ސްރީލަންކާގެ ދައުލަތުގެ ތެޔޮ ކުންފުނިން ފައިސާ ހުސްވެފައިވާ ކަމަށާއި ގައުމަށް ދިމާވެފައިވާ ތެލުގެ ދަތިކަމުގެ މައްސަލަ އިތުރަށް ގޯސްވެދާނެ ކަމަށް ހަކަތައާ ބެހޭ މިނިސްޓަރު ހުކުރު ދުވަހު ވިދާޅުވެއްޖެ އެވެ.
އުދަޔަ ގައްމަންޕިލަ ވިދާޅުވީ ދަރަނިވެރިފައިވާ ސިލޯން ޕެޓްރޯލިއަމް ކޯޕޮރޭޝަން (ސީޕީސީ) ގެ ދަރަނި ދަނީ އުފުލެމުން ކަމަށާއި ބޭރުން ތެލުގެ ސަޕްލައި ގެންނާނެ ފައިސާ ވެސް ނެތް ކަމަށެވެ.
އޭނާ ވިދާޅުވީ ސަރުކާރުން ކަނޑައަޅާފައިވާ އަގުގައި ޑީސެލް ވިއްކައިގެން ސީޕީސީއަށް 42 ޕަސެންޓުގެ ބޮޑު ގެއްލުމެއް ލިބިފައިވާ ކަމަށެވެ.
ލަންކާގެ ޕަބްލިކް ޓްރާންސްޕޯޓަށް އެންމެ ގިނައިން ބޭނުން ކުރަނީ ޑީސެލް އެވެ. ވެރިރަށް ކޮލޮމްބޯ ނޫން ތަންތަނުގައި ޑީސެލް ނުލިބޭކަމުގެ ޝަކުވާ ވަނީ ބޮޑުވެފަ އެވެ.
"ކުރިން އަޅުގަނޑުމެންނަށް ދަތިވީ ތެޔޮ އިމްޕޯޓް ކުރާނެ ޑޮލަރު ހޯދަން. މިހާރު ޑޮލަރު ގަންނަން ބޭނުންވާ ރުޕީޒްގެ ދަތިކަމެއް މި ކުރިމަތިވަނީ،" ގައްމަންޕިލަ ނޫސްވެރިންނަށް ވިދާޅުވި އެވެ.
އޭނާ ވިދާޅުވީ 2021 ވަނަ އަހަރު އެކަނިވެސް ސީޕީސީއަށް 415 މިލިއަން ޑޮލަރު ނުވަތަ 83 ބިލިއަން ރުޕީޒްގެ ގެއްލުމެއް ލިބުނު ކަމަށެވެ.
"ތެލުން ނަގާ ޓެކްސްތައް އުވާލި ނަމަވެސް، ލިބުނު ގެއްލުން ރިކަވާ ނުކުރެވޭނެ. ތެލުގެ އަގު މަތި ނުކުރާ ނަމަ ނުވަތަ ޓްރެޝަރީއިން ބެއިލްއައުޓެއް ނުދޭ ނަމަ، ތެލުގެ ބޮޑު ތަދަކާ ދިމާވާނެ."
އެކަމާ ގުޅޭ ގޮތުން ލަންކާގެ ފިނޭންސް މިނިސްޓްރީއިން އަދި ވަކި އެއްޗެއް ނުބުނެ އެވެ.
ލަންކާއަށް ކުރިމަތިވެފައިވާ ބޭރު ފައިސާގެ ދަތިކަމުގެ ސަބަބުން ހަކަތައިގެ ސިނާއަތަށް ވަނީ ވަރަށް ބޮޑަށް އަސަރުކޮށްފަ އެވެ. އެ ސިނާއަތަށް ބޭނުންވާ ތެޔޮ ޖެހެނީ އިމްޕޯޓް ކުރާށެވެ.
ތެޔޮ ނުލިބޭތީ ތާމަލް ކަރަންޓު އުފައްދާ ޖެނެރޭޓަރުތައް ބަންދު ކުރުމާ އެކު، ލަންކާގެ އެކި ހިސާބުތަކުން ދަނީ ވަރަށް ގިނައިން ކަރަންޓު ކެނޑެމުންނެވެ.
