ކެނެޑާގެ ވެރިރަށް އޮޓާވާގެ ޕާލިމެންޓު ކުރިމަތީގައި ތިން ހަފްތާ ވަންދެން ކުރި މުޒާހަރާ ރޫޅާލައި، ގިނަ ބަޔަކު ހައްޔަރުކޮށްފި އެވެ.
ފުލުހުން ބުނީ 170 އަށް ވުރެ ގިނަ މީހުން ހައްޔަރުކޮށް، 38 އުޅަނދެއް ބެލުމުގެ ދަށަށް ގެންގޮސްފައިވާ ކަމަށެވެ. ހޮނިހިރު ދުވަހު ވެސް މުޒާހަރާ ރޫޅާލަން މަސައްކަތް ކުރި އެވެ.
ފުލުހުންގެ އަމުރަށް ނުކިޔަމަންތެރިވި މީހުން ގަދަކަމުން ބިން މައްޗަށް ތިރިކޮށް، ފަހަތަށް ބިޑި އެޅުވި މަންޒަރު ނޫސްވެރިންނަށް ފެނުނެވެ.
ފުލުހުން ބުނީ މުޒާހަރާ ރޫޅާލުމަށް ހިންގާ އޮޕަރޭޝަން އަދިވެސް ނުނިމޭ ކަމަށެވެ. އެގޮތުން މުޒާހަރާގެ ބައެއް ބައިވެރިން ޕާލިމެންޓް އިމާރާތާ ދުރަށް އެއްވާން ފަށާފައިވާ ކަމަށް ރިޕޯޓުތައް ބުނެ އެވެ.
މިއީ ކެނެޑާގެ ފުލުހުންގެ ތާރީހުގައި ހިންގާ އެންމެ ބޮޑު އެއް އޮޕަރޭޝަނެވެ. ހުކުރު ދުވަހު މުޒާހަރާގެ ބައިވެރިން ފޮނުވާލަން މަސައްކަތް ކުރުމުން އެ މީހުން އެކަމަށް އިޖާބަ ދީފައެއް ނުވެ އެވެ.
ފުލުހުން ކުރި ޓްވީޓުތަކެއްގައި ބުނީ މުޒާހަރާގެ ބައިވެރިންނާއި ނަސޭހަތާއި ވަގުތު ދީގެން ވެސް އަމުރަށް ކިޔަމަންތެރި ނުވި ކަމަށާއި ފުލުހުންނަށް އަނިޔާވާ ފަދަ އަމަލު ކުރާތީ ޕެޕާ ސްޕްރޭ ބޭނުން ކުރަން ޖެހިފައިވާ ކަމަށެވެ.
ފުލުހުން ބުނީ ހައްޔަރުކުރި ބަޔެއް މީހުން ތިބީ ބޮޑީ އާމާ ހެދުން އަޅައިގެން ކަމަށާއި ބަޑި ބޭހާއި ދުން އަރުވާ ގްރެނޭޑް ވެސް ގެންގުޅުނު ކަމަށެވެ. އޭގެ އިތުރުން މުޒާހަރާއަށް ކުޑަކުދިން ގެނެސްފައި ވާތީ އެކަން ކުށްވެރިކުރި އެވެ.
"ފްރީޑަމް ކޮންވޯއި" މުޒާހަރާ ފެށީ ކެނެޑާގެ ޓްރަކު ޑްރައިވަރުން ކޮވިޑް ވެކްސިން ޖަހަން އެންގުމުން އެކަމާ ދެކޮޅަށެވެ. އެ މުޒާހަރާ ކޮޕީކޮށް ބައެއް އެހެން ގައުމުތަކުގައި ވެސް ކޮވިޑްގެ ފިޔަވަޅުތަކާ ދެކޮޅަށް މީހުން އެއްވި އެވެ.
