އަފްގާނިސްތާނުގެ މައިނޯރިޓީ ކަމުގައިވާ ހިންދޫންނާއި ސިކް ދީނުގެ ވަފުދެއް އިންޑިއާގެ ބޮޑު ވަޒީރު ނަރެންދްރަ މޯދީއާ ބައްދަލުކުރައްވައިފި އެވެ.
އެ ބައްދަލުވުން އޮތީ ހޮނިހިރު ދުވަހު މޯދީގެ ރަސްމީ ގެކޮޅުގަ އެވެ. އަފްގާނިސްތާނުގެ ގިނަ އަދަދެއްގެ ހިންދޫންނާއި ސިކް މީހުން ދިރިއުޅެނީ އިންޑިއާގަ އެވެ.
މިދިޔަ އަހަރުގެ އޯގަސްޓް މަހު ތާލިބާނުން ވެރިކަމަށް އައުމާ އެކު އިންޑިއާ ސަރުކާރުން އިސް ނަގައިގެން ވަނީ އަފްގާނިސްތާނުގެ ގިނަ އަދަދެއްގެ ހިންދޫންނާއި ސިކް މީހުން އިވެކުއޭޓް ކޮށްފަ އެވެ.
ހޮނިހިރު ދުވަހުގެ ބައްދަލުވުމުގައި މޯދީ ވިދާޅުވީ އެ މީހުންނަކީ މެހެމާނުން ނޫން ކަމަށާއި އިންޑިއާއަކީ އެ މީހުންގެ އަމިއްލަ ގެކަމުގައި ދެކެން އެދިވަޑައިގަންނަވާ ކަމަށެވެ.
އަފްގާނިސްތާނުގެ ހިންދޫންނާއި ސިކް މީހުންގެ ވަފުދަކާ މޯދީ ބައްދަލުކުރެއްވި އިރު، އިންޑިއާގެ ޕަންޖާބް ސްޓޭޓްގެ ގާނޫނު ހަދާ މަޖިލީހުގެ ވޯޓުލުން އާދީއްތަ ދުވަހު ފަށާނެ އެވެ. އެ ސްޓޭޓަކީ ގިނަ އަދަދެއްގެ ސިކް ދީނުގެ މީހުން ދިރިއުޅޭ ސްޓޭޓެކެވެ.
މޯދީއާ ބައްދަލުކުރި ވަފުދުން ބުނީ އެމަނިކުފާނަކީ ހަމައެކަނި އިންޑިއާގެ ބޮޑު ވަޒީރު ނޫން ކަމަށާއި އެއީ "މުޅި ދުނިޔޭގެ ވެސް ބޮޑު ވަޒީރު" ކަމަށެވެ.
ވަފުދުން މޯދީއަށް ހަދިޔާއަކަށް އެރުއްވީ އަފްގާނިސްތާނުގެ ސަގާފީ ހެދުންކޮޅެކެވެ. ބައްދަލުވުމުގެ ތެރެއިން މޯދީ ވަނީ އެ ހެދުންކޮޅު ތުރުކުރައްވައި، ފޮޓޯ ނަންގަވާފަ އެވެ.
މޯދީގެ ސަރުކާރުން 2019 ވަނަ އަހަރު ފާސްކުރި ސިޓިޒެންޝިޕް ގާނޫނުގެ ދަށުން ޕާކިސްތާނާއި ބަންގްލަދޭޝް އަދި އަފްގާނިސްތާނުގެ މުސްލިމް ނޫން މައިނޯރިޓީ މީހުންނަށް އިންޑިއާގެ ރައްޔިތުކަން ލިބުމަށް މަގުފަހިވެ އެވެ.
އެ ގާނޫނަކީ މުސްލިމުންނާ މެދު ތަފާތު ކުރާ ގާނޫނެއް ކަމަށް ބުނެ، ގިނަ ބަޔެއްގެ ކަންބޮޑުވުންތައް މީގެ ކުރިން އެތައް ފަހަރެއްގެ މަތިން ފާޅުކޮށްފައިވެ އެވެ.
