ތުރުކީގެ ހުޅަނގު އުތުރުގައި ނޫސްވެރިޔަކު މަސައްކަތް ކުރާ އޮފީހުގެ ދޮރު މަތީގައި އޭނާގެ ގަޔަށް ބަޑި ޖަހައި މަރާލައިފި އެވެ.
ގުންގޯރް އަރްސްލަން އަކީ ސެސް ކޮޗައެލި ނޫހުގެ ޑިރެކްޓަރު އަދި ޗީފް އެޑިޓަރެވެ. އޭނާގެ ގަޔަށް ބަޑި ޖެހުމުން މަރުވީ ހޮސްޕިޓަލުގައި ފަރުވާ ކުރަނިކޮށެވެ.
ފުލުހުން ބުނީ ޝައްކު ކުރެވޭ މީހަކު ހައްޔަރުކޮށްފައިވާ ކަމަށެވެ. ނަމަވެސް އޭނާއާ ގުޅޭ މައުލޫމާތެއް އަދި ހަމަލާއާ ގުޅޭ މައުލޫމާތެއް ވެސް ހާމަކޮށްފައެއް ނުވެ އެވެ.
ރިޕޯޓާޒް ވިތައުޓް ބޯޑާޒް (އާރްއެސްއެފް) ގެ ތުރުކީ މަންދޫބު އެރޮލް އޮންޑެރޮގްލޫ ވިދާޅުވީ އަރްސްލަން ދިޔައީ ކޮޗައެލި ސިޓީއާ ގުޅުން ހުރި ކޮރަޕްޝަންތަކެއް ތަހުގީގު ކުރަމުން ކަމަށެވެ.
އޭނާއަށް ހަމަލާދީ މަރާލުން ކުށްވެރި ކުރައްވަމުން އޮންޑެރޮގްލޫ ކަމާ ބެހޭ ފަރާތްތަކަށް ގޮވާލެއްވީ ހަމަލާ ދިން މީހުން ދެނެގަނެ، އަދަބު ދިނުމަށެވެ.
ސެސް ކޮޗައެލި ނޫހުން އެންމެ ފަހުން ނެރުނު ދެ އަދަދުގައި ވެސް އެ ސިޓީގެ މޭޔަރަށް ތުހުމަތުތަކެއް ކޮށްފައިވެ އެވެ. ވެރިކަން ކުރާ އޭކޭޕީ ޕާޓީއަށް ނިސްބަތްވާ މޭޔަރު ގިނަ ކޮންޓްރެކްޓުތަކެއް ދެނީ ޕާޓީއާ ގާތް މީހުންނަށް ކަމަށް އެ ނޫހުން ބުންޏެވެ.
މީގެ ކުރިން ވެސް އަރްސްލަން އަށް ހަމަލާއެއް ދޭން މަސައްކަތް ކޮށްފައިވެ އެވެ. އޭގެ އިތުރުން ލިޔުންތަކާ ހެދި އޭނާއާ ގުޅޭ ތަހުގީގެއް ވެސް ފުލުހުން ފެށި އެވެ.
އާރްއެސްއެފުން ނޫސްވެރިކަމުގެ މިނިވަންކަން ގިންތިކުރާ ލިސްޓުގައި ތުރުކީ ހިމެނެނީ 153 ވަނައިގަ އެވެ.
