މިއަދުން ފެށިގެން ހައިކޯޓުގައި ކުރިއަށްދާ އަޑުއެހުންތަކަށް ފޯނާއި ލެޕްޓޮޕްގެ އިތުރުން ޓެބްލެޓް ވެއްދޭނެ ކަމަށް އެ ކޯޓުން ބުނެފި އެވެ.
އިލެކްޓްރޯނިކް ވަސީލަތްތައް ޝަރީއަތް ކުރާ މަޖިލީހަށް ވެއްދުމުގެ ހުއްދަ ދިނީ މިއަދު އަމަލު ކުރަން ފެށި "ޝަރީއަތުގެ މަޖިލީހަށް އިލެކްޓްރޯނިކް އާލާތްތައް ވެއްދުމާ ބެހޭ އުސޫލު" ގެ ދަށުންނެވެ. އެ އުސޫލު ފާސް ކުރީ ޖެނުއަރީ 30، ގައި އެ ކޯޓުގެ ފަނޑިޔާރުންގެ މަޖިލީހުންނެވެ.
ހައިކޯޓުގައި ކުރިއަށްދާ އިސްތިއުނާފީ އަޑުއެހުންތަކަށް އިލެކްޓްރޯނިކް އާލާތްތައް ވެއްދުމުގެ ހުއްދަ ދީފައި ވަނީ ހަމައެކަނި މައްސަލައިގެ ހަސްމުންނަށެވެ. އެއީ އެ މައްސަލައަކު ހިމެނޭ ދެ ފަރަތަށެވެ. އަޑުއެހުމަށް ވަންނަ ފަރާތްތަކަށް އެފަދަ އެއްވެސް އެއްޗެއް ނުވެއްދޭނެ އެވެ. ނަމަވެސް އޭގެތެރެއިން ހަބީރުންނާ، ހެކިވެރިން އިސްތިސްނާ ވާނެ އެވެ.
މައްސަލަތައް ހުށަހެޅުމާއި ޖަވާބުދާރީވުމުގައި ފަސޭހަވާނެ މަގެއް ފަހިކޮށްދިނުމަށްޓަކައި އެ ހުއްދަ ދިން ނަމަވެސް، ޝަރީއަތުގެ އަޑު ނުވަތަ މަންޒަރު ރިކޯޑްކޮށް، ބްރޯޑްކާސްޓް ކުރުން އަދިވެސް މަނާވާނެ އެވެ. އަދި ޝަރީއަތުގެ މަޖިލީހުގެ ނިޒާމް ގެއްލޭ ގޮތަށް އެފަދަ އާލާތްތައް ވައްދައިގެން އަމަލު ނުކުރުމަށް ވެސް އުސޫލުގައި އިރުޝާދު ދީފައިވެ އެވެ.
ޝަރީއަތުގެ ނިޒާމު ގެއްލޭ ފަދަ ކަމެއް ކޮށްފި ނަމަ، އެ އެއްޗެއް މަޖިލީހުން ނެރުމުގެ ބާރާއި ކުރިއަށް އޮތް އަޑުއެހުންތަކުގައި އެ މީހަކަށް އެފަދަ އިލެކްޓްރޯނިކް އާލާތްތައް ވެއްދުމުގެ ހުއްދަ ނުދިނުމުގެ އިހްތިޔާރު ވެސް ކޯޓަށް އުސޫލުގެ ދަށުން ލިބެ އެވެ. އަދި ޝަރީއަތުގެ ހުރުމަތް ކަނޑައިލި ކަމަށް ނިންމާ ވަގުތުން ފިޔަވަޅު އެޅުމުގެ ބާރު ވެސް ފަނޑިޔާރަށް ލިބިގެންވެ އެވެ.
ކޮވިޑް19 ގެ ބަލިމަޑުކަމާ ގުޅިގެން އަތުންއަތަށް ބަދަލުކުރެވޭ ލިޔެކިޔުންތައް ވީހާ ވެސް މަދުކުރުމަށްޓަކައި ސެޕްޓެމްބަރު 7، 2020 އިން ފެށިގެން ކްރިމިނަލް ކޯޓުގެ އަޑުއެހުންތަކަށް ވެސް ސްމާޓް ވަސީލަތްތައް ވެއްދުމުގެ ހުއްދަ ދީފައިވެ އެވެ.
