމެއް ބަހައްޓަވާ އެކި ގައުމުުތަކުގެ ކުޅިވަރު ވަޒީރުންނާއި ދުނިޔޭގެ ފެންވަރުގައި ކުޅިވަރުގައި ފާހަގަކޮށްލެވޭ ކުޅިވަރުގެ ވަރުގަދަ ޝަހުސިއްޔަތުން ވެސް ބައިވެރިވާނެ ކަމަށް މަހުލޫފު ވިދާޅުވި އެވެ.
"އަދި ދުނިޔޭގެ ފެންވަރުގައި އެތައް ކާމިޔާބީތަކެއް ހޯދާފައިވާ ކުޅިވަރު ލެޖެންޑުން، ވޯލްޑް ރެކޯޑް ހޯލްޑަރުން މި އިވެންޓުގައި ބައިވެރިވާނެ. މިހާރު ވެސް ކުޅިވަރުގައި ފާހަގަކޮށްލެވޭ ބައެއް ކުޅުންތެރިން ބައިވެރިވާނެ. ކުލަގަދަ، އެހާމެ ވަރުގަދަ އިވެންޓަކަށް މި އިވެންޓްވާނެ. މިހާރު އެބޭފުޅުން މިކޮޅަށް ވަޑައިގަތުމުގެ އެކި އެކި އެރޭންޖްމަންޓް މިހާރު މިދަނީ ހަމަޖައްސަމުން،" އެވޯޑާ ގުޅިގެން ރޭވިފައިވާ ކަންތައްތަކާ ބެހޭގޮތުން މިނިސްޓަރު މަހުލޫފް ވިދާޅުވި އެވެ.
މަހުލޫފު ވިދާޅުވީ މި އިވެންޓުގައި ހާއްސަ މެހުމާނުންގެ ގޮތުގައި ބައިވެރިވާ ފަރާތްތަކުގެ މައުލޫމާތުތައް ކުރިއަށް ހުރި ނޫސްވެރިންގެ ބައްދަލުވުންތަކުގައި ހާމަކުރައްވާނެ ކަމަށެވެ.
މުޅިން އަލަށް ބާއްވާ އެވޯޑުގައި އަހަރުގެ އެންމެ މޮޅު ކުޅިވަރު އެތުލީޓް (އަންހެން/ފިރިހެން)، ކޮންމެ ކުޅިވަރެއް ވަކިވަކިން އެންމެ މޮޅު ކުޅުންތެރިޔާ (އަންހެން/ފިރިހެން) ހޮވާނެ އެވެ.
އޭގެ އިތުރުން ސްޕެޝަލް އެބިލިޓީ އެތުލީޓް (އަންހެން/ފިރިހެން)، އެންމެ މޮޅު ކޯޗު (އަންހެން/ފިރިހެން)، އަހަރުގެ އެންމެ މޮޅު ޓެކްނިކަލް އޮފިޝަލް (އަންހެން/ފިރިހެން)، އެންމެ މޮޅު ސިއްހީ އެހީތެރިޔާ (އަންހެން/ފިރިހެން)، އެންމެ އުންމީދީ އެތުލީޓް (އަންހެން/ފިރިހެން)، އެންމެ މޮޅު ކުޅިވަރު ނޫސްވެރިޔާ، އެންމެ މޮޅު ކުޅިވަރު ފޮޓޯގްރާފަރު، އަހަރުގެ އެންމެ ފާހަގަކޮށްލެވޭ ކުޅިވަރު އެސޯސިއޭޝަން، އެންމެ ފާހަގަކޮށްލެވޭ ސްޕޯޓްސް ބްރޯޑްކާސްޓަރު، އެންމެ ފާހަގަކޮށްލެވޭ ސްޕޯޓްސް އޮންލައިން މީޑިއާ އަދި ލައިފް ޓައިމް އެޗީވްމަންޓް އެވޯޑް ދީނުމަށްވަނީ ހަމަޖެހިފަ އެވެ.
މި އެވޯޑްތަކަށް ނަން ހުށަހެޅުމަށް މިހާރު ފުރުސަތު ހުޅުވާލާފައިވާއިރު، ނަންތައް ނޮމިނޭޓްކުރާނީ ކުޅިވަރު އެސޯސިއޭޝަންތަކުންނެވެ. އެސޯސީއޭޝަންތަކުން ހުށަހަޅާ ނަންތަކުގެ ތެރެއިން އެވޯޑް ލިބޭ ފަރާތެއް ހޮވާނީ އެކަމަށް ކަނޑައަޅާފައިވާ ޖަޖުންގެ ޕެނަލަކުންނެވެ.
"މޯލްޑިވްސް ސްޕޯޓްސް އެވޯޑްސް 2022"ގެ އޮންލައިން މީޑިއާ ޕާޓްނަރަކަށް ހަމަޖައްސާފައިވަނީ "އަދަދު" އޮންލައިން އެވެ. އަދި ބްރޯޑްކާސްޓިން ޕާޓްނަރަކަށް ހަމަޖައްސާފައިވަނީ ރާއްޖެ ޓީވީ އެވެ.
