ވިޔަފާރިކުރާ ފަރާތްތަކާ އެކު ސަރުކާރުން އޮންނަން ޖެހޭނެ ގުޅުމާ ބެހޭ ގޮތުން ދިވެހިރާއްޖޭގެ ޓޫރިޒަމްގެ ބާނީ މުހައްމަދު އުމަރު މަނިކު (އެމްޔޫ މަނިކު) ދެއްވި ހިޔާލަށް، ރައީސް އިބްރާހިމް މުހައްމަދު ސޯލިހު ތާއީދު ކުރައްވާ ސާފު ޖަވާބެއް ދެއްވައިފި އެވެ.
ޓޫރިޒަމް މިނިސްޓްރީން އިންތިޒާމު ކޮށްގެން ބުރާސްފަތި ދުވަހު ބޭއްވި އަޕްބީޓް ޓޯކް ޝޯގައި، ސަރުކާރުން ޓޫރިޒަމްގަ ބައިވެރިވުން އޮންނަން ޖެހޭ ގޮތާ މެދު ދެކިވަޑައިގަންނަވަނީ ކިހިނެތްތޯ ޓޫރިޒަމް މިނިސްޓަރު ޑރ، އަބްދުއްﷲ މައުސޫމް އެމްޔޫ މަނިކަށް ސުވާލު ކުރެއްވި އެވެ.
އެ ސުވާލުގެ ޖަވާބުގައި އެމްޔޫ މަނިކު ވިދާޅުވީ، ޓޫރިޒަމް ކާމިޔާބުވީ އަމިއްލަ ފާރްތަކުން ޓޫރިޒަމް ކުރިއެރުމަށް ކުރި މަސައްކަތާ ސަރުކާރުން ނުބެހި އޮތުމުން ކަމަށާއި، އަމިއްލަ ފަރާތްތަކުން ޓޫރިޒަމް ތަރައްގީ ކުރުމަށް ދޫކޮށްލަން ޖެހޭ ކަމަށެވެ. އެނާ ވިދާޅުވި ގޮގުގައި ސަރުކާރުގެ ދައުރަކަށް ވާން ޖެހޭނީ ރެގިޔުލޭޓް ކުރުމާއި ޓެކްސް ނެގުމުގެ ކަންކަން ބެލެހެއްޓުމެވެ.
"ސަރުކާރު ވާންޖެހޭނީ ރެގިޔުލޭޓު ކުރާ ބަޔަކަށް، ތަރައްގީ ކުރުން ދޫކޮށްލާފައި އޮންނަން ޖެހޭނީ އަމިއްލަ ފަރާތްތަކަށް، ސަރުކާރަށް ބުނަން އޮތް ވާހަކަ އަކީ ކަންކަން ކުރެވޭނެ ގޮތަށް ފަސޭހަ ކޮށްދޭށޭ، ތަރައްގީ އައީ ކަންކަން ފަސޭހަކޮށް ކުރެވޭ ގޮތަށް އޮތީމަ،" މަނިކު އެމަނިކުފާނުގެ ދެކިވަޑައިގަންނަވާ ގޮތް ހާމަ ކުރައްވަމުން ވިދާޅުވި އެވެ.
އެމްޔޫ މަނިކު މި ހިޔާލު ފާޅުކުރައްވާފައި ވަނިކޮށް، ޅ. މަޑިވަރު އެއަރޕޯޓް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ސޯލިހު އިއްޔެ ވިދާޅުވީ "ސަރުކާރުގެ ސިޔާސަތަކީ، ރާއްޖޭގައި ވިޔަފާރި ކުރަން ބޭނުންވާ ދިވެހި ވިޔަފާރިވެރިންނަށް ވީހާވެސް ފަސޭހަ ގޮތްތައް ހޯދައިދިނުން" ކަމަށެވެ.
ގައުމު ތަރައްގީވެގެން ދާނީ، ސަރުކާރާއި އަމިއްލަ ވިޔަފާރިވެރިން ގުޅިގެން އެކުގައި މަސައްކަތް ކޮށްގެން ކަމަށާއި ސަރުކާރުގެ ސިޔާސަތުތައް ބައްޓަން ކުރަމުން ގެންދަނީ، އަމިއްލަ ވިޔަފާރިވެރިންނަށް ކުރިމަތިވެފައި ހުރި ދަތިތައް ނައްތާލައި، ފަސޭހަ ގޮތްތައް ގާނޫނާއި ގަވާއިދުގެ ތެރެއިން ހޯދައިދިނުމަށް ކަމަށް ރައީސް ވިދާޅުވި އެވެ.
"މިކަމުގައި އަޅުގަނޑުމެން ކުރިއަށްދާނެކަމުގެ ޔަގީން ކަން، މިތާ މިތިއްބެވި ވިޔަފާރިވެރިންނަށް އަޅުގަނޑު މިއަދުވެސް އަރުވަން،" ރައީސް ސޯލިހު ވިދާޅުވި އެވެ.
މަޑިވަރު އެއާޕޯޓަކީ ވެސް އަމިއްލަ ފަރާތެއް ކަމަށްވާ ކުރެއްދޫ ހޯލްޑިންގްސް ޕްރައިވެޓް ލިމިޓެޑުން އިންވެސްޓުކޮށް ތަރައްގީކުރި އެއާޕޯޓެކެވެ. ރޭގަނޑާއި ދުވާލު ފްލައިޓް ޖެއްސޭ ގޮތަށް ހަދާފައިވާ އެ އެއާޕޯޓުގެ ފުރިހަމަކަން ރައީސް ވަނީ ފާހަގަ ކުރައްވާފަ އެވެ.
