ކޮލޮމްބޯ، ސްރީލަންކާ (ފެބްރުއަރީ 14) - ސްރީލަންކާގައި ސިއްހީ ދާއިރާ އާއި ކަރަންޓުގެ ހިދުމަތް ފޯރުކޮށްދޭ ދާއިރާގެ މުވައްޒަފުން އިހްތިޖާޖު ކުރުން މަނާކޮށްފި އެވެ.
އެގޮތަށް ނިންމީ މަސައްކަތްތެރިންގެ ޖަމިއްޔާއަކުން އިސް ނަގައިގެން މިދިޔަ ހަފްތާގައި ފެށި އިހްތިޖާޖެއްގެ ސަބަބުން ސަރުކާރުގެ ހޮސްޕިޓަލްތައް ހުއްޓުމަކަށް އައިސްފައި ވާތީ އެވެ.
ރައީސް ގޮތަބަޔާ ރާޖަޕަކްސަގެ އޮފީހުން ބުނީ އެމަނިކުފާނު އެގޮތަށް ނިންމެވީ ދެ ދާއިރާގެ މަސައްކަތް ހުއްޓުމަކަށް އައުން މަނާކުރާ 1979 ވަނަ އަހަރުގެ ގާނޫނެއްގެ ދަށުން ކަމަށެވެ.
އެ ގާނޫނުގެ ދަށުން ސިއްހީ ދާއިރާ އާއި ކަރަންޓުގެ ހިދުމަތް ފޯރުކޮށްދޭ ދާއިރާގެ މީހުން އިހްތިޖާޖު ކުރާ ނަމަ، ކުށްވެރިވެ ފަސް އަހަރުގެ ޖަލު ހުކުމެއް އައުން އެކަށީގެންވެ އެވެ. އޭގެ އިތުރުން މަސައްކަތަށް ނުކުންނަން ދެކޮޅު ހަދާ މީހުންގެ މުދާ ދައުލަތަށް ނެގުމުގެ ބާރު ވެސް ލިބިދެ އެވެ.
ސިއްހީ މަސައްކަތްތެރިންގެ ޖަމިއްޔާއިން މިދިޔަ ހަފްތާގައި ފެށި އިހްތިޖާޖް ނިންމަން ބުރާސްފަތި ދުވަހު ކޯޓުން އަމުރު ކުރި ނަމަވެސް، އެ އަމުރާ އެއް ގޮތަށް އަމަލުކޮށްފައެއް ނުވެ އެވެ.
ބޭރު ފައިސާގެ ދަތިކަމާ ހެދި އިގްތިސާދީ ކާރިސާއެއް ކުރިމަތިވެފައިވާ ސްރީލަންކާގެ ސިއްހީ މަސައްކަތްތެރިން ޑިމާންޑު ކުރަނީ އެލަވަންސް އިތުރުކޮށް، މުސާރައިގެ އޮނިގަނޑު ބަދަލުކޮށް، ޕްރޮމޯޝަން ލިބޭނެ ގޮތްތައް މަގުފަހި ކުރުމަށެވެ.
ނަމަވެސް ސަރުކާރުން ބުނީ ގައުމުގެ އިގްތިސާދީ ހާލަތު އޮތް ގޮތުގެ ސަބަބުން މުސާރަ ބޮޑު ކުރެވެން ނެތް ކަމަށެވެ. ސަރުކާރު ހޮސްޕިޓަލްތަކުގެ އެތައް ހާސް މުވައްޒަފުން ދަނީ އިހްތިޖާޖު ކުރަމުންނެވެ.
ކަރަންޓުގެ ހިދުމަތް ފޯރުކޮށްދޭ މުވައްޒަފުން އިހްތިޖާޖު ނުކުރި ނަމަވެސް، އެމެރިކާގެ ކުންފުންޏަކަށް ތާމަލް ޕަވާ ޕްލާންޓެއް ވިއްކާލަން އުޅޭ މައްސަލައިގައި ފިޔަވަޅު އަޅާނެ ކަމުގެ އިންޒާރު ސަރުކާރަށް ދީފައިވެ އެވެ.
އެ ދެ ދާއިރާގެ މުވައްޒަފުން އިހްތިޖާޖު ކުރުން މަނާކުރި ނަމަވެސް، ސިއްހީ މަސައްކަތްތެރިން ދަނީ އިހްތިޖާޖް ކުރިއަށް ގެންދަމުންނެވެ. އެގޮތުން މިއަދު މިއީ އިހްތިޖާޖު ކުރާތާ އަށް ވަނަ ދުވަހެވެ.
