ދަ ހޭގް، ނެދަލޭންޑްސް (ފެބްރުއަރީ 12) - ކެނެޑާގައި ކުރަމުންދާ "ފްރީޑަމް ކޮންވޯއި" މުޒާހަރާ ކޮޕީކޮށް، ނެދަލޭންޑްސްގެ ދަ ހޭގްގެ މައި މަގުތައް ވެސް ބަންދުކޮށްފި އެވެ.
ކެނެޑާގެ ވެރިރަށް އޮޓާވާގެ މަގުތައް ބަންދު ކުރީ ކޮވިޑް ފިޔަވަޅުތަކާ ދެކޮޅަށް ޓްރަކް ދުއްވާ މީހުންނެވެ. އެ މީހުންގެ އުޅަނދުތައް މަގުމަތީގައި ޕާކްކޮށް، މަގުތަކުން ނުގޮސް ތިބުމުން ސިޓީ ވަނީ ހުއްޓިފަ އެވެ.
އެ މުޒާހަރާ ނަމޫނާއަކަށް ބަލައި، ނެދަލޭންޑްސް ސަރުކާރުގެ މައި އޮފީސް ހުންނަ ސަރަހައްދަށް ދެވެން ހުރި ހުރިހާ މަގުތައް ވަނީ ބަންދުކޮށްފަ އެވެ.
ހޮނިހިރު ދުވަހުގެ ހެނދުނު ޓްރަކުތަކާއި ކާރުތަކާއި ޓްރެކްޓަރުތަކުގައި މަގުމައްޗަށް ނުކުމެ ޕާކުކޮށްފައިވާ އިރު، އެތައް ސަތޭކަ އުޅަނދެއް ބައިވެރިވާ ކަމަށް ރިޕޯޓުތައް ބުނެ އެވެ.
އެ ސަރަހައްދު ދޫކޮށް ދާން ފުލުހުން އިންޒާރު ދިން ނަމަވެސް، ގިނަ ބަޔަކު ތިބީ މަޑުކޮށްގެންނެވެ. މުޒާހަރާ އިންތިޒާމް ކުރި ފަރާތުން ނެރުނު ބަޔާނެއްގައި ބުނީ ކޮވިޑްގެ ހުރިހާ ފިޔަވަޅެއް އުވާ ނުލަނީސް އެނބުރި ނުދާނެ ކަމަށެވެ.
ކެނެޑާގެ "ފްރީޑަމް ކޮންވޯއި" ކޮޕީކޮށް ނިއުޒީލޭންޑާއި ފްރާންސްގައި ވެސް ދަނީ މުޒާހަރާ ކުރަމުންނެވެ. ނިއުޒީލޭންޑުގައި ފުލުހުންނާއި މުޒާހަރާގެ ބައިވެރިންނާ ދެމެދު ހަމަނުޖެހުން ހިނގި އެވެ. އަދި ފްރާންސްގައި ފުލުހުން މުޒާހަރާ ރޫޅާލަން ބާރުގެ ބޭނުންކޮށް، ގިނަ ބަޔަކު ޖޫރިމަނާކޮށްފައިވެ އެވެ.
އެފަދަ މުޒާހަރާއެއް ނެދަލޭންޑްސްގައި ފަށާފައިވާ އިރު، މީގެ ކުރިން ވެސް އެ ގައުމުގައި ކޮވިޑްގެ ފިޔަވަޅުތަކާ ދެކޮޅަށް މުޒާހަރާކޮށްފައިވެ އެވެ.
އެގޮތުން މިދިޔަ އަހަރުގެ ޖެނުއަރީ މަހާއި ނޮވެމްބަރު މަހު ބޭއްވި އެއްވުންތަކުގައި ބޮޑެތި ހަމަނުޖެހުން ހިނގި އެވެ.
