ޕެރިސް (ފެބްރުއަރީ 12) - ފްރެންޗް ލީގުގައި ރޭ އިތުރު ވަގުތުގައި ކީލިއަން އެމްބާޕޭ ޖެހި ގޯލުން 1-0 އިން ރެެނެސް އަތުން ޕީއެސްޖީ މޮޅުވެއްޖެ އެވެ.
މި ނަތީޖާއާ އެކު ޕީއެސްޖީ ވަނީ ފްރެންޗް ލީގުގެ އެއް ވަނައިގައި 16 ޕޮއިންޓަށް ލީޑުފުޅާކޮށްފަ އެވެ. އެއީ 24 މެޗުން 59 ޕޮއިންޓް ހޯދައިގެންނެވެ. ދެ ވަނައިގައި އޮތް މާސޭ އަށް 23. މެޗުން 43 ޕޮއިންޓް ލިބިފައިވާއިރު، ތިން ވަނައިގައި އޮތް ނީސް އަށް ވަނީ 23 މެޗުން 42 ޕޮއިންޓް ލިބިފަ އެވެ.
މެޗުގެ ކުރީކޮޅުގައި ރެނެސްގެ ބެންޖަމިން ބޯރެޖޯ ޖެހި ބޯޅަ ޕީއެސްޖީގެ ކީޕަރު ކޭލޯ ނަވާސް ވަނީ މަތަކޮށްފަ އެވެ. ޕީއެސްޖީގެ ޒަވީ ސީމޯންސް ހުރަސްތަކެއް ނަގައިގެން އެ ޓީމުގެ އެހެން ކުޅުންތެރިއަކު ލައްވައި ގޯލެއް ޖެހުމުގެ މަސައްކަތް ކާމިޔާބެއްނުވި އެވެ. އަދި އޭނާ އަށް ލިބުނު ފުރުސަތުގައި ރަނގަޅަށް ބޯޅަ ފޮނުވާނުލެވުނެވެ.
ފުރަތަމަ ހާފު ނިމުމުގެ ކުރިން ރެނެސް އޭރިއާތެރެއިން އެމްބާޕޭ ގޯލުގެ ދުރު ކަނަށް ޖެހި ބޯޅަ ބޭރުވީ ދަނޑީގައި ޖެހިފަ އެވެ. އޭގެ ކުރިން އެމްބާޕޭ އާއި ލިއޮނަލް މެސީ ޖެހި ބޯޅަ ދިޔައީ ގޯލާ ސީދާނުވެ ބޭރުންނެވެ. ދެ ވަަނަ ހާފް ފަށައިގެން މާ ގިނައިރެއް ނުވެ، އެމްބާޕޭ ވަނީ ގޯލެއް ޖަހައިފަ އެެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި، ނިންމީ އޮފްސައިޑް ކަމަށެވެ.
އެމްބާޕޭ، ޕީއެސްޖީ މޮޅުކޮށްދިން ގޯލު ޖެހީ އިތުރު ވަގުތަށް ދެއްކި ހަ މިނިޓްގެ ތެރެއިން ތިން ވަނަ މިނިޓްގައި މެސީ ދިން ބޯޅައަކުންނެވެ. މެސީ ދިން ބޯޅަ ކޮންޓްރޯލް ކޮށްލުމަށް ފަހު އެމްބާޕޭ ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.
ޗެމްޕިއަންސް ލީގުގައި އަންނަ އަންގާރަ ދުވަހުގެރޭ ރެއާލް މެޑްރިޑާ ދެކޮޅަށް ކުޅޭ މެޗުގެ ކުރިން ޕީއެސްޖީން މި ވަނީ އެމްބާޕޭގެ ގޯލުން މުހިންމު މޮޅެއް ހޯދައިފަ އެވެ.
