ސައްހަ ލިޔެކިއުން ނެތި މާލޭގެ މަގުތަކުގައި މަސައްކަތް ހޯދަން އުޅުނު ގިނަ އަދަދެއްގެ ބިދޭސީން ބައެއް ރިސޯޓްތަކަށް ގެންގޮސް، އެތަންތަނުން ދިވެހިން މަދުކޮށްފައިވާ ކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސާ މިއަދު ތުހުމަތުު ކުރައްވައިފި އެވެ.
އަހުމަދު އީސާއަކީ ޓޫރިޒަމް ދާއިރާގެ މުވައްޒަފުންގެ ޔޫނިއަން، ޓޫރިޒަމް އެމްޕްލޯއީސް އޮފް މޯލްޑިވްސް (ޓީމް)ގެ ރައީސްކަން ވެސް ކުރިން ކުރައްވާފައިވާ ބޭފުޅެކެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކުގެ ކޮމިޓީގެ މިއަދުގެ ބައްދަލުވުމުގައި އީސަ ވިދާޅުވީ ކެޝުއަލް މުވައްޒަފުންގެ ގޮތުގައި ގިނަ އަދަދެއްގެ ބޭރު މީހުން ގެންދިޔައީ ސާވިސްޗާޖް ދިނުމުގެ އުސޫލު ބަދަލުކޮށް، ވަޒީފާއާ ބެހޭ ގާނޫނަށް ގެނައި ބަދަލާ ގުޅިގެން ކަމަށެވެ. އޭނާ އެ ވިދާޅުވި ގޮތުން ބައެއް ރިސޯޓްތަކުން އެގޮތަށް ކަންތައް ކޮށްފައި އެވަނީ ސާވިސްޖާޗް ލިބޭ މުވައްޒަފުންގެ އަދަދު މަދުކުރަން ކަމަށް ބެލެވެ އެވެ.
"ކުޑަ ކުންފުންޏަކުން މަގުމަތިން ބަންގާޅީންތަކެއް [ބަންގްލަދޭޝް މީހުންތަކެއް] ހޮވާލައިގެން ގެންގޮސް، މިހާރު މާލޭގެ މަގުމަތީގައި ގަވައިދާ ހިލާފަށް އުޅުނު [ސައްހަ ލިޔެކިއުންތައް ނެތް] ހުރިހާ ބަންގާޅީންތަކެއް މިހާރު ކެޝުއަލް މުވައްޒފުންގެ ގޮތުގައި އެތިބީ. އެހެންވެގެން އެމީހުން ނުފެންނަނީ،" އަހުމަދު އީސާ ވިދާޅުވި އެވެ.
އޭނާ މިމޭރުމުން ވާހަކަ ދެއްކެވީ ރާއްޖެއަށް އެންމެ ގިނައިން ލޭބަރުން ގެންނަ އެއް ގައުމުކަމަށްވާ ބަންގްލަދޭޝުން މީހުން އެތެރެކުރުމުގެ ފުރުސަތު މިހާރު ނޯންނާތީ ކުދިކުންފުނިތަކަށް ދަތިވާ ކަމަށް ތުލުސްދޫ ދާއިރާގެ މެމްބަރު އިބްރާހީމް ނަސީމް ވިދާޅުވުމުންނެވެ.
އެ ގައުމުން މީހުން ގެންނަން އަލުން ފުރުސަތު ދިނުމަކީ ރާއްޖޭގައި މަސައްކަތްކުރާ ބިދޭސީ މުވައްޒަފުންގެ އަދަދު އިތުރުކުރަންދޭ ހިތްވަރަކަށް ވާނެ ކަމަށް އީސަ ވިދާޅުވި އެވެ. އޭނާ ތުހުމަތުކުރެއްވި ގޮތުގައި ނ. އަތޮޅުގެ ބައެއް ލަގްޒަރީ ރިސޯޓްތަކުގައި ދާއިމީ މުވައްޒަފުންނަށް ވުރެ ދެގުނަ އިތުރަށް، ކެޝުއަލް މުވައްޒަފުންގެ ގޮތުގައި ގެންގުޅޭ ބިދޭސީން އެބަތިއްބެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކުގެ ކޮމިޓީގެ މިއަދުގެ ބައްދަލުވުމުގައި މެމްބަރުން ބައިވެރިވެވަޑައިގަންނަވަނީ.
