ކޮވިޑް ވެކްސިނާ ގުޅިގެން އަޅާފައިވާ ފިޔަވަޅުތަކާ ދެކޮޅަށް މުޒާހަރާ ކުރާ މީހުންގެ މައްސަލަ ބޮޑުވެ، ކެނެޑާގެ އެމެޖެންސީޒް ގާނޫނަށް އަމަލު ކުރަން ބޮޑު ވަޒީރު ޖަސްޓިން ޓްރޫޑޯ ނިންމަވައިފި އެވެ.
ޓްރޫޑޯ ވިދާޅުވީ އަޅާ ފިޔަވަޅުތައް ވާނީ "ވަގުތުގެ ގޮތުން ލިމިޓުކޮށް، ގަބޫލުކުރެވޭ އަދި ހާލަތަށް އެކަށީގެންވާ" ފިޔަވަޅުތަކަކަށް ކަމަށެވެ. އެ މަސައްކަތަށް ސިފައިން ނުނެރޭނެ ކަމަށް ވެސް ވިދާޅުވި އެވެ.
އެ ގާނޫނުގެ ދަށުން ކޯޓު އޯޑަރަކާ ނުލައި، މުޒާހަރާއާ ގުޅުން ހުރި ހުރިހާ އެންމެންގެ ޕާސަނަލް އެކައުންޓުތައް ހިފެހެއްޓުމުގެ ބާރު ބޭންކުތަކަށް ލިބިދެ އެވެ.
ކެނެޑާގެ ވެރިރަށުގެ މަގުތައް ބަންދުކޮށްގެން އެތައް ސަތޭކަ ބަޔަކު އަދިވެސް ދަނީ "ފްރީޑަމް ކޮންވޯއި" މުޒާހަރާގައި ބައިވެރިވަމުންނެވެ.
އާދީއްތަ ދުވަހު ފުލުހުން ވަނީ، ކޯޓުގެ އަމުރަކާ އެއް ގޮތަށް، ކެނެޑާ އާއި އެމެރިކާއާ ދެމެދުގައި އޮންނަ މުހިއްމު ބޯޑަރު ބްރިޖެއް ކަމަށްވާ އެމްބެސެޑާ ބްރިޖުން މުޒާހަރާގެ ބައިވެރިން ފޮނުވާލާފަ އެވެ.
މިދިޔަ ހަފްތާގައި ކެނެޑާގެ ޓްރަކް ދުއްވާ މީހުން މުޒާހަރާ ފެށީ އެ މީހުން ކޮވިޑް ވެކްސިން ޖަހަން މަޖުބޫރު ވާނެ ކަމަށް ކަނޑައެޅުމުން އެކަމާ ދެކޮޅަށެވެ.
ސަރުކާރުން އެންގީ އެމެރިކާ އާއި ކެނެޑާއާ ދެމެދުގައިވާ ބޯޑަރު ހުރަސް ކުރެވޭނީ ވެކްސިން ޖަހައިގެން ތިބި ޓްރަކް ދުއްވާ މީހުންނަށް ކަމަށެވެ.
ވެކްސިން ނުޖަހާ ތިބި ޓްރަކް ދުއްވާ މީހުން ކެނެޑާ ހުރަސްކޮށް އެމެރިކާއަށް އެތެރެވެ، އެނބުރި ކެނެޑާއަށް ދިޔުމަށް ފަހު ކަރަންޓީނު ވާން ޖެހޭނެ ކަމަށް ވެސް އެންގި އެވެ.
ނަމަވެސް މިހާރު މުޒާހަރާ ބަދަލުވެފައި ވަނީ ކޮވިޑާ ގުޅިގެން ސަރުކާރުން އަޅާފައިވާ ހުރިހާ ފިޔަވަޅުތަކާ ދެކޮޅަށް ކުރާ މުޒާހަރާ އަކަށެވެ.
