މެޑްރިޑް (ފެބްރުއަރީ 20) - ސްޕެނިޝް ލީގުގައި ރޭ ދެ ވަނަ ހާފުގެ ގޯލުތަކާ އެކު ޑިޕޯޓިވޯ އަލަވޭސް 3-0 އިން ބަލިކޮށް ރެއާލް މެޑްރިޑުން އެއް ވަނައިގައި ހަތް ޕޮއިންޓުގެ ލީޑެއް ނަގައިފި އެވެ.
ރެއާލް އެއް ވަނައިގައި އޮތި 26 މެޗުން 57 ޕޮއިންޓް ހޯދައިގެންނެވެ. ދެ ވަނައިގައި އޮތް ސެވިއްޔާ އަށް 24 މެޗުން ލިބިފައިވަނީ 50 ޕޮއިންޓެވެ. ތިން ވަނައިގައި ރެއާލް ބެޓިސް އޮތީ 24 މެޗުން 43 ޕޮއިންޓާ އެކު އެވެ. އޮސަސޫނާ އަތުން ރޭ 3-0 އިން މޮޅުވި އެތުލެޓިކޯ މެޑްރިޑް ވަނީ ހަތަރަކަަށް ޖެހިލައިފަ އެވެ. އެއީ 25 މެޗުން 42 ޕޮއިންޓް ހޯދައިގެންނެވެ.
ރޭ ގްރަނާޑާ އަތުން 4-1 އިން މޮޅުވި ވިޔަރެއާލް ވަނީ ފަސް ވަނަ އަށް ޖެހިލައިފަ އެވެ. އެއީ ހަ ވަަނައިގައި އޮތް ބާސެލޯނާއާ އެއްވަރަށް ޕޮއިންޓް ހޯދައިގެންނެވެ. ވިޔަރެއާލުން 25 މެޗުން 39 ޕޮއިންޓް ހޯދިއިރު، ބާސެލޯނާ އެ އަދަދަށް ޕޮއިންޓް ހަމަކޮށްފައިވަނީ 23 މެޗުންނެވެ.
ފުރަތަަމަ ހާފުގައި ޑިޕޯޓިވޯ އަލަވޭސް އިން އެޓޭކްތަކެއް ކުރި ނަމަވެސް ރެއާލް ކީޕަރު ތިބައު ކޯޓުއާ ހާސްކޮށްލެވޭ ވަރުގެ ހަމަލާއެއް ފޮނުވާނުލެވުނެވެ. ރެއާލްގެ އެޓޭކް ވެސް މި ހާފުގައި ފެނުނީ ވަރަށް އާދައިގެ ގޮތަކަށެވެ. އެކަަމަކު، ދެ ވަނަ ހާފުގައި ކުޅުން ރަނގަޅުކޮށް ގިނަ ހަމަލާތަކެއް ފޮނުވާލި އެވެ.
މެޗުގެ 62 ވަނަ މިނިޓްގައި ރެއާލްގެ މާކޯ އަސެންސިއޯ އޭރިއާބޭރުން ޖެހި މޮޅު ގޯލުން ރެއާލް ލީޑުނެގި އެވެ. މި ގޯލު ޖެހުމުގެ ކުރިން އަސެންސިއޯ ފަހަތަށް ޖައްސާލި ބޯޅައެއް ހޯދައި ޑިޕޯޓިވޯ އަލަވޭސް އިން ލީޑުނުނެގީ ކިރިޔާ އެވެ.
ރެއާލްގެ ކެޕްޓަން ކަރިމް ބެންޒެމާ މެޗުގެ 76 ވަނަ މިނިޓްގައި އޭރިއާތެރެއިން ޖެހި ބޯޅައެއް ބޭރުވީ ގޯލުގެ ދަނޑީގައި ޖެހިފަ އެވެ. އޭގެ ތިން މިނިޓް ފަހުން އަސެންސިއޯ އާއި ބެންޒެމާ ގުޅިގެން އުފެއްދި އެޓޭކެއްގައި ގޯލު ކުރިމައްޗަށް ހުރަސްކޮށްލި ބޯޅަ ވިނީޝިއުސް ވަނީ ގޯލުގެ ތެރެއަށް ފޮނުވާލައިފަ އެވެ.
އިތުރު ވަގުތުގެ ފުރަތަމަ މިނިޓް ތެރޭ ޕެނަލްޓީ އަކުން ރެއާލްގެ ތިން ވަނަ ގޯލު ޖެހީ ބެންޒެމާ އެވެ. މިއީ އޭރިއާތެެރެއިން ރެއާލްގެ ރޮޑްރީގޯ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
އޮސަސޫނާ ކޮޅަށް އެތުލެޓިކޯގެ ގޯލުތައް ޖެހީ ޔާއޯ ފެލިކްސް، ލުއިސް ސުއަރޭޒް އަދި އެންހެލް ކޮރޭއާ އެވެ.
