އޮސްޓްރޭލިއާއިން ރައްކާތެރިކަން ހޯދަން އެދި، ހިޖުރަ ކުރާ މީހުން ބަންދުގައި އެވްރެޖުކޮށް 689 ދުވަސް ހޭދަކުރާ ކަމަށް ބުނެ، ހިޔުމަން ރައިޓްސް ވޮޗްއިން އެ ގައުމުގެ އިމިގްރޭޝަން ސިޔާސަތަށް ފާޑުކިޔައިފި އެވެ.
އެ ޖަމިއްޔާއިން އެގޮތަށް ބުނީ ކޮވިޑް ވެކްސިން މައްސަލައިގައި ޓެނިސް ކުޅުންތެރިޔާ ނޯވަކް ޖޮކޮވިޗް އޮސްޓްރޭލިއާއަށް އެތެރެވިޔަ ނުދީ، ހޮޓަލެއްގައި ބަންދު ކުރިތާ މަހެއް ފުރުނު ދުވަހާ ދިމާކޮށެވެ.
ޖޮކޮވިޗް އޮސްޓްރޭލިއާއިން ޑީޕޯޓުކޮށްލާފައިވާ އިރު، އޭނާ ބަންދުގައި ހުންނަން ޖެހުމުން އޮސްޓްރޭލިއާއިން ގެންގުޅޭ "ހަރުކަށި އަދި ލާއިންސާނީ" އިމިގްރޭޝަން ސިޔާސަތުގެ ވާހަކަ ވަނީ ފެތުރެން ފަށާފަ އެވެ.
ޖޮކޮވިޗް ބަންދުކޮށްފައި ހުރި ޑިޓެންޝަން ހޮޓަލުގައި މި ވަގުތު ވެސް 32 ރެފިއުޖީން އެބަ ތިބި ކަމަށް އެކްޓިވިސްޓުން ބުނެ އެވެ.
ދުނިޔޭގެ އެއް ވަނަ ޓެނިސް ތަރީގެ ކުރު ބަންދާ ހިލާފަށް، އުމުރުން 24 އަހަރުގެ އިރާނުގެ ރެފިއުޖީ އަކު ހަމަ އެ ހޮޓަލުގައި ބަންދުކޮށްފައި ހުންނަތާ މިހާރު ދެ އަހަރު ވެއްޖެ އެވެ. އޭނާ ދޫކޮށްލާނެ ތާރީހެއް އަދިވެސް ނޭނގެ އެވެ.
"މި އިމާރާތުގައި ދިރިއުޅޭ މީހުން ތިބީ މިނިވަންކަން ހޯދަން ކެތްމަދުވެފައި،" މެހްދީ އަލީ ބުންޏެވެ. އޭނާ އަކީ އިރާނުގެ އަހްވާޒީ އަރަބް މައިނޯރިޓީ ދަރިކޮޅުގެ މީހެކެވެ.
މެހްދީ އަލީ އޮސްޓްރޭލިއާއަށް އެތެރެވީ އުމުރުން 15 އަހަރުގައި.
މެހްދީ އިރާނުން ފިލައިގެން އޮސްޓްރޭލިއާއަށް ދަތުރު ކުރީ އުމުރުން 15 އަހަރުގަ އެވެ. އޮސްޓްރޭލިއާގެ އިމިގްރޭޝަން އިދާރާތަކުން އޭނާ ބަންދުކޮށްގެން އުޅޭ ނުވަ އަހަރު ވެއްޖެ އެވެ.
އޮސްޓްރޭލިއާ ސަރުކާރުން މިދިޔަ ސެޕްޓެމްބަރު މަހު ނެރުނު ރިޕޯޓަކާ ހަވާލަދީ ހިޔުމަން ރައިޓްސް ވޮޗްއިން ބުނީ އެވްރެޖުކޮށް 689 ދުވަސް ރެފިއުޖީން ބަންދުގައި ހޭދަކުރަން ޖެހޭ އިރު، އެއީ ރެކޯޑެއް ކަމަށެވެ.
ރައްކާތެރިކަމަށް އެދި އެތެރެވާ މީހުންނަށް ގިނަ ގައުމުތަކުގައި އާއްމުންގެ ތެރޭގައި ދިރިއުޅުމުގެ ފުރުސަތު ދެ އެވެ. ނަމަވެސް ކަނޑު މަގުން އޮސްޓްރޭލިއާއަށް އެތެރެވާ ހުރިހާ ރެފިއުޖީން ވެސް ކުރަނީ ބަންދެވެ.
މިހާރު ވެސް އެގޮތަށް 1،459 މީހުން ބަންދުގައި ތިބި އިރު އެ މީހުން ބަންދުގައި ބެހެއްޓޭނެ މުއްދަތެއް ވެސް ކަނޑައަޅާފައެއް ނޯވެ އެވެ.
"ބައިނަލްއަގްވާމީ ގާނޫނުގެ ދަށުން، ހިޖުރަ ކުރާ މީހުން ބަންދު ކުރުމަކީ އަދަބެއްގެ ގޮތުގައި ބޭނުންކޮށްގެން ނުވާނެ. އެ ފިޔަވަޅަކީ ގާނޫނީ މަގްސަދެއް ހާސިލް ކުރުމަށް އަޅަން ޖެހޭ އެންމެ ފަހު ފިޔަވަޅު،" އެ ޖަމިއްޔާއިން ބުންޏެވެ.
ދެހާސް ތޭރަ ވަނަ އަހަރުން ފެށިގެން އޮސްޓްރޭލިއާއިން ދަނީ ކަނޑު މަގުން ބޯޓުގައި އެތެރެވާ ހުރިހާ ރެފިއުޖީން ހައްޔަރު ކުރަމުންނެވެ. އަދި އެ މީހުންނަށް ދާއިމީކޮށް އޮސްޓްރޭލިއާގައި ނޫޅެވޭނެ ކަމަށް ބުނެފައިވެ އެވެ.
އިމިގްރޭޝަން ސިޔާސަތު ދިފާއުކޮށް އޮސްޓްރޭލިއާ ސަރުކާރުން ބުނަނީ އެއީ އެ ގައުމުގެ ރައްކާތެރިކަން ހޯދަން މީހުން އައުން މަދު ކުރުމަށާއި ކަނޑު މަތީގައި މީހުން މަރުވުން މަދު ކުރުމަށް ރަނގަޅު ސިޔާސަތެއް ކަމަށެވެ.
