ކްރިމިނަލް ކޯޓުގައި ނުނިމި ހުރި މައްސަލަތައް ނިންމައި، ބެކްލޮގް ސާފުކުރުމުގެ މަސައްކަތަށް ތައްޔާރުވުމުގެ ގޮތުން ޖުޑީޝިއަލް ސާވިސް ކޮމިޝަނާ (ޖޭއެސްސީ)، ޕްރޮސެކިއުޓާ ޖެނެރަލް (ޕީޖީ) އޮފީހުގެ އިތުރުން ޖުޑީޝިއަލް އެޑްމިނިސްޓްރޭޝަނުން (ޑީޖޭއޭ) މިއަދު ހެނދުނު މާފުށީ ޖަލަށް ޒިޔާރާތްކޮށްފި އެވެ.
ޖޭއެސްސީގެ ތަރުޖަމާން އިޒްމީރާ ޝިހާމް މި ނޫހާ ވާހަކަދައްކަވަމުން ވަނީ އެ ދަތުރުގެ ތަފްސީލު ހިއްސާކުރައްވާފަ އެވެ.
އޭނާ ވިދާޅުވި ގޮތުގައި އެއީ އޮންލައިންކޮށް ޝަރީއަތްތައް ކުރިއަށް ގެންދެވޭނެ ވަސީލަތްތައް ހުރިތޯ ބެލުމަށާއި، ޖަލު ބަންދުގައި ތިބި މީހުންގެ ޝަރީއަތްތައް ލަސްވާ ސަބަބު ދެނެގަތުމަށް ކުރާ ދަތުރެކެވެ. އެ ދަތުރުގެ ތެރެއިން މާފުށީ ޖަލުން އޮންލައިންކޮށް ޝަރީއަތްތަކުގައި ބައިވެރިވާ ކޯޓު ރޫމްއަށް ޒިޔާރާތްކޮށް އެތަން އިންސްޕެކްޓް ކުރިން ހިމެނެ އެވެ.
"މައިގަނޑު ގޮތެއްގައި މިއީ މާފުށި ޖަލުން ޝަރީއަތްތަކުގައި ބައިވެރިވުމަށް ދިމާވާ ދަތިތައް ދެނެގަތުމަށް ކުރި ދަތުރެއް، ޖަލު ކޯޓު ރޫމްގައި އޮންލައިންކޮށް ޝަރީއަތްތަކުގައި ބައިވެރިވުމުމުގައި ހުރި ގޮންޖެހުންތަކާއި، ވަސީލަތްތައް ހުރިތޯވެސް ބަލާނެ،" އިޒްމީރާ ވިދާޅުވި އެވެ.
އޭނާ އިތުރަށް ވިދާޅުވި ގޮތުގައި މި ދަތުރުގެ ތެރެއިން މާފުށި ކޯޓަށްވެސް ޒިިޔާރާތް ކުރާނެ އެވެ. އަދި އެ ކޯޓުގެ ޝަރީއަތް ކުރާ މާލަމެއް މާފުށީ ޖަލުގައި ބަންދުކޮށްފައި ތިބި މީހުންގެ މައްސަލަތަކަށް ހާއްސަކުރުމާ ގުޅޭ ގޮތުންވެސް މަޝްވަރާ ކުރާނެ އެވެ.
މާފުށީ ކޯޓަށް ގިނަ ޖިނާއީ މައްސަލަތައް ހުށަހެޅި ފުނިޖެހެން ފެށުމާއެކު، މިދިޔަ އަހަރު ތެރޭގައި ޖޭއެސްސީއިން ވަނީ އެ ކޯޓަށް އިތުރު މެޖިސްޓްރޭޓެއް ފޮނުވާފަ އެވެ. އެހެންވެ މިހާރު އެ ކޯޓުގައި ދެ މެޖިސްޓްރޭޓުންގެ ކޮޓަރިކޮޅުގެ އިތުރުން، ދެ ޝަރީއަތް ކުރާ މާލަން ވަނީ ގާއިމުކޮށްފަ އެވެ.
ކްރިމިނަލް ކޯޓުގެ ބެކްލޮގް ހުސްކުރުމަށްޓަކައި މިހާރު ކަމާބެހޭ އިދާރާތަކުން ވިސްނަމުން ދަނީ އެ ކޯޓުގައި އިތުރު ޝަރީއަތް ކުރާ މާލަމެއް ގާއިމްކޮށް، ކްރިމިނަލް ކޯޓާ ގުޅާލެވޭނެ އިންތިޒާމް ހަމަޖެއްސުމަށެވެ. އެއާއެކު ޖަލުގައި ތިބި މީހުންގެ ގިނަ މައްސަލަތައް އެއްފަހަރާ ކުރިއަށް ގެންދެވޭނެ އެވެ.
ކޮމިޝަނަރު އޮފް ޕްރިޒަންސް މިދިޔަ ހަފްތާ "އަދަދު"އަށް ވިދާޅުވި ގޮތުގައި މާލޭ ޖަލުތަކުގެ އިތުރުން މާފުށީ ޖަލުގައިވެސް މިހާރު ދަނީ ކޯޓް ރޫމްތައް ހަދަމުންނެވެ. އޮންލައިން އަޑުއެހުންތަކަށް ހާއްސަކޮށް ތަރައްގީކުރާ އެ ރޫމްތަކާއެކު ޝަރީއަތްތައް އަވަސްވެގެން ދާނެ ކަމަށް އޭނާ ގަބޫލުކުރައްވަ އެވެ.
އެތެރެ ފެންނަ ގޮތަށް ބިއްލޫރި ޖަހާފައި ހުރި ނަމަވެސް އަޑުއެހުންތަކަށް ހާއްސަކޮށްގެން ހަދާފައި ހުރި ހުރިހާ ރޫމެއްވެސް ސައުންޑް ޕްރޫފް ވާނެކަން އޭނާ ފާހަގަކުރެއްވި އެވެ. އަދި ބަންދުގައި ތިބި މީހުން ސާފުކޮށް ފެންނާނެ ކެމެރާއަކާއެކު، ހައި ސްޕީޑް އިންޓަނެޓް ވެސް އެތަނަށް ގުޅާފައި ވާނެ ކަމަށް އޭނާ ވިދާޅުވި އެވެ.
