ހުޅުމާލެ މެޖިސްޓްރޭޓް ކޯޓު އުފައްދާފައި އޮތީ ގާނޫނާ އެއްގޮތަށް ކަމަށް ކުރީގެ ސުޕްރީމް ކޯޓުން ކަނޑައަޅާފައި އޮތް ނަމަވެސް އެ ހުކުމަށް ނުބަލައި، ކޯޓު އުވާލުމުގެ މަސައްކަތް ކުރިއަށްގެންދާނެ ކަމަށް ބުނެ ޖުޑީޝަލް ސާވިސް ކޮމިޝަނުން އިއްޔެ ނެރުނު ބަޔާނަށް ބަދަލުތަކެއް ގެނައީ އޮޅުންތަކެއް އިސްލާހު ކުރަން ކަމަށް އެ ކޮމިޝަނުން ބުނެފި އެވެ.
އިއްޔެ މެންދުރު ނެރުނު ބަޔާނުގައި އޮތީ "ދިވެހިރާއްޖޭގެ ސްޕްރީމް ކޯޓުން ކުރައްވާފައިވާ ނިޔާ މުރާޖައާކޮށްދެވެން ނެތްކަމަށް އެ ކޯޓުން ނިންމި ނަމަވެސް ހުޅުމާލޭ މެޖިސްޓްރޭޓް ކޯޓު އުވާލުމަށްޓަކައި ކުރަންޖެހޭ މަސައްކަތްތައް މި ދަނީ ކުރަމުން" ކަމަށެވެ.
ނަމަވެސް، ޖޭއެސްސީން ވަނީ އެ ބަޔާނަށް މިހާރު ބަދަލުތަކެއް ގެނެސްފަ އެވެ. އެގޮތުން، މިހާރު އެ ބަޔާނުގައި އޮތީ "ދިވެހިރާއްޖޭގެ ސްޕްރީމް ކޯޓުން ކުރައްވާފައިވާ ނިޔާ މުރާޖައާކޮށްދެވެން ނެތްކަމަށް އެ ކޯޓުން ނިންމާފައިވާތީ، ހުޅުމާލޭ މެޖިސްޓްރޭޓް ކޯޓު އުވާލުމާމެދު އިތުރަށް ކުރަންޖެހޭ މަޝްވަރާތައް މި ދަނީ ކުރަމުން" ކަމަށެވެ.
ފުރަތަމަ ނެރުނު ބަޔާނުގައި އެގޮތަށް ޖެހިފައި އޮތީ "އޮޅުމަކުން" ކަމަށް ޖޭއެސްސީގެ މީޑިއާ އޮފިސަރު އިޒްމީރާ ޝިހާމް މި ނޫހުން ސުވާލު ކުރުމުން ވިދާޅުވި އެވެ. އަދި އެ އޮޅުންތައް އިސްލާހުކުރަން ބަދަލުތަކެއް ގެނައީ ކަމަށް ވެސް އޭނާ މައުލޫމާތު ދެއްވި އެވެ.
ހުޅުމާލެ ކޯޓު އުފެއްދީ ރަނގަޅަށް ކަމަށް ކުރީގެ ސުޕްރީމް ކޯޓުން ކަނޑައެޅީ ޑިސެމްބަރު 5، 2012 ގަ އެވެ. އެ ނިންމުން އެންމެ މަތީ ކޯޓުން އަލުން މުރާޖައާ ކުރުމަށް މިފަހުން ޖޭއެސްސީން އަލުން ހުށަހެޅި އެވެ. ނަމަވެސް މި ހިނގާ ފެބްރުއަރީ 8، ގައި ކޯޓުން ނިންމީ އެ މައްސަލަ ނުބެލުމަށެވެ.
ހުޅުމާލެ ކޯޓުގެ މައްސަލާގައި ބަންޑާރަ ނައިބު އިބްރާހިމް ރިފްއަތު ވެސް ވަނީ އެއީ ސިޔާސީ މަގްސަދެއް ހާސިލްކުރުމަށް އުފެއްދި ކޯޓެއް ކަމަށް ވިދާޅުވެފަ އެވެ. އޭނާއަކީ ޖޭއެސްސީގެ މެމްބަރެކެވެ.
"ގާނޫނާ ހިލާފު އެ ނިންމުން ނަގަހައްޓާފައިވަނީ 2012/SC-S/31 ގަޒިއްޔާއިން. ގާނޫނުގައި ނެތް ކަމެއް ގާނޫނާ އެއްގޮތަށް ނުކުރެވޭނެ! ގާނޫނީ މިބޮޑު ފުށުއެރުން/ފާޅުކަން ބޮޑު ބޭއިންސާފު ރަނގަޅު ކުރުމަށް ގާނޫނު އިސްލާހު ކުރާނަން،" ރިފްއަތު އިއްޔެ ވިދާޅުވި އެވެ.
ހަމައެހެންމެ ޖޭއެސްސީގެ ރައީސް ހިސާން ހުސައިން ވެސް ވަނީ ސުޕްރީމް ކޯޓުން އެ ނިންމު ބަދަލު ނުކުރުމުން ގާނޫނަށް އިސްލާހު ގެނެސްގެން އެ ކޯޓު އުވާލުމަކީ ޝަރުއީ ކޯޓެއްގެ ނިންމުމަކަށް ގޮންޖެހުމެއް ނޫން ކަމަށާއި އަދި އެއީ އެ ހުކުމެއްގެ ހުރުމަތް ކަނޑާލުމެއްވެސް ނޫން ކަމަށް ވިދާޅުވެފަ އެވެ.
"މިސާލަކަށް އެއީ ސުޕްރިމް ކޯޓުގެ ނިންމުމަކުން ކަނޑައެޅޭ ޕޮލިސީއަކާ [އުސޫލަކާ] ޑީވިއޭޓް [ހިލާފު] ނުވެވޭނެ އެކޭ ނޫން، އެ ޕޮލިސީއަކަށް ބަދަލު ގެންނަން އެމީހުން [ސުޕްރީމް ކޯޓުން] ސެޓް ކުރި ޑައިރެކްޝަން ޗޭންޖް ކުރަން ބޭނުންވެއްޖިއްޔާ [އުސޫލު ބަދަލުކުރަން ބޭނުންނަމަ] ގާނޫނު ހަދައިގެން އެ [ބަދަލު] ކުރެވޭނެ،" ހިސާން ވިދާޅުވި އެވެ.
ކޯޓުތަކާ ބެހޭ ގާނޫނުގައި ބުނެފައި އޮތީ މާލޭގައި އުފައްދޭނީ ސުޕީރިއާ ކޯޯޓުތައް ކަމަށެވެ. އެ ގާނޫނުގައި ބުނެފައިވާ ގޮތުން މާލެ ނޫން ރަށްރަށުގައި އުފެއްދޭނީ މެޖިސްޓްރޭޓް ކޯޓެވެ. ގާނޫނުއަސާސީގައި މާލެ މާނަކޮށްފައި އޮތީ ހުޅުމާލެ އަދި ވިލިމާލެ ހިމެނޭހެންނެވެ.