"ހަތަރުސަތޭކަ ވަރަކަށް މުވައްޒަފުން ހިދުމަތްކުރާ ތަންތާނގައި ސަތޭކަވަރަކަށް މުވައްޒަފުން ތިބީ ދާއިމީ މުވައްޒަފުންގެ ގޮތުގައި. ދެން ބާކީ ތިބި ތިންސަތޭކަ މުވައްޒަފުންނަކީ އެގޮތް މިގޮތަށް، ކުދިކުދި ކުންފުނިތަކުގެ ނަމުގައި ކެޝުއަލް މުވައްޒަފުންގެ ގޮތުގައި އަރުވާފައި ތިބިމީހުން،" އީސަ ވިދާޅުވި އެވެ.
އީސަ ވިދާޅުވީ ގަވައިދާ ހިލާފަށް އައިސްތިބި މީހުން ހިމެނޭ ގޮތުން ވިޔަސް، ރާއްޖޭގައި މަސައްކަތްކުރާ ބަންގްލަދޭޝް މީހުންގެ އަދަދު 100،000 އަށް އަރާފައިވާ ހާލަތެއްގައި އެގައުމުން އިތުރަށް މީހުން ގެންނަން ހުއްދަދޭން އޭނާ ދެކޮޅު ކަމަށެވެ. ބާރު އަޅަން ޖެހޭނީ ގާނޫނަށް އަމަލުކުރަން ކަމަށް ވެސް އޭނާ ވިދާޅުވި އެވެ.
ސައްހަ ލިޔެކިއުން ނެތި ރާއްޖޭގައި މަސައްކަތްކުރާ ގިނަ އަދަދެއްގެ ބިދޭސީ މަސައްކަތްތެރިންނާ މެދު އެކަށީގެންވާ ފިޔަވަޅު ނާޅާ ކަމަށް ވިދާޅުވެ، ވިލުފުށީ ދާއިރާގެ މެމްބަރު ހަސަން އަފީފު ވެސް މިއަދުގެ ބައްދަލުވުމުގައި ކަންބޮޑުވުން ފާޅުކުރެއްވި އެވެ. އޭނާ ވިދާޅުވީ ބަންގްލަދޭޝްގެ އެއް ލައްކަ މީހުން ރާއްޖޭގައި މަސައްކަތްކުރާ އިރު ސައްހަ ގޮތުގައި އައިސް ތިބީ އޭގެ ތެރެއިން 60،000 މީހުން ކަމަށެވެ.
"އަނެއް ސާޅީސްހާސް މީހުން ކީއްވެތޯ ގަވާއިދުގެ ތެރެއަށް ނުފެއްތިގެން މިއުޅެނީ؟," އަފީފް ސުވާލުކުރެއްވި އެވެ.
މިއަަދުގެ ބައްދަލުވުމުގައި ކޮމިޓީގެ މުގައްރިރު އަދި މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވި ގޮތުގައި ބިދޭސީ މަސައްކަތްތެރިންގެ ތެރެއިން ސައްހަ ލިޔެކިއުންތައް ނެތް މީހުންގެ މައްސަލަ ހައްލުކުރަން ކުރާ މަސައްކަތުގެ ތަފްސީލް ރިޕޯޓެއް ކޮންމެ ތިން މަހަކުން އެއް ފަހަރު ހޯދަން ހާރިޖީ ގުޅުންތަކުގެ ކޮމިޓީން އޮތީ ނިންމައިފަ އެވެ.
ކޮމިޓީގެ އެ ނިންމުމާ އެއްގޮތަށް އިދާރާތަކުން ފޮނުވި ފުރަތަމަ ރިޕޯޓް މިހާރު ލިބިފައިވާ ކަމަށް ވެސް އޭނާ ވިދާޅުވި އެވެ. ކޮމިޓީން މިއަދު ނިންމީ އެ ރިޕޯޓް ރިވައިސްކުރުމަށް ފަހު އިކޮނޮމިކް މިނިސްޓްރީގެ ބޭފުޅުންނާ އަންނަ ބުދަ ދުވަހު ބައްދަލުކުރުމަށެވެ.
