ސައުދީ އަރަބިއްޔާގައި އަންހެން ރޭލު ޑްރައިވަރުންގެ 30 ވަޒީފާއަށް ހުޅުވާލުމުން 28،000 އަށް ވުރެ ގިނަ ފޯމު ލިބިފައިވާ ކަމަށް ރޭލު ކުންފުނި، ރެންފޭއިން ބުނެފި އެވެ.
އެ ވަޒީފާއަށް ހޮވޭ ފަރާތްތަކުން އެއް އަހަރުގެ ތަމްރީނަށް ފަހު ހައި ސްޕީޑް ރޭލު ދުއްވާނީ މައްކާ އާއި މަދީނާއާ ދެމެދު އެވެ.
މިއީ ސައުދީ އަރަބިއްޔާގައި ރޭލު ޑްރައިވަރުންގެ ގޮތުގައި އަންހެނުންނަށް ވަޒީފާގެ ފުރުސަތު ހުޅުވާލި ފުރަތަމަ ފަހަރެވެ.
ގިނަ ޒަމާންތަކެއް ވަންދެން މަސައްކަތްތެރިންގެ އާބާދީގެ ތެރޭގައި އެންމެ މަދުން އަންހެނުން ހިމެނުނު ގައުމަކަށް އޮތީ ސައުދީ އަރަބިއްޔާ އެވެ.
ނަމަވެސް ފަހަކަށް އައިސް، ސަރުކާރުން ދަނީ މަސައްކަތުގެ މައިދާނުގައި އުޅޭ އަންހެނުންގެ އަދަދު އިތުރު ކުރަން ފިޔަވަޅުތަކެއް އަޅަމުންނެވެ.
އޭގެ އިތުރުން އަންހެނުންނަށް ކާރު ދުއްވުމުގެ ހުއްދަދީ، އާއިލާގެ ފިރިހެން މެމްބަރަކާ ނުލައި ވެސް ދަތުރު ކުރެވޭ ގޮތަށް ސަރުކާރުން މިހާރު ވަނީ ހަމަޖައްސާފަ އެވެ.
ނަތީޖާއެއްގެ ގޮތުން ފާއިތުވި ފަސް އަހަރުގެ ތެރޭގައި ވަޒީފާގެ މައިދާނުގައި އުޅޭ އަންހެނުންގެ އަދަދު ވަނީ ދެ ގުނަ އިތުރުވެ، 33 ޕަސެންޓަށް އަރާފަ އެވެ.
މިދިޔަ އަހަރުގެ ފުރަތަމަ ހަ މަސް ދުވަހުގައި ވަޒީފާގެ މައިދާނަށް ވަތް ފިރިހެނުންނަށް ވުރެ އަންހެނުން ގިނަ ކަމަށް ވެސް ތަފާސްހިސާބުން ދައްކަ އެވެ.
