ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި ގޯސްތަކެއް ހިނގައިފައިވާ ކަމަށް ބުނެ، ކޮމިޝަނާ އޮފް ޕޮލިސް މުހައްމަދު ހަމީދު، ޕޮލިސް ބޯޑަށް މާދަމާ ހާޒިރުވާން އަންގައިފި އެވެ.
މިއީ، 2020ގެ ޑިސެމްބަރު މަހު އަމަލުކުރަން ފެށި ފުލުހުންގެ އާ ގާނޫނުގެ ދަށުން، ސީޕީ ޕޮލިސް ބޯޑަށް ގެންދާ ފުރަތަމަ ފަހަރެވެ. ލާއިންސާނީ އަމަލުތަކާއި ބާރުގެ ބޭނުން ނަހަމަ ގޮތުގައި ބޭނުން ކުރުމާއި ކޮރަޕްޝަންގެ ތުހުމަތުތައް ކުރެވިފައިވާ އޮފިސަރުންގެ މައްސަލަތައް ބަލާނީ ޕޮލިސް ބޯޑުންނެވެ.
ނޫސްވެރިންނާއެކު މިއަދު ބޭއްވި ހާއްސަ ބައްދަލުވުމެއްގައި، ސީޕީ ވިދާޅުވީ މާދަމާ 2:00ގައި ޕޮލިސް ބޯޑަށް ހާޒިރުވާން އަންގައިފައިވާ ކަމަށެވެ.
"އެއީ ދާދި ފަހަކުން މާލެ ސަރަހައްދުގަ އާއި މިތާ ކައިރި އަތޮޅެއްގަ ހިނގައިދިޔަ އޮޕަރޭޝަނެއްގައި، ފުލުހަކު ހިންގި އިޖުރާއަތެއް، ގޯސްކޮށް ހިންގީ ނުރަނގަޅު ނިޔަތެއްގައި ކަމަށް އަޅުގަނޑުމެންގެ ދައުލަތުގެ ތެރެއިން ބައެއް މުވައްސަސާތަކަށް ގަބޫލުކުރެވިގެން ހާޒިރުކުރަނީ," ސީޕީ ވިދާޅުވި އެވެ.
މީގެ އިތުރުން ސީޕީ ވިދާޅުވީ މަސްތުވާތަކެތީގެ މައްސަލަތަކުގައި ފުލުހުންނަށް ވެސް ގޯސް ހެދޭ ނަމަވެސް ކޮންމެ ފަހަރަކު އެއީ ފުލުހުންގެ އިހުމާލުންވާ ކަންކަން ނޫން ކަމަށެވެ. އެކަމުގައި ނިޒާމުގެ ތެރޭގައި ހަރުދަނާ ކުރަން ޖެހޭ ގިނަ ކަންކަން ހުރި ކަން ކަމަށްވެސް ސީޕީ ވިދާޅުވި އެވެ.
