މިލާން (ފެބްރުއަރީ 13) - އިޓާލިއަން ލީގުގައި ރޭ ނަޕޯލީ އާއި އިންޓަ މިލާން ބައްދަލުކުރި މެޗު 1-1 އިން އެއްވަރުވެ، އޭސީ މިލާނަށް ތާވަލްގެ އެއް ވަނަ އަށް އެރުމުގެ ފުރުސަތު ލިބިއްޖެ އެވެ.
ނަޕޯލީގެ ދަނޑުގައި ކުޅުނު މެޗުގެ ހަތް ވަނަ މިނިޓުގައި ނަޕޯލީ އިން ލީޑު ނެގީ ލޮރޮންޒޯ އިންސިންޔޭ ކާމިޔާބުކުރި ޕެނަލްޓީ އަކުންނެވެ. މިއީ އިންޓަގެ އޭރިއާތެރެއިން ނަޕޯލީގެ ފޯވާޑް ވިކްޓަ އޮސިމްހެއިން އަށް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ. ނަޕޯލީ އަށް ލީޑުފުޅާކޮށްދޭން ޕިއޮޓްރޭ ޒިއެލިންސްކީ ޖެހި ބޯޅައެއް ބޭރުވީ ދަނޑީގައި ޖެހިފަ އެވެ.
ދެ ވަނަ ހާފުގެ ކުރީކޮޅު، އިންޓަ އިން މެޗުގެ ނަތީޖާ ހަމަހަމަކުރީ ފޯވަޑް އެޑިން ޖެކޯ ޖެހި ލަނޑުންނެވެ. ނަޕޯލީ އޭރިއާތެރެއަށް ހުރަސްވި ބޯޅައެއް އެ ޓީމުގެ ޑިފެންޑަރުންނަށް ސަލާމަތްނުކުރެވި ޖެކޯ އަށް ލިބުމުން އޭނާ ވަނީ ހަނި އޭންގަލުން ގޯލުގެ ހުރަސްދަނޑީގައި ޖައްސާފައި ބޯޅަ ގޯލުގެ ތެރެއަށް ފޮނުވާލައިފަ އެވެ.
މި މެޗުގެ ނަތީޖާއާ އެކު، އެންމެ ފަހުގެ ޗެމްޕިއަން އިންޓާ ތާވަލްގެ އެއް ވަނައިގައި އޮތީ އެއް ޕޮއިންޓްގެ ލީޑަކާ އެކު އެވެ. އިންޓަ ތާވަލްގެ އެއް ވަނައިގައި 54 ޕޮއިންޓާ އެކު އޮތްއިރު، ދެ ވަނައިގައި 53 ޕޮއިންޓާ އެކު އޮތީ ނަޕޯލީ އެވެ. މިލާން ތިންވަނައިގައި އޮތީ 52 ޕޮއިންޓާ އެކު އެވެ.
ލީގުގައި މިއަދު ސަމްޕްޑޯރިއާއާ ދެކޮޅަށް ކުޅޭ މެޗުން މިލާން މޮޅުވެއްޖެނަމަ، އެއް ޕޮއިންޓްގެ ލީޑަކާއެކު، އެ ޓީމު ތާވަލްގެ އެއް ވަނަ އަށް ޖެހިލާނެ އެވެ.
މެޗަށް ފަހު އިންޓަ މިލާންގެ އެސިސްޓަންޓް ކޯޗު މަސިމިިލިއާނޯ ފަރިސް ބުނީ މެޗުން މޮޅުނުވެވުމަކީ އިންޓަ އަށް ލިބުނު ދެރައެއް ކަމަށެވެ.
"މެޗުގެ ފަހުކޮޅަށް ދިޔައިރު، ނަޕޯލީ އަށްވުރެ ރަނގަޅަށް އޮތީ އިންޓަ. އެހެންވެ މި މެޗުން މޮޅުނުވެވުމަކީ އަހަރެމެންނަށް ލިބުނު ދެރައެއް،" އިންޓަގެ ކޯޗު ސިމޯނޭ އިންޒާގީ ސަސްޕެންޝަންގައި ހުރުމުން، މި މެޗުގައި ޓީމަށް އިރުޝާދު ދިން ފަރިސް ބުންޏެވެ.
އިޓާލިއަން ލީގުގައި އިއްޔެ ބޮލޯންޔުާ އަތުން ލާޒިއޯ ވަނީ 3-0 އިން މޮޅުވެފަ އެވެ. މި މެޗުގައި ލާޒިއޯގެ މަޓިއާ ޒަކަގްނީ ދެ ލަނޑުޖެހިއިރު، ޗީރޯ އިމޯބިލޭ ވެސް ވަނީ ލަނޑު ޖަހައިފަ އެވެ. -- އޭއެފްޕީ
