އިދިކޮޅުން ހިންގާ "އިންޑިއާ އައުޓް" ކެމްޕޭން ހުއްޓުވަން އަމާޒުކޮށް، ހުށަހަޅަން އުޅުނު ބިލާ މެދު އެމްޑީޕީން އަލުން ގޮތެއް ނިންމުމަށްޓަކައި ބިލު ހުށަނާޅައި ބާއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ކުރީގެ ލީޑަރު އަލީ އާޒިމް ވިދާޅުވީ ހާރިޖީ ގުޅުންތަކަށް ނޭދެވޭ އަަސަރުކުރާ ފަދަ އަމަލުތައް ހުއްޓުވުމުގެ ބިލު މަޖިލީހަށް މިހަފްތާގައި ހުުށަހަޅަން ކުުރިން ނިންމާފައި އޮތް ނަމަވެސް އެ ބިލު ހުށަނޭޅުނީ ވަގުތުގެ ގޮތުން ކަމަށެވެ. އޭނާ އެވިދާޅުވީ ބެލެވޭ ގޮތުގައި އެމްޑީޕީގެ ޕާލަމެންޓްރީ ގްރޫޕްގެ ލީޑަޝިޕްގެ އިންތިހާބުގެ ވާހަކަ އެވެ.
"އަދި އެކަމުގައި ވަރަށް ބޮޑެތި ހިޔާލުތަފާތުވުންތަކެއް ވެސް ހުރުމުގެ ސަބަބުން،" އާޒިމް ވިދާޅުވި އެވެ.
އާޒިމް ވިދާޅުވީ އެ ބިލާ މެދު ހިޔާލުތާފާތުވުން އޮތީ ހާއްސަކޮށް، އެކިއެކި ކަންކަމުގައި ސަރުކާރުގެ އެހީތެރިކަަމަށް ބޭނުންވާ މެމްބަރުންގެ ކަމަށެވެ. އެފަދަ މެމްބަރުންނަށް އެ ބިލު "ހިތްގައިމު ނުވި" ކަމަށް ވެސް އޭނާ ވިދާޅުވި އެވެ.
"އަޅުގަނޑު ދެކޭ ގޮތުގައި އަލަށް އެކުލަވައިލެވުނު އަަޅުގަނޑުމެންގެ ޕާލަމެންޓްރީ ގްރޫޕުން މި ބިލާ މެދު ގޮތެއް ނިންމައި ސަރުކާރާ މަޝްވަރާ ކުރުމަށް ފަހު ހުށަހަޅާނެ،" އާޒިމް ވިދާޅުވި އެވެ.
"އިންޑިއާ އައުޓް"ގެ ނަމުގައި އިދިކޮޅުން ކުރިއަށް ގެންދާ ކެމްޕޭނާއި ފަހުން ވެސް ހިންގައިފާނެ އެފަދަ އެހެން ކެމްޕޭންތައް ވެސް ގާނޫނީ ކުށަކަށް ހެދޭ ފަދަ ބިލު، ރައްޔިތުންގެ މަޖިލީހަށް ހުށަހެޅުމަށް ސުޕަ މެޖޯރިޓީ އޮންނަ އެމްޑީޕީ ޕާލިމެންޓަރީ ގްރޫޕުން ފާސްކުރީ މިމަހުގެ ނުވަ ވަނަ ދުވަހު އެވެ.
"ދޭދޭ ދެ ގައުމުގެ މެދުގައި އޮންނަ ގުޅުމަށް ބުރޫއަރާ ގޮތަށް ހަރަކާތްތައް ހިންގުމަކީ ގަބޫލުކުރެވޭ ކަމެއް ނޫން" ބިލު ހުށަހަޅާ ސަބަބު ބަޔާން ކޮށްދެއްވަމުން އާޒިމް "އަދަދު" އަށް ކުރިން ވިދާޅުވި އެވެ.
އެމްޑީޕީން އެކުލަވައިލި ޑްރާފްޓްގައިވާ ގޮތުން، އެ ބިލް ގާނޫނަކަށް ވުމަށްފަހު، ރާއްޖެއާ އެހެން ގައުމުތަކާ ދެމެދު އޮންނަ ގުޅުންތަކަށް ނޭދެވޭ އަސަރުކޮށްފާނެ ފަދަ އަމަލެއް ކުރާ މީހާ އެކުރަނީ ކުށެކެވެ. ބިލުގައިވާ ގޮތުން، ރާއްޖެއާ ގުޅުން ގާއިމްކޮށްފައިވާ ގައުމެއްގެ އިއްޒަތާއި ގަދަރަށް ބުރޫ އަރާ ފަދަ އަމަލެއް ކުރުމަކީ ވެސް ކުށެކެވެ.
ބިލްގެ (6) ވަނަ މާއްދާގެ (ހ) ގައި އެގޮތަށް ހިމަނަން ޑްރާފްޓްގައި އޮތް އިރު އެ މާއްދާގެ (ށ)ގައި އޮތީ އެ ކުށަށް ދޭނެ އަދަބެވެ.
"...މި މާއްދާގެ ހ. ގައި ބަޔާންކޮށްފައިވާ ކުށެއް ކޮށްފި މީހެއްގެ އަދަބަކީ، އެ އަމަލެއްގެ ކުޑަބޮޑުމިނަށް ބަލައި ގިނަވެގެން 20،000 ރުފިޔާއިން ޖޫރިމަނާކުރުން ނުވަތަ އެއް އަހަރަށް ވުރެ ދިގުނޫން މުއްދަތަކަށް ގޭބަންދުކުރުން ނުވަތަ ހަ މަސް ދުވަހަށް ވުރެ ދިގުނޫން މުއްދަތަކަށް ޖަލަށް ލުމެވެ،" އެމްޑީޕީން ތައްޔާރު ކުރި ޑްރާފްޓުގައި ބުނެފައިވެ އެވެ.
