ސްރީލަންކާގައި 2019 ވަނަ އަހަރު ދިން އީސްޓާ ހަމަލާ ހުއްޓުވުމުގައި އިހުމާލުވި ކަމަށް ތުހުމަތުވި ދެ އިސް އޮފިޝަލުންގެ ކުށެއް ނެތް ކަމަށް ހައި ކޯޓުން ކަނޑައަޅައިފި އެވެ.
ދެހާސް ނަވާރަ ވަނަ އަހަރުގެ އޭޕްރިލް މަހު ބަޔަކު ހަމަލާތަކެއް ދޭން އުޅޭ ކަމަށް ބުނެ، އިންޑިއާގެ ޖާސޫސީ އެޖެންސީއިން ސްރީލަންކާއަށް އިންޒާރު ދިނެވެ.
މިދިޔަ ނޮވެމްބަރު މަހު ދެ އޮފިޝަލުންނަށް ދައުވާ ކުރީ އިންޒާރަށް އަމަލު ކުރުމުގައި ފެއިލްވި ކަމަށް ބުނެ އެވެ. ނަމަވެސް ހައި ކޯޓުގެ ތިން ފަނޑިޔާރުންގެ ބެންޗުން ހުކުރު ދުވަހު ކަނޑައެޅީ 855 ދައުވާ ވެސް ބާތިލް ކަމަށެވެ.
ތުހުމަތުވި ދެ މީހުންނަކީ ޑިފެންސް މިނިސްޓަރުގެ ކުރީގެ ސެކެޓްރީ ހެމަސިރީ ފެނަންޑޯ އާއި ކުރީގެ އިންސްޕެކްޓާ ޖެނެރަލް އޮފް ޕޮލިސް ޕުޖިތް ޖަޔަސުންދަރަ އެވެ.
ހައި ކޯޓުގެ އޮފިޝަލަކު ބުނީ ތިން ފަނޑިޔާރުން ވެސް އެއްބަސްވީ އެ މީހުންނަކީ ކުށެއް ނެތް ބަޔަކަށް ވާތީ ދިފާއީ ހެކިން ހާޒިރު ނުކޮށް މައްސަލަ ނިންމާލަން ކަމަށެވެ.
ސްރީލަންކާގެ އިސްލާމީ ހަރުކަށި ފިކުރުގެ ގްރޫޕަކުން ކޮލޮމްބޯގެ ތިން ފައްޅި އާއި ތިން ހޮޓަލުގައި ދިން ބޮމުގެ ހަމަލާތަކުގައި 279 މީހުން މަރުވެ، 500 އަށް ވުރެ ގިނަ މީހުން ޒަހަމްވި އެވެ.
ފެނަންޑޯ އާއި ޖަޔަންސުންދުރަ ހައްޔަރު ކުރީ 2019 ވަނަ އަހަރު އެވެ. ހަތަރު މަސް ވަންދެން ބަންދުގައި ބޭތިއްބުމަށް ފަހު ކަފާލާތުގެ ދަށުން އެ މީހުން ދޫކޮށްލި އެވެ.
ޖަޔަސުންދުރަ އަކީ ލަންކާގެ ފުލުހުންގެ ހިދުމަތުގެ 155 އަހަރުވީ ތާރީހުގައި ހައްޔަރު ކުރި އެންމެ އިސް ފުލުހެވެ.
