ޕެރިސް (ފެބްރުއަރީ 20) - ފްރެންޗް ލީގުގައި ރޭ ނޯންޓުން ފުރަތަމަ ހާފުގައި ޖެހި ގޯލުތަކާ އެކު 3-1 އިން ޗެމްޕިއަން ޕީއެސްޖީ ބަލިކޮށްފި އެވެ.
މި މެޗުގައި ޕީއެސްޖީގެ ތަރި ނޭމާ އަތުން ވަނީ މުހިންމު ވަގުތެއްގައި ޕެނަލްޓީ އެއް ނާކާމިޔާބުވެފަ އެވެ.
ފްރެންޗް ލީގުގެ އެއް ވަނައިގައި ޕީއެސްޖީ އޮތީ 25 މެޗުން 59 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް ވަނީ 24 މެޗުން 46 ޕޮއިންޓް ލިބިފަ އެވެ. ތިން ވަނައިގައި އޮތް ނީސް އަށް ވަނީ 24 މެޗުން 42 ޕޮއިންޓް ލިބިފަ އެވެ.
ނޯންޓުން ރޭ އަމިއްލަ ދަނޑުގައި ކުޅުނު މެޗު ފަށައިގެން ޕީއެސްޖީ ކައިރީގައި މޮޅު ކުޅުމެއް ދެއްކި އެވެ. މެޗު ފަށައިގެން ހަތަރު ވަނަ މިނިޓްގައި ނޯންޓްގެ ސިމޯން މޮސެސް ހުސްކޮށްލާފައި އޭރިއާތެރެއަށް ދިން ބޯޅަ ކޯލޯ މުއާނީ ވަނީ ތިރިތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ. މެޗުގެ 16 ވަނަ މިނިޓްގައި ނޯންޓްގެ ލީޑުފުޅާކޮށްދިނީ އޭރިއާތެރެއިން ގޯލުގެ މަތީ ކަނަށް ބޯޅަ ފޮނުވާލައިގެން ކުއެންޓިން މާލިން އެވެ.
ފުރަތަމަ ހާފުގައި ޕީއެސްޖީގެ ގިނަ ހަމަލާތަކެއް ނޯންޓްގެ ކީޕަރު އަލްބާން ލަފޯންޓް ވަނީ މަތަކޮށްފަ އެވެ. އޭގެ ތެރޭގައި ނޭމާ އާއި ކީލިއަން އެމްބާޕޭ ފޮނުވާލި ހަަމަލާތައް ހިމެނެ އެވެ. ފުރަތަމަ ހާފުގެ އިތުރު ވަގުތުގައި ނޯންޓުން ތިން ވަނަ ގޯލެއް ޖެހި އެވެ. މިއީ ޕީއެސްޖީގެ ޖިއޮޖީނިއޯ ވައިނަލްޑަމް އަތުގައި ބޯޅަ ޖެހުމުން ދިން ޕެނަލްޓީ އެކެވެ. ޕެނަލްޓީ ކާމިޔާބުކުރީ ލުޑޯވިކް ބްލާސް އެވެ.
ރޭގެ މެޗަކީ ޕީއެސްޖީގެ ލިއޮނަލް މެސީ، ކްލަބް ކެރިއަރުގައި ކުޅުނު 800 ވަނަ މެޗެެވެ. ޕީއެސްޖީން ދެ ވަނަ ހާފް ފަށައިގެން ދެ ވަނަ މިނިޓްގައި އެ ޓީމުގެ ހަމައެކަނި ގޯލު ޖެހީ މެސީ ދިން ބޯޅައަކުން ނޭމާ އެވެ. އެކަމަކު، އޭގެ އިރުކޮޅެއް ފަހުން ޕީއެސްޖީ އަށް ލިބުނު ޕެނަލްޓީން ނޭމާ ފޮނުވާލި ބޯޅަ އަމާޒުވީ ކީޕަރު ލަފޯންޓް އަތަށެވެ.
މި މޮޅާ އެކު ނޯންޓުން ވަނީ 25 މެޗުން 38 ޕޮއިންޓް ހޯދައި، ލީގުގެ ފަސް ވަނަ އަށް ޖެހިލައިފަ އެވެ. ނޯންޓުން މަސައްކަތް ކުރަމުންދަނީ 2004 ވަނަ އަހަރަށް ފަހު ފުރަތަމަ ފަހަރަށް ޔޫރަޕްގެ މުބާރާތަކަށް ކޮލިފައިވުމަށެެވެ.
