ލީޑްސް (ފެބްރުއަރީ 20) - އިނގިރޭސި ޕްރިމިއާ ލީގުގައި މިރޭ ރަށުންބޭރުގައި ލީޑްސް ޔުނައިޓެޑް އަތުން 4-2 އިން މޮޅުވެ، މެންޗެސްޓާ ޔުނައިޓެޑުން ހަަތަރު ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.
ޔުނައިޓެޑް ހަތަރު ވަނައިގައި އޮތީ 26 މެޗުން 46 ޕޮއިންޓާ އެކު އެވެ. ފަސް ވަނައިގައި އޮތް ވެސްޓް ހޭމް ޔުނައިޓެޑާއި ހަ ވަނައިގައި އޮތް އާސެނަލަށް ވަނީ 42 ޕޮއިންޓް ލިބިފަ އެވެ. ވެސްޓް ހޭމް ކުޅުނީ 26 މެޗެވެ. އާސެނަލުން އަދި ކުޅުނީ 23 މެޗެވެ. އަދި ހަތް ވަނައިގައި އޮތް ޓޮޓެންހަމް ހޮޓްސްޕާސް އިން 23 މެޗުން ވަނީ 39 ޕޮއިންޓް ހޯދައިފަ އެވެ.
ލީޑްސްގެ އެލަންޑް ރޯޑުގައި މިރޭ ކުޅުނު މެޗުގައި ޔުނައިޓެޑުން ލީޑުނެގީ ކެޕްޓަން ހެރީ މެގުއާ 34 ވަނަ މިނިޓްގައި ޖެހި ގޯލުންނެވެ. މިއީ ލޫކް ޝޯ ނެގި ކޯނަރަކުން މެގުއާ ބޮލުން ޖެހި ގޯލެކެވެ. މިއީ 2021 ވަނަ އަހަރުގެ އޭޕްރީލް މަހު ބާންލީ ކޮޅަށް ކޯނަރަކުން ލަނޑެއް ޖެހި ފަހުން ލީގުގައި ޔުނައިޓެޑުން ކޯނަރަކުން ގޯލެއް ޖެހި ފުރަތަމަ ލަނޑެވެ. މިއީ ލީގުގައި ޔުނައިޓެޑަށް އެންމެ ފަހުން ލިބުނު 138 ކޯނަރުގެ ތެރެއިން ޔުނައިޓެޑްގެ ފުރަތަމަ ގޯލެވެ.
ފުރަތަމަ ހާފުގެ އިތުރު ވަގުތުގައި ޖޭޑަން ސަންޗޯ ނަގައިދިން ހުރަހަކުން ބްރޫނޯ ފެނާންޑޭސް ބޮލުން ޖެހި ގޯލުން ޔުނައިޓެޑުން ލީޑުފުޅާކުރި އެވެ. ފެނާންޑޭސް އަކީ ޔުނައިޓެޑަށް ކުޅެމުން ލީގުގެ އެއް ސީޒަނެއްގައި ލީޑްސް ކޮޅަށް ހަތަރު ގޯލު ޖެހި ފުރަތަމަ ކުޅުންތެރިޔާ އެވެ.
ޔުނައިޓެޑުން ދެ ގޯލު ކުރީގައި އޮވެގެން ފުރަތަމަ ހާފު ނިންމާލި ނަމަވެސް ދެ ވަނަ ހާފް ފެށިގެން މާގިނައިރެއްނުވެ މެޗުގެ އޮއެވަރު ބަދަލުވި އެވެ. ލީޑްސް އިން ވަނީ ފުލުފުލުގައި ދެ ގޯލު ޖަހައި އެއްވަރުކޮށްފަ އެވެ. ލީޑްސް އަށް 98 ސިކުންތު ތެރޭ ދެ ގޯލު ޖަހައިގެން އެއްވަރުކުރިއިރު، ގޯލުތައް ޖެހީ ރޮޑްރީގޯ އާއި ރަފީނިއާ އެވެ. ރަފީނިއާ ކުޅެން އެރީ ބަދަލެއްގެ ގޮތުގަ އެވެ.
ޔުނައިޓެޑް މޮޅުކޮށްދިނީ ބަދަލެއްގެ ގޮތުގައި ކުޅެން އެރި ދެ ކުޅުންތެރިން ޖެހި ގޯލުތަކުންނެވެ. ޔުނައިޓެޑުން ލީޑުނެގީ 70 ވަނަ މިނިޓްގައި ސަންޗޯ ދިން ބޯޅައަކުން ފްރެޑް ޖެހި ގޯލުންނެވެ. އަދި މެޗު ނިމެން ދެ މިނިޓަށް ވެފައިވަނިކޮށް ޔުނައިޓެޑްގެ ހަތަރު ވަނަ ގޯލު ޖެހީ އެންތަނީ އެލަންގާ އެވެ. ފްރެޑާއި އެލަންގާ ކުޅެން އެރީ ނަތީޖާ އެއްވަރުވެފައި އޮއްވައި ބަދަލެއްގެ ގޮތުގަ އެވެ.
މި މެޗުގައި ޔުނައިޓެޑްގެ ފޯވާޑް ކްރިސްޓިއާނޯ ރޮނާލްޑޯ ލަނޑެއް ޖަހަން ކުރި މަސައްކަތް ކާމިޔާބެއްނުވި އެވެ. ފުރަަތަމަ ހާފުގައި ރޮނާލްޑޯ ހުސްކޮށް ހުރެފައި ޖެހި ބޯޅައެއް ލީޑްސް ކީޕަރު އިލާން މެލިއޭ ވަނީ ހުއްޓުވައިފަ އެވެ. މެޗުގެ ފަހު ކޮޅު ރޮނާލްޑޯގެ ބަދަލުގައި ރަފައެލް ވަރާން ކުޅެން އެރުވީ ނަތީޖާ ސަލާމަތްކުރަން ޑިފެންސްކުރާށެެވެ.
މިއީ 2003 ވަނަ އަހަރުގެ ފަހުން ލީޑްސް ދަނޑުގައި ސަޕޯޓަރުން ވައްދައިގެން ލީގުގައި ޔުނައިޓެޑާ ދެކޮޅަށް ކުޅުނު ފުރަތަމަ މެޗެވެ.
