ކޮވިޑާ ގުޅިގެން އަޅާފައިވާ ފިޔަވަޅުތަކާ ދެކޮޅަށް ކުރަމުންދާ މުޒާހަރާތަކާ މެދު އަމަލު ކުރެއްވި ގޮތަށް ފާޑުކިޔުން އަމާޒުވެފައި ވާތީ އޮޓާވާ ފުލުހުންގެ ވެރިޔާ ޕީޓާ ސްލޯލީ އިސްތިއުފާ ދެއްވައިފި އެވެ.
ކެނެޑާގެ ވެރިރަށް އޮޓާވާ ސިޓީގެ މަގުތައް ބަންދުކޮށް "ފްރީޑަމް ކޮންވޯއި" މުޒާހަރާ ކުރިއަށް ދާތާ 19 ދުވަސް ވެއްޖެ އެވެ. ސިޓީ ހުއްޓުމަކަށް އައިސްފައި ވާތީ އާއްމުންގެ ޝަކުވާ ބޮޑެވެ.
އޮޓާވާ ޕޮލިސް ސާވިސަސް ބޯޑުން ބުނީ ސްލޯލީ އިސްތިއުފާ ދެއްވާފައިވާ ކަމަށެވެ. ޓްވިޓާގައި އާއްމު ކުރެއްވި ބަޔާނެއްގައި ސްލޯލީ ވަނީ މަސައްކަތް ދިފާއު ކުރައްވާފަ އެވެ.
ސްލޯލީ އޮޓާވާ ފުލުހުންގެ ޗީފްގެ މަގާމާ ހަވާލުވެވަޑައިިގެންނެވީ 2019 ވަނަ އަހަރު އެވެ. އޭނާ ވަނީ ޓޮރޮންޓޯގެ ފުލުހުންނާ އެކު 30 އަހަރު ހިދުމަތް ކުރައްވާފަ އެވެ.
މުޒާހަރާތަކާ ގުޅިގެން އޮޓާވާގެ މޭޔަރު ކުއްލި ނުރައްކަލުގެ ހާލަތު އިއުލާނު ކުރެއްވީ މީގެ ހަފްތާއެއް ކުރިންނެވެ. ހޯމަ ދުވަހު ބޮޑު ވަޒީރު ޖަސްޓިން ޓްރޫޑޯ ވަނީ އެމެޖެންސީޒް ގާނޫނަށް އަމަލު ކުރަން ފައްޓަވާފަ އެވެ.
ޓްރޫޑޯ ވިދާޅުވީ ގާނޫނުގެ ދަށުން ފުލުހުންނަށް އިތުރު ބާރުތައް ލިބޭނެ ކަމަށާއި ރޯޔަލް ކެނޭޑިއަން މައުންޓަޑް ޕޮލިސް އަދި އޮންޓާރިއޯ ޕްރޮވިންޝަން ޕޮލިހުން ވެސް އޮޓާވާގެ ފުލުހުންނަށް އެހީވާނެ ކަމަށެވެ.
މުޒާހަރާއިން އަންގާރަ ދުވަހު ހައްޔަރު ކުރި 11 މީހުންގެ އަތުގައި ގިނަ އަދަދެއްގެ ހަތިޔާރު ހުއްޓެވެ. އެ މީހުންނަށް ތުހުމަތު ކުރެވެނީ ފުލުހުން މަރަން ރޭވި ކަމަށެވެ.
އޮޓާވާ ސިޓީގެ މެދުގައި މަގުތައް ބަންދުކޮށްގެން 400-500 ޓްރަކް އަދިވެސް ޕާކުކޮށްފައި އެބަ އޮތެވެ. އެ ސިޓީގެ އިތުރުން އެހެން ހިސާބުތަކުގައި ވެސް ދަނީ މުޒާހަރާ ކުރަމުންނެވެ.
