އަފްގާނިސްތާނުގެ ދެކުނު ޒަބުލް ޕްރޮވިންސްގައި މީގެ ދެ ދުވަސް ކުރިން ވަޅަކަށް ވެއްޓި، ތާށިވި ނުވަ އަހަރުގެ ފިރިހެން ކުއްޖަކު ސަލާމަތް ކުރުމުގެ މަސައްކަތް އެބަ ކުރެ އެވެ.
ޝޮކަކް އަވަށުގައި ރެސްކިއު އޮޕަރޭޝަން ފަށާފައިވާ އިރު، މީގެ ކުޑަ ދުވަސްކޮޅެއް ކުރިން މޮރޮކޯގައި ވެސް ފަސް އަހަރުގެ ކުއްޖަކު ވަޅަކަށް ވެއްޓުނެވެ.
ރަޔަން ނަމަކަށް ކިޔާ އެ ކުއްޖާ ސަލާމަތް ކުރަން ބޮޑު އޮޕަރޭޝަނެއް ކުރިއަށް ގެންދިޔަ އިރު، އެކަމަށް މުޅި ދުނިޔޭގެ ސަމާލުކަން ލިބުނެވެ. ނަމަވެސް އެ ކުއްޖާއާ ހަމައަށް ފޯރިއިރު އޮތީ މަރުވެފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ ހައިދަރް ނަމަކަށް ކިޔާ ކުއްޖަކު ވަޅެއްގައި ތާށިވެފައި ހުރި މަންޒަރެވެ.
އެ ކުއްޖާގެ ބައްޕަ ދަރިފުޅުގެ ހާލު ރަނގަޅުތޯ ސުވާލު ކުރާ އަޑު ވީޑިއޯއިން އިވެ އެވެ. އަދި ބައްޕައާ ވާހަކަ ދެއްކުމަށާއި، ސަލާމަތް ކުރަން އެބަ އުޅޭ ކަމަށާއި ނުރޮއެ ހުންނަން އެދޭ ކަމަށް އެ މީހާ ބުނެ އެވެ.
ޖަވާބުގައި އެ ކުއްޖާ ބުނީ ބައްޕައާ ވާހަކަ ދައްކަމުން ދާނެ ކަމަށެވެ. އެ ވީޑިއޯ ނެގީ ރެސްކިއު ޓީމުން ވަޅުގެ ތެރެއަށް ތިރި ކުރި ކެމެރާއަކުންނެވެ.
އަވަށުގެ އޮފިޝަލުން ބުނީ ހައިދަރް ތާށިވެފައި ހުރީ 10 މީޓަރު ފުން ހިސާބެއްގައި ކަމަށެވެ. އެ ސަރަހައްދުގައި އެމްބިއުލާންސާއި އެހެން ޓީމުތައް ވެސް އެބަ އުޅެ އެވެ.
ޑެޕިއުޓީ ބޮޑު ވަޒީރުގެ ސެކެޓްރީ އަބްދުﷲ އައްޒާމް ކުރި ޓްވީޓެއްގައި ބުނީ އެމްބިއުލާންސާއި އޮކްސިޖަން އަދި ބޭނުންވާ އެހެން ސާމާނު ވެސް ފޮނުވާފައިވާ ކަމަށެވެ.
ރެސްކިއު ޓީމުން ދަނީ ވަޅު ކައިރިން އަޑިއަށް ކޮނެ، ހޮރިޒޯންޓަލްކޮށް މަގެއް ކޮނެ، ހައިދަރް ހުރި ހިސާބަށް ދެވޭތޯ ބަލަމުންނެވެ. އެ ނޫން ގޮތަކަށް ސަލާމަތް ކުރަން މަސައްކަތްކޮށްފި ނަމަ، ވަޅުގެ ތެރެއަށް ފަސް އެޅި، ކުއްޖާ މަރުވުމުގެ ފުރުސަތު ބޮޑެވެ.
