ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ އެތެރޭގެ އިންތިހާބުގެ ޕާލަމެންޓަރީ ގުރޫޕުގެ ޑެޕިޔުޓީ ލީޑަރުކަމަށް ވާދަކުރެއްވި ދެ ކެންޑިޑޭޓުންގެ މެދުގައި ވޯޓު އެއްވަރުވެފައިވާތީ، އެ މަގާމަށް މެމްބަރަކު ހޮވަން އަންނަ ހޯމަ ދުވަހަށް ތާވަލުކޮށްފި އެވެ.
ޖުމްލަ 65 މެމްބަރުން ތިބޭ އެމްޑީޕީ ޕީޖީ ގުރޫޕުގެ މަގާމުތަކަށް މެމްބަރުން ހޮވަން އިންތިހާބު ބޭއްވީ މިދިޔަ ހުކުރު ދުވަހު އެވެ.
ޑެޕިޔުޓީ ޕީޖީ ލީޑަރުކަމަށް ދެ ބޭފުޅުން އިންތިހާބުކުރަންޖެހޭއިރު، އެ މަގާމަށް ތިން ބޭފުޅަކު ކުރިމަތިލެއްވި އެވެ.
އޭގެ ތެރެއިން 49 މެމްބަރުންގެ ވޯޓާއެކު އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން އިންތިހާބުވެފައިވާއިރު، ދެން ތިއްބެވި ދެ ބޭފުޅުންގެ ވޯޓު ވަނީ އެއްވަރުވެފަ އެވެ.
ހެންވޭރު ދެކުނު ދާއިރާގެ މެމްބަރު ހުސެއިން ޝަހީމާއި ހުޅުދޫ ދާއިރާގެ މެމްބަރު އިލްޔާސް ލަބީބަށް ވެސް ލިބިވަޑައިގެންނެވީ 34 ވޯޓެވެ.
އަންނަ ހޯމަ ދުވަހު އަލުން ވޯޓު ނަގަނީ ވޯޓު އެއްވަރުވި ދެ މެމްބަރުންގެ މެދުގައި އެވެ.
މިދިޔަ ހުކުރު ދުވަހު ބޭއްވި އިންތިހާބުގައި ޕާލަމެންޓަރީ ގުރޫޕުގެ ލީޑަރުކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވަނީ އިންތިހާބުކޮށްފަ އެވެ.
ރައްޔިތުންގެ މަޖިލީހުގެ މެޖޯރިޓީ ލީޑަރުކަމަށް އަސްލަމާއެކު ވާދަކުރެއްވީ މިހާރު ވެސް އެ މަގާމުގައި ހުންނެވި މެދު ހެންވޭރު ދާއިރާގެ މެމްބަރު އަލީ އާޒިމެވެ.
ޕީޖީ ލީޑަރުކަމަށް އަސްލަމް ހޮވިވަޑައިގެންނެވީ 40 މެމްބަރުންގެ ވޯޓުންނެވެ.
އާޒިމަށް ލިބިވަޑައިގެންނެވީ 25 ވޯޓެވެ.
އިންތިހާބުގައި އަމީންއާންމުގެ މަގާމަށް ފުވައްމުލަކު މެދު ދާއިރާގެ ހުސެއިން މުހައްމަދު ދީދީ އާއި ޑެޕިޔުޓީ އަމީން އާންމުގެ މަގާމަށް ފޭދޫ ދާއިރާގެ މެމްބަރު މުހައްމަދު ނިހާދު ވެސް ވަނީ އިންތިހާބުވެފަ އެވެ.
އެމްޑީޕީގެ ޗީފް ވިޕްގެ މަގާމަށް ތިނަދޫ އުތުރު ދާއިރާގެ މެމްބަރު އަބްދުލް މުޣުނީ އިންތިހާބުވެފައިވަނީ 34 ވޯޓާއެކު އެވެ. އެ މަގާމަށް ދެން ވާދަކުރެއްވި މަކުނުދޫ ދާއިރާގެ މެމްބަރު މުހައްމަދު ރާއީއަށް ލިބިވަޑައިގެންނެވީ 31 ވޯޓެވެ.
މީގެ އިތުރުން އެމްޑީޕީ ޕީޖީ ގުރޫޕުގެ ވިޕުންގެ ގޮތުގައި ފަސް މެމްބަރުން ތިބެންޖެހޭއިރު، އެ މަގާމަށް ކުރިމަތިލީ ހަތަރު މެމްބަރުންނެވެ.
އެހެންކަމުން، ވިޕްގެ މަގާމަށް ވާދަކުރަން ބޭނުންވާ މެމްބަރުން އަންނަ އާދީއްތަ ދުވަހުގެ ކުރިން ހުށަހަޅަން އެމްޑީޕީން ވަނީ ހުޅުވާލައިފަ އެވެ.
